Read TAITA BIBLE – Biblia Ilagho Jiboie Kwa Wandu Wose WUKUMBUSO 26 Bible Online

WUKUMBUSO 26 - TAITA BIBLE – Biblia Ilagho Jiboie Kwa Wandu Wose bible

WUKUMBUSO 26

¹“Iji mwavika isanga mnekwagha ni BWANA Mlungu onyu jikaie ifwa jenyu na kukaia andenyi yaro,

²kula umu onyu uwade mavalo ghamu gha imbiri gha ndoe gha kula kichuku agho mkuwidagha andenyi ya ijo isanga mnekwagha ni BWANA Mlungu onyu; mughikumbe kikapunyi, na kughighenja andu BWANA Mlungu onyu uchaakusaghua kukaie komtasira.

³Na oho kuchaghenda kwa mkohani uko kazinyi ngelo iyo kumzere, ‘Naghora imbiri ya BWANA Mlungu wako idime kukaia, nameria kucha isangenyi ijo BWANA orewighemieghe weke aba kukaia uchadineka.’

⁴“Niko mkohani uchawada icho kikapu na kuchiwika imbiri ya madhabahu ya BWANA Mlungu wako.

⁵Na oho kuchaghora malagho agha imbiri ya BWANA Mlungu wako, ‘Aba orekoghe Muarami omara-mara, nao ukasea Misri kukaia mghenyi omara-mara; orekwanyeghe na wandu wake watinieri, ela ukawuya mbari mbaa aho, iko na wandu wengi, wiko na kudima.

⁶Ela Wamisri wikadikoronga kwa kudibonyesha kazi sa wazumba.

⁷Niko dikamlilia BWANA, Mlungu wa weke aba, nao ukadisikira; ukawona wasi ghodu, kulemerelwa kodu, na makorongo ghedu;

⁸nao ukadifunya Misri kwa ndighi rake mbaa reobosha; kwa alama na mashiniko.

⁹Ukadireda aha, ukadineka iji isanga, isanga jinorie nandighi.

¹⁰Na idana wona nareda mavalo gha imbiri gha ndoe, agho BWANA uninekie.’ Niko aho kughiwike andonyi imbiri ya BWANA Mlungu wako na kumtasa;

¹¹na oho chiaimweri na Mlawi, na nyumba yako, na mghenyi omara-mara uko aghadi kwako, mchaboilwa andenyi ya mecha ghose agho BWANA Mlungu wako ukunekie.

¹²“Mwaka ghwa kadadu, nagho nigho mwaka gholipa ifungu ja ikumi, kukameria kulipa ifungu jako jose ja mavalo ghako kwa Mlawi na mghenyi omara-mara, na mwana mkiwa, na mka mkiwa, eri wipate kuja na kughuda andenyi ya mizi yenyu,

¹³niko kughore huwu imbiri ya BWANA Mlungu wako, ‘Ijo ifungu jieleshero nameria kujifunya nyumbenyi kwapo. Wokoni nameria kujineka Mlawi, na mghenyi omara-mara, na wana wakiwa na waka wakiwa, karakara na malaghiro ghako ghose korenilaghirieghe. Sikosere momu ghungi ghwako hata siliwie ghungi.

¹⁴Sijie ijo ifungu ja ikumi ngilila ifwa, hata sijifunyire niseelie, angu kujifunya kizongona kwa wundu ghwa wafu anduangi. Nameria kusikira na kubonya sa iji koni BWANA Mlungu wapo unilaghirie.

¹⁵Kuzighane kufuma andu kukaiagha kuelie aho mlungunyi, kuwirasimie wandu wako Israeli na isanga kudinekie jinorie nandighi, sa iji koni korewighemieghe weke aba.’

¹⁶“BWANA Mlungu onyu wawuyamlaghira idime kurikakatishe iri sharia na malaghiro ghake; na huwo mlindie kurikatisha kwa ngolo renyu rose na kwa roho renyu rose.

¹⁷Idime mwameria kughora kukaia BWANA ni Mlungu onyu, na kukaia inyo mchabonya seji ukunde, na kuwadia sharia rake na memu yake, na malaghiro ghake, na kusikira seji ughoragha.

¹⁸BWANA wamghora idime kukaia inyo mo mbari ya wandu wake moni, sa iji koni ulaghirie; na kukaia mughiwadieghe malaghiro ghake.

¹⁹Ucham'bonya wabaa kuchumba mbari ingi ya wandu uwiumbie, nenyu mchajikasa na kujibonyera ishima irina jake. Mchakaia wandu wake moni, sa iji koni orelaghirieghe.”