Read TAITA BIBLE – Biblia Ilagho Jiboie Kwa Wandu Wose WUKUMBUSO 28 Bible Online

WUKUMBUSO 28 - TAITA BIBLE – Biblia Ilagho Jiboie Kwa Wandu Wose bible

WUKUMBUSO 28

¹“Mkamsikira BWANA Mlungu onyu, na kulindia kughibonya malaghiro ghake ghose agho nimlaghiragha idime, ucham'bonya mkaie wabaa kuchumba mbari rose ra ndoenyi.

²Na agha marasimio ghose ghichumbie mchaghipata iji mwamsikira.

³Kucharasimilwa mzinyi na mbuwenyi.

⁴Kucharasimilwa kuve wana wengi; ndoe ichava kwa wungi na nyamandu, na mfugho rako richachurikia, na wana wa ng'ondi wako.

⁵Kikapu chako cha viro chicharasimilwa, chiaimweri na chombo chako cheruwia mufu.

⁶Kucharasimilwa kwa maza rako rose kubonyagha.

⁷“BWANA uchawibonya wamaiza wako wilwagha na kumoni wisimo imbiri yako; wichakuchea kwa chia imweri, ela wichakimbia wisaghisikie kwa chia mfungade.

⁸BWANA uchakurasimia nganyenyi kwako, na kazi rako rose kuribonyagha; sena uchakurasimia isangenyi ijo BWANA Mlungu wako ukunekagha.

⁹Kukawadia memu ya BWANA na kughenda kwa chia rake, uchakumangisha kupate kukaia mbari ieleshero kwa wundu ghwake moni, sa iji koni oreghemieghe.

¹⁰Na wandu wose wa ndoenyi wichawona angu BWANA wakusaghue kukaie wake, nawo wichakuobua.

¹¹BWANA uchakubonya kuwone mecha kwa wungi; kuchava kwa wungi, na mfugho rako rive kwa wungi, na ndoe yako ive kwa wungi andenyi ya ijo isanga BWANA Mlungu wako orewighemieghe weke ndeyo kukaia uchakuneka.

¹²BWANA uchakurughuya mali rake ndicha ra mlungunyi, na kunyesha vua isangenyi kwa vimu varo, nao ucharasimia kazi rako; kuchakopesha mbari nyingi, ela oho ndekuchaakopa anduangi.

¹³BWANA uchakubonya kukaie kilongozi, na oho ndekuchaalongozwa anduangi; kukawadia agho malaghiro gha BWANA Mlungu wako kara kara seji nikulaghiragha idime, kuchadua ighu hata ndekuchakaia wa ndonyi jingi;

¹⁴na kawona kusesighagha malaghiro ghangi gha agho nikulaghiragha idime kwa kuinugha na kuitasa milungu mizima.

¹⁵“Ela kukalegha kumsikira BWANA Mlungu wako, angu kuleghalindia kukatisha agho malaghiro ghake gha sharia rake nikulaghiragha idime, kuchawadwa ni njowe iri rose.

¹⁶“Kuchawadwa ni njowe mzinyi kwako na mbuwenyi kwako.

¹⁷“Kikapu chako cha viro, chichawadwa ni njowe chiaimweri na chombo chako cheruwia mufu.

¹⁸“Wana wako wichawadwa ni njowe, na mavalo gha mbuwa yako, na ng'ombe rako, hata wana wa ng'ondi rako.

¹⁹“Kula ilagho kujibonyagha, jichawadwa ni njowe.

²⁰“BWANA uchakuredia njowe, kulaghalo ni akili, kusumbuke na kulemwa ni maza rako rose kuribonyagha, hata kwanoneka na kusia shwa wori kwa wundu ghwa mabonyo ghako ghizamie angu kumsighie.

²¹BWANA uchakuredia makongo ghizamie, hata ukumerie putu isangenyi ijo kungiagha kujiwusa.

²²BWANA uchakukaba na makongo ghewasirana, homa, na kuakwa modo, na iruke jibirie, na kuoma kwa ndoe, na kiremba, na ngama ya miwalwa; maza iri richakunugha hata kwatota.

²³Mawingu ndeghichaanyesha vua na ndoe ichaoma ikuo sa chuma.

²⁴BWANA uchamdiria teri na ndoe wulalo ghwa vua isangenyi konyu hata mdime mwatoteshwa.

