Read TAITA BIBLE – Biblia Ilagho Jiboie Kwa Wandu Wose WUKUMBUSO 19 Bible Online

WUKUMBUSO 19 - TAITA BIBLE – Biblia Ilagho Jiboie Kwa Wandu Wose bible

WUKUMBUSO 19

¹“BWANA Mlungu wako ukaritotesha mbari ra ijo isanga umnekagha, nao mjiwuse na kukaia andenyi ya mizi yawo na nyumba rawo,

²mmbike mizi idadu andenyi ya isanga ijo BWANA Mlungu onyu umnekagha mujiwuse.

³M'boise barabara idadu revikia iyo mizi; eri m'bwaghi uo ose udime kukimbiria aho kwa wulindiri.

⁴Mndungi ukabwagha mundu kwa ndengwa, wiserekoghe na wumaiza ghungi imbiri, uchakimbiria ghumu ghwa mizi iyo na kukaia banana.

⁵Kwa mfwano wandu wawi wikaghenda kilembenyi kudema midi, nao umu uwusire isoka jake ukikunda kudema mudi, na isoka jifume mwininyi jimlase mmbao na kum'bwagha. Uo m'bwaghi wadima kukimbiria muzi ghumu ghwa iyo idadu ukire irangi jake;

⁶isechekaia mlipa ngenga ummbinge uo m'bwaghi kwa machu mabaa na kumbwadia chienyi angu iko ndacha, nao umshoghonuo na kum'bwagha hata ngera ndeeremfwanieghe ufo angu userekoghe na wumaiza ghungi na mmbao aho imbiri.

⁷Kwa wundu ugho, niko namlaghira mmbike mizi idadu.

⁸“Iji BWANA Mlungu onyu wachuria isanga jenyu jikaie ibaa, sa iji orewilaghirieghe weke ndeyo, na kumneka ijo isanga jose orelaghirieghe kuwineka weke ndeyo;

⁹msaghuo mizi imu idadu sena. (Uchamneka isanga iji, mkabonya seji nimlaghiragha idime kwa kumkunda BWANA Mlungu onyu, na kughenda kwa chia rake matuku ghose.)

¹⁰Isechekaia wandu wisewadie ikosa kubwaghwa duu isangenyi kwako, ijo BWANA Mlungu onyu umnekagha jikaie ifwa jenyu; nenyo mtalo kukaia na ikosa jebwaghwa.

¹¹“Ela mndungi ukazamilwa ni mmbao, nao umlalirie na kum'bwagha, nao moni ukimbirie muzi ghumu ghwa iyo,

¹²waghosi wa muzi ghwake wichamdumiria uwado na kuwunjwa; nao uchafunywa kwa mlipi ngenga upate kum'bwagha.

¹³Msemmbonie wughoma ghungi ela muinje ikosa jebwagha mundu andenyi ya Israeli, mpate kukaia nicha.

¹⁴“Msesoghoraneghe mwano ghorewikiloghe ni wandu wa kala andenyi ya isanga mnekwagha ni BWANA Mlungu onyu.

¹⁵“Wushahidi ghwa mundu umweri ndeghukatagha kum'bonya mundu utanyo aighu ya ikosa jingi ijo jose ujibonyere; wushahidi ghwa wandu wawi angu wadadu nigho ghukatagha kumtanya mundu kukaia na ikosa.

¹⁶Ngera mshahidi ungi wa tee wawuka kumshitakia mndungi wei wakosere,

¹⁷wandu wose wawi wichaghenda kwa wakohani na watanyi wiko kazinyi ngelo iyo, na kuwikwa imbiri ya BWANA.

¹⁸Watanyi wichakotia wikilola kumanya ngera uo mshahidi ni wa tee, na ikawoneka waamzighiria,

¹⁹moomneka adhabu icheni ukundeghe mruna uipate; na kwa chia iyo, mchainja ugho wuwiwi aghadi konyu.

²⁰Na wandu wazima wose wichasikira na kuobua, nawo najingi ndewichaabonya wuwiwi sa ugho aghadi konyu anduangi.

²¹Msekaie na wughoma ghungi; adhabu ichakaia irangi kwa irangi, iriso kwa iriso, ighegho kwa ighegho, mkonu kwa mkonu, na kughu kwa kughu.