Read TAITA BIBLE – Biblia Ilagho Jiboie Kwa Wandu Wose WUKUMBUSO 21 Bible Online

WUKUMBUSO 21 - TAITA BIBLE – Biblia Ilagho Jiboie Kwa Wandu Wose bible

WUKUMBUSO 21

¹“Mundu ukakulwa andonyi wabwaghwa andenyi ya isanga ijo BWANA Mlungu umnekagha mujiwuse, na mundu um'bwaghie ndemanyikagha,

²waghosi wenyu na watanyi wichacha na kupima wukula ghwa kufuma andu aho mundu ubwaghilo kuvikia mizi iko mbai-mbai.

³Niko waghosi wa ugho muzi ghuko kaavui na uo mundu ubwaghilo, wichawada tagho ya ng'ombe isebonyere kazi ingi jingi hata kungirwa ghongolo.

⁴Nawo wichasea nayo cha vololonyi iko na machi gha moda ghiseomagha, iselimilo hata kuwalwa; na aho wichainyighara singo.

⁵Wakohani walawi wichacha aho wokoni; kwa kukaia BWANA Mlungu onyu wawisaghue wimdumikie na kufunya irasimio kwa irina jake, nawo wikadumbua malagho aighu ya mwandu ghungi, niko koni ikaiagha.

⁶Niko waghosi wose wa muzi ugho ghuko kaavui na andu aho mundu ubwaghilo, wichaoghosha vala vawo aighu ya iyo tagho inyigharilo singo

⁷wikighamba, ‘Isi ndedim'bwaghie uhu mundu, hata ndediwonie ukibwaghwa.

⁸Wifue wughoma wandu wako Israeli ee BWANA, awo korewikombueghe; hata kusakewitalia wandu wako ikosa kwa wundu ghwa uo mundu ubwaghilo duu, ela kudifue wughoma ikosa ijo.’

⁹Huwo niko mchaainja ikosa aghadi konyu, ja mundu kubwaghwa duu, mkabonya ijo jiko icha imbiri ya BWANA.

¹⁰“Iji BWANA Mlungu wako wakuneka wusimi wudenyi, nao kudo wandu wunyika,

¹¹nao kummbone muka ughokie aghadi yawo, ukuboie, na oho kukunde kumlowua.

¹²Kumdo cha mzinyi kwako; na aho udumbuo iridia jake na kudumbua chwakule rake.

¹³Sena ubadilishe nguwo rake. Uchakaia nyumbenyi ukiwililia wavi wake kwa mori mlazi. Konyuma kwadima kumlowua.

¹⁴Iji kwachawona ndekumkunde, kumsighe ughende andu ukunde. Kusakem'bonya mzumba hata kusemuuze; kwa kukaia kwamerie kusela nao.

¹⁵“Mundu ukakaia na waka wawi, nao umkunde umu na umu usemkunde, ela wose wamvaie wana wa womi. Ikakaia mvalwa wa imbiri wa womi ni wa uja muka usemkunde,

¹⁶ituku wakawaghia wana ifwa ja vilambo vake, usem'bonye uja mvalwa wa imbiri wa womi wa uja muka umkunde kukaia wa imbiri, na kusigha uja mvalwa wa imbiri wa womi wa uja muka usemkunde.

¹⁷Ela uchamtala uo mwana wa womi wa muka usemkunde kukaia mvalwa wa imbiri kwa kumneka ifungu ja vilambo mando awi, nuo moni mvalwa wa imbiri, na hachi ya kuvalwa kwa imbiri ni yake.

¹⁸“Mundu ukakaia na mwana wa womi ughilikie usesikiragha, usekunde kusikira wavi wake, hata ngera wamneka adhabu;

¹⁹wavi wake wichammbwada na kumghenja mbengenyi kwa waghosi kwa muzi ghwake ughoni ukaiagha.

²⁰Nao wiwizere waghosi wa muzi, ‘Umwana odu ni mundu ughilikie, usesikiragha; ooka na lwafuo, sena ni mmbongeri.’

²¹Niko wandu wose wa muzi wichamlasa na magho hata ufo. Kwa chia iyo kuchainja wuwiwi aghadi kwako, na Israeli yose ichasikira na kuobua.

²²“Mundu ukabonya ikosa jifwane ubwagho, ukabwaghwa na kuwanikwa mdinyi,

²³msemsighe mumbi ghwake ghukilala mdinyi ela mumrike ijo ituku jeni. Kwa kukaia mundu uwanikwagha mdinyi, oowasirwa njowe ni Mlungu. Msejilushe isanga jenyu ijo BWANA Mlungu onyu umnekagha jikaie ifwa jenyu.