²⁵“BWANA ucham'bonya msimo ni wamaiza wenyu; mchatumia chiaimweri mkighenda kulwa nawo, na kukimbia imbiri yawo msaghisikie chia rose; nenyo mchashinua mawuzuri ghose gha ndoenyi.

²⁶Gharia renyu richawuya vindo va nyonyi rose ra mbeonyi, na va nyamandu ra ndoenyi; hata ndekuchaakaia na mndungi oriturusa anduangi.

²⁷BWANA uchakubonya kubuko ni mbama sa iji orewikabieghe Wamisri, na kubukwa ni vonda, na fwali, na kukusuwa kusedimagha kuboa.

²⁸BWANA uchakukaba kwa kuwukwa ni isu, na kwa kufwa meso, na kwa kulaghalwa ni akili;

²⁹na oho kuchalaghalwa ni chia dimeghadi sa kitungure, hata maza rako nderichaakaia nicha; sena kuchakorongwa na kusokwa kari kose, hata ndekuchaakaia na mndungi okutesia anduangi.

³⁰Kuchakumba muka wulanga, na mundu mzima uchalala nao; kuchaagha nyumba, na mundu mzima uchakaia; kuchawa mizabibu, ela ndekuchaaja matunda gharo anduangi.

³¹Ng'ombe yako ichabwaghwa imbiri yako, na oho ndekuchaaija; kuchasokwa punda wako, kusewuyaawunjirwa; ng'ondi rako richanekwa wamaiza wako, hata ndekuwadie mndungi uchaakutesia.

³²Wana wako wa womi na wa waka wichanekwa wandu wazima kukiwona, na oho kuchawizighanira dime dii hata kusilo kukikunda kuwiwona, kusedimagha kuwitesia na ilagho jingi.

³³Mbari kuseiichi, ichaja vindo kuvilimie kwa wasi, na oho kuchadua kukikorongwa na kubonywa kiwiwi;

³⁴na iro maza kuchaariwona, richakubonya kuwuko ni isu.

³⁵BWANA uchakukaba kwa kukubonya kubuko ni mbama ra maghu na vitemberu rizamie nandighi riseboagha; naro richabuka kufuma chwau hata chongo.

³⁶“BWANA uchakudwa chiaimweri na mzuri wako kumsaghue kughende kwa mbari kuseiichi oho, hata weke ndeyo; na aho kuchaitasa milungu mizima ya midi na ya magho.

³⁷Kuchaobolwa ni wandu, kuseko na kumenywa ni wandu wose andu BWANA uchaakughenja.

³⁸Kuchawa mbeu nyingi mbuwenyi, ela kuchakuwida viro vitinieri; kwa kukaia vichajighwa ni zighe.

³⁹Kuchawa mizabibu na kuialia, ela ndekuchaanywa divei hata kuwaya zabibu; kwa kukaia richajighwa ni kivunyu.

⁴⁰Kuchakaia na mizeituni isangenyi kwako kose, ela ndekuchaakushinga mavuda; kwa kukaia zeituni rako richaghughuduka.

⁴¹Kuchava wana wa womi na wa waka, ela ndewichaakaia wako; kwa kukaia wichadwalwa wunyika.

⁴²Midi yako, na vindo vako va mbuwenyi, vichajighwa ni zighe.

⁴³“Mghenyi omara-mara uko aghadi kwako, uchachuria kujoswa kukuchumba, na oho kuchaserwa.

⁴⁴Uo uchakukopesha, na oho ndekuchaamkopesha; uchakaia m'baa kwako na oho kuchakaia mtini.

⁴⁵Kuchawadwa ni njowe iri rose, hata rikunone na kukutotesha, kwa kukaia, ndekoremsikireghe BWANA Mlungu wako kwa kughiwadia malaghiro ghake na sharia rake iro orekulaghirieghe.

⁴⁶Njowe iri richakaia aighu konyu, na aighu ya wana wenyu sa alama na mashiniko kwa kala na kala.

⁴⁷BWANA Mlungu wako orekunekieghe vindo vose kwa wungi, na oho kukalegha kumdumikia kwa ngolo ya kuboilwa;

⁴⁸kwa wundu ugho, kuchawidumikia wamaiza wako, awo BWANA uchaawiduma kulwa na oho, kuko njala, na kau, kuko duu, sena kwasowekelwa ni vilambo vose. Nao uchakukoronga nandighi, hata umerie kukutotesha putu.

