Read TAITA BIBLE – Biblia Ilagho Jiboie Kwa Wandu Wose WUKUMBUSO 25 Bible Online

WUKUMBUSO 25 - TAITA BIBLE – Biblia Ilagho Jiboie Kwa Wandu Wose bible

WUKUMBUSO 25

¹“Wandu wawi wikakwanywa ni ilagho jingi, nawo wiche mwandunyi kutanywa, na watanyi widumbuo mwandu na kumlekera umundu usekosere, na kumtanya umundu ukosere,

²ikakaia uo mundu ukosere waatanywa udamo, mtanyi ucham'bonya ulale andonyi udamo imbiri yake, vangu vikatanagha na ikosa jake.

³Wadima kudamwa vangu visechumbagha mirongo ina; angu vikachumba, vicham'bonya mwanyinyu Muisraeli umenyeke wandunyi.

⁴“Kusakefunga ng'ombe momu ikikuwida viro.

⁵“Ngera mundu na mruna weekanya muzi ghumweri, na umu wawo ufo usewadie mwana wa womi, uo mundu mruna umlowuo uo muka.

⁶Mwana wa womi wa imbiri uchaavalwa, uchawangwa wa uo mundu mruna ufuye; eri irina jake jisechelaghaya andenyi ya Israeli.

⁷Na ikakaia uo mundu ndeukunde kukanya na mkamruna, niko uo mkamruna uchaghenda mbengenyi kwa waghosi andu kokwania na kughamba, ‘Mruna mumi wapo ndekunde kuikatisha iyo kazi ya mruna kwapo.’

⁸Niko waghosi wa muzi ghwake wichammbanga na kudedanya nao; hata iji wafunga ndighi kughamba, ‘Sikunde kukanya nao,’

⁹niko mkamruna uchafunya chadu chake na kumchuya mada gha meso ukighamba, ‘Mundu usekunde kuiagha nyumba ya mruna, wadabonyerwa huwo.’

¹⁰Na irina ja kinyumba chake andenyi ya Israeli chichawangwa kinyumba cha mundu oreruloghe chadu.

¹¹“Ngera wandu wa womi wawi wawoka kulwa, na muka wa umu wa awo wandu usoghode kaavui kumvuvua mumi, nao uwade via va kiwomi va uo mundu wawuyamkaba mumi,

¹²kumdumbuo mkonu ghwake, kusemmbonie wughoma ghungi.

¹³“Kusewike ratili iwi andenyi ya mfuko ghwako; imu mbaa, na imu ndini.

¹⁴Kusewike vipimo viwi nyumbenyi kwako; chimu kibaa, na chimu kitini.

¹⁵Kukaie na ratili ikate na kipimo chikate, eri matuku ghako ghikaie mengi andenyi ya isanga BWANA Mlungu wako ukunekagha.

¹⁶Angu wandu wose wibonyagha maza iro, wiseko waloli, wadamzamia BWANA Mlungu wako.

¹⁷“Kumbuka seji Waamaleki werem'bonyereghe ngelo morechagha kufuma Misri.

¹⁸Seji wemkabieghe chienyi, ingelo morekoghe mwasilwa kaavui na kufwa; wikabwagha wandu wose werekoghe na nyuma; hata ndeweremuobueghe Mlungu anduangi.

¹⁹Kwa huwo BWANA Mlungu onyu ukamneka kuhora andenyi ya isanga umnekagha mujiwuse jikaie ifwa jenyu, muwibwaghe Waamaleki putu na kuinja irina jawo jisekumbuko ndoenyi; mseliwe!