Read TAITA BIBLE – Biblia Ilagho Jiboie Kwa Wandu Wose WUKUMBUSO 30 Bible Online

WUKUMBUSO 30 - TAITA BIBLE – Biblia Ilagho Jiboie Kwa Wandu Wose bible

WUKUMBUSO 30

¹“Idana nakuwikia wusaghui aghadi ya irasimio na njowe. Maza iri rose rikakupata ingelo kuko aghadi ya mbari rose iro BWANA Mlungu ukusasarie kwendekaia, kuchakumbuka wusaghui nikunekie.

²Mkaghaluka na kummburia BWANA Mlungu onyu na wana wenyu, kumsikira na kukatisha agho nimlaghiragha idime kwa ngolo renyu rose, na kwa roho renyu rose,

³BWANA Mlungu onyu uchamfuya wughoma. Uchammbunja mfume kwa iro mbari oremsaghisireghe, na kummbunjira mecha ghenyu sena.

⁴Hata ngera mwasaghisiro hata kutuonyi kwa ndoenyi, BWANA Mlungu onyu uchamtumbanya kufuma aho na kumreda,

⁵nao uchamreda andenyi ya isanga ijo jerekoghe ja weke ndeyo mpate kujiwusa; nao ucham'bonya mmbone nicha kuchumba, na mtalo ghwa wandu wenyu ghuchurikie kuchumba ghwa weke ndeyo.

⁶Sena BWANA Mlungu onyu uchaboisa ngolo renyu na ra wana wenyu, mpate kumkunda BWANA Mlungu onyu kwa ngolo renyu rose, na kwa roho renyu rose, eri mpate kukaia moyo.

⁷BWANA Mlungu onyu uchawiwasira wamaiza wenyu wimkorongie njowe iri rose.

⁸Nenyo mchamsikira BWANA Mlungu onyu sena, na kughiwadia malaghiro ghake ghose nimlaghiragha idime.

⁹BWANA Mlungu onyu ucham'bonya mmbone nicha loli-loli kwa kazi rose mchaaribonya; mchava wana wengi, mkaie na mfugho nyingi, na ndoe renyu richava kwa wungi. BWANA uchaboilwa sena kum'bonya mmbone mecha sa iji koni oreboiloghe kwa weke ndeyo,

¹⁰iji mwamsikira na kughiwadia malaghiro ghake na sharia. Mchamghalukia kwa ngolo renyu rose na kwa roho renyu rose.

¹¹“Angu agha malaghiro nimlaghiragha idime ndeghikurie hata ndeghiko kula nenyo.

¹²Ndeghiko mlungunyi hata mghambe, ‘Nani ujokagha mlungunyi wendediondia dipate kughisikira na kughibonya?’

¹³Hata ndeghiko kimonu cha bahari mghambe, ‘Nani uruwukagha bahari wendediondia dipate kughisikira na kughibonya?’

¹⁴Ela malagho gheeka aeni kaavui nenyo; gheeka memunyi konyu na ngolonyi konyu mpate kughibonya.

¹⁵“Ola idime nawika imbiri konyu wucha na wuwiwi; irangi na kifwa.

¹⁶Mkasikira malaghiro gha BWANA Mlungu onyu nimlaghiragha idime, kwa kumkunda BWANA Mlungu onyu na kubonya seji ukunde, na kughiwadia malaghiro ghake na sharia rake na mafundisho ghake, mchakaia moyo na kuchurikia; na BWANA Mlungu uchamrasimia isangenyi mujingiagha mujiwuse.

¹⁷Ela mkaghaluka na kuleghasikira, hata mghaluke na kuitasa milungu mizima, na kuidumikia,

¹⁸namghoria idime, mchatota putu; ndemchaadua luma isangenyi ijo mruwukagha Jordani kuendejingia na kujiwusa.

¹⁹Nawanga mlungunyi na ndoenyi rishuhudie aighu konyu idime kukaia, nameria kuwika imbiri konyu irangi na kifwa, irasimio na njowe; kwa huwo saghuonyi irangi eri inyo na kivalwa chenyu mkaie moyo.

²⁰Mumkunde BWANA Mlungu onyu; mumsikire na kuwadiana nao; angu kwa kubonya huwo, mchakaia na irangi, sena mchakaia na matuku mengi isangenyi ijo BWANA orewilaghirieghe weke ndeyo, Abrahamu, na Isaaka na Jakobo kukaia uchawineka.”