⁴⁹BWANA uchareda mbari kufuma kula ichelwa nakumoni; ni mbari iangue sa indu iburukagha, idedagha kiteto kusechimanyagha.

⁵⁰Ni mbari ing'etere, isene wughoma kwa mghosi angu mundu wa irika;

⁵¹nawo wichaja mfugho rako na vindo vako kulimie hata kwatoteshwa; ndewichaakusighia viro vako, angu wana wako wa ng'ondi; hata wimerie kukutotesha.

⁵²Wichakumaria mbai-mbai andenyi ya mizi yako yose, na mawurigha ghako ghimange ghiko ighu, agho korekusaghikagha nagho, ghichavuchulwa isangenyi kwako kose, ijo kunekwaghwa ni BWANA Mlungu wako.

⁵³“Na kwa wundu ghwa wasi kuchaapata ghomarilwa ni wamaiza wako chia rose, kuchaja wana wako weni wa womi na wa waka, awo kunekelo ni BWANA Mlungu wako.

⁵⁴Na mundu umoni ulelelo kwa ishima aghadi konyu, uchaima mruna vindo, na mkake wikundane na wana wake wasighwanya nawo,

⁵⁵hata ndechaamneka ungi wawo iyo nyama ya wana wake ujagha; kwa kukaia m'maiza wako uchaakumaria chia rose. Uchakuredia wasi, hata ndekuchaasigharilwa kindo chingi andenyi ya mizi yako yose.

⁵⁶Na muka umoni ulelelo kwa ishima aghadi konyu, usedimagha kughenda na chia angu udendere na kunyafua, uchaima mumi vindo umoni wikundane, na mwana wake wa womi na wa waka.

⁵⁷Chambo chake chifumagha na wana wake uwivagha, uchawija kivisonyi kwa kusowa kindo chingi, angu kwamarwa chia rose na kujishwa wasi ni m'maiza wako andenyi ya mizi yako.

⁵⁸“Kukalegha kulindia na kubonya malagho agha ghose gha sharia ghiandikilo andenyi ya chuo ichi; eri kupate kujiobua ijo irina ja BWANA Mlungu wako, jiko ibaa, jeobosha,

⁵⁹BWANA uchakuredia oho na kivalwa chako makorongo gha kighenyi ghibirie na makongo mabaa ghisesiagha.

⁶⁰Sena uchakuredia makongo ghose koreghiobuagha gha Misri, agho ghisedimagha kuboa.

⁶¹Wokoni BWANA uchareda kula wukongo na matiriro ghiseandikilo andenyi ya ichi chuo cha sharia kwa wungi, hata kwameria kutoteshwa putu.

⁶²Na seji morekoghe wengi sa nyerinyeri ra mlungunyi, mchasighwa watinieri; angu kuleghie kumsikira BWANA Mlungu wako.

⁶³Na sa iji koni erem'boieghe BWANA kum'bonyera mecha na kum'bonya mchurikie, huwo koni icham'boia kumnona na kumtotesha; nenyo mchainjwa isangenyi ijo mwawuyangia kujiwusa.

⁶⁴Nao uchamsaghisa aghadi ya wandu wose ndoenyi ii chia na ii chia; na aho mchaidumikia milungu mizima ya midi na ya magho, iyo msereiichighi hata weke ndeyo.

⁶⁵Ndekuchaapata andu kungi kohoresha kudimagha kukuwanga kwako aghadi ya iro mbari: ela BWANA uchakuneka ngolo ya kiture, na kusilwa kusowa kwa roho na akili.

⁶⁶Irangi jenyu jichakaia ndengonyi ngelo rose, nenyo mchachulwa ni kiture kio na dime; mchakaia mkiobua kifwa ngelo rose.

⁶⁷Kwa wundu ghwa wowa mchaakaia nagho aighu ya agho mchaakaia mkighiwona, mchakaia mkighamba nakesho, ‘Ndoe iswali!’ Na luma lwa kenyi mchaghamba, ‘Ndoe ielali!’

⁶⁸BWANA uchammbunja Misri na meli, icho charo nereghambieghe kukaia jingi ndemchaachibonya sena; na aho mchakuuza mmbeni kwa wamaiza mkaie wazumba wa womi na wa waka, ela mndungi ndechaamghua anduangi.”