Read TAITA BIBLE – Biblia Ilagho Jiboie Kwa Wandu Wose WUKUMBUSO 20 Bible Online

WUKUMBUSO 20 - TAITA BIBLE – Biblia Ilagho Jiboie Kwa Wandu Wose bible

WUKUMBUSO 20

¹“Mkakaghenda wudenyi kulwa na wamaiza wenyu, nao mmbone farasi, magare, na ijeshi ibaa kuchumba jenyu, msewiobuo; BWANA Mlungu onyu uo oremfunyireghe isanga ja Misri oko andwamweri nenyo.

²Mkalighisa kuzoya wuda, mkohani uchafuma ukaie naimbiri ughore na ijeshi

³na kuwizera, ‘Sikirenyi ee Israeli, mwalighisa kulwa na wamaiza wenyu: msefo ngolo, angu kungilwa ni kiture, angu kusughusika, hata msakewiobua.

⁴BWANA Mlungu onyu uchaghendanya nenyo, upate kumluya na kumsimia.’

⁵“Niko wabaa wichadedanya na wandu wikighamba, ‘Mndungi oko aha uaghie nyumba mbishi useiwikie wakfu? Kamanya uko, ndewuye nyumbenyi kwake usechefwa wudenyi, na mundu mzima ucheiwika wakfu.

⁶Na kawona mndungi uko aha wawae mbuwa ya mizabibu, nao ukasowa wulalo ghokuwida matunda gharo, ndewuye nyumbenyi kwake usechefwa wudenyi, na mundu mzima ucheja matunda gharo.

⁷Na kawona mndungi uko aha wakumbie wulanga, ela ndecheemmbusa mkake, ndewuye nyumbenyi kwake usechefwa wudenyi na mundu mzima uchemmbusa.’

⁸“Sena wabaa wichawizera wandu, ‘Kawona mndungi uko aha wangilwa ni kiture na kufwa ngolo, ndewuye nyumbenyi kwake, usechebwagha wambao ngolo.’

⁹Wabaa wikameria kughora na ijeshi, niko wichaasaghua wabaa wa majeshi.

¹⁰“Mkavika kaavui na muzi mwendalwa nagho, mneke wandu waro wulalo ghobonya mapatano gha sere nenyo.

¹¹Wikakufunya na kurughua mbenge rawo, wichawuya wazumba wenyu, nenyo mchawidumikisha.

¹²Ela wandu wikalegha sere, na kukunda kubonya wuda nenyo, niko mchaghumara ugho muzi mbai-mbai.

¹³Iji BWANA Mlungu onyu wamsimia, moobwagha womi wose wa ugho muzi;

¹⁴ela waka na wana, mfugho na kula kilambo kizima chose chiko mzinyi muvido wunyika viwuye venyu; mtumie vilambo vose va wamaiza wenyu ivo BWANA Mlungu onyu umnekie.

¹⁵Huwo niko mchaaibonya mizi yose ya kula na isanga mchaajikaia.

¹⁶“Ela mkawada mizi ya isanga ijeni BWANA Mlungu onyu wawuyamneka, moobwagha kula mundu; msesighe kindo chingi chimoo.

¹⁷Mtoteshe wandu wose putu: Wahiti, na Waamori, na Wakanaani, na Waperizi, na Wahivi, na Wajebusi sa iji koni BWANA Mlungu ulaghirie;

¹⁸eri wisechemfundisha mizango yawo izamie iyo wiibonyagha wikitasa milungu yawo mchem'bonyera BWANA Mlungu onyu kaung'a.

¹⁹“Iji mwaghurughaia muzi kwa ngelo ndacha mkikunda kughuwada, msedeme midi ya matunda. Muje matunda gharo ela msedeme midi mkiinona, kwa kukaia ndeiko kwa wamaiza wenyu.

²⁰Midi mizima mwadima kuidema; muitumie kwa kughurughaia muzi, hata mughuwade ugho muzi.