Read TAITA BIBLE – Biblia Ilagho Jiboie Kwa Wandu Wose WUKUMBUSO 31 Bible Online

WUKUMBUSO 31 - TAITA BIBLE – Biblia Ilagho Jiboie Kwa Wandu Wose bible

WUKUMBUSO 31

¹Musa ukachuria kughora na wandu wa Israeli,

²ukawizera, “Ini nakaia wa irika ja miaka ighana na mirongo iwi idime; sidimagha kuwuyamlongoza sena. Na BWANA wanizerie kukaia, siruwukagha Jordani.

³BWANA Mlungu onyu moni uchakiria na kuruwuka imbiri yenyu, nao ucharitotesha iro mbari riko imbiri konyu; eri mrisoke isanga jawo na Joshua uchamkiria, sa iji koni BWANA ughorie.

⁴BWANA uchawibonya sa iji koni orewibonyereghe Sihoni na Ogu, awo wazuri wa Waamori; seji orewitoteshereghe chiaimweri na isanga jawo.

⁵BWANA uchamneka wusimi aighu yawo, nenyo mchawibonya sa iji nimlaghirie.

⁶Mkaie mang'oni ghimange; msakewiobua, hata kukaia na kiture nawo; kwa kukaia ni BWANA Mlungu onyu wawuyaghendanya nenyo; ndechaamsigha hata kumuda anduangi.”

⁷Niko Musa ukammbanga Joshua imbiri ya wandu wa Israeli wose ukamzera, “Kukaie ing'oni jimange; kwa kukaia kuchaghendanya na awa wandu, mungie ijo isanga BWANA uwilaghirie weke ndee kukaia uchawineka, na oho kuchawineka.

⁸BWANA nuo ukiriagha, nao uchakaia andwamweri na oho; ndechaakusigha, hata kukuda anduangi; kusekambo ni chongo.”

⁹Nao Musa ukaiandika iyo sharia na kuwineka wakohani awo Walawi widukagha Sanduku ya ilaghano ja BWANA, na waghosi wose wa Israeli.

¹⁰Musa ukawilaghira huwu, “Kutua kwa kula miaka mfungade, ngelo elekia wandu sile, muwishomie wandu iji wakabonya Ndima ya Viwanda.

¹¹Muwishomie wandu wa Israeli wose iyo sharia wikisikira, ngelo wikwanyikagha imbiri ya BWANA Mlungu onyu andu uchaakusaghua wimtase.

¹²Muwikwanye wandu; womi, na waka na wanake, na mghenyi omara-mara uko andenyi ya mizi yawo, eri wipate kusikira na kukufundisha kumuobua BWANA Mlungu wawo, na kukulindia kughiwadia malagho ghose gha sharia ihi.

¹³Kwa chia ihi wana wawo wiseiichi wichasikira na kukufundisha kummanya BWANA Mlungu onyu ngelo yose wichakaia andenyi ya ijo isanga mruwukagha Jordani kujiwusa.”

¹⁴Nao BWANA ukamzera Musa, “Ola matuku ghako ghefwa ghalighisa. Wanga Joshua, muche andenyi ya Hema ekwania, nipate kummbika kazinyi.” Niko Musa na Joshua wikaghenda na kungia andenyi ya Hema ekwania.

¹⁵BWANA ukawoneka aho andenyi ya nguro ya iwingu, na iyo nguro ya iwingu erekoghe mnyangonyi ghwa hema.

¹⁶Niko BWANA ukamzera Musa, “Ola oho kwalighisa kufwa, na awa wandu wichasigha kukaia waloli kwapo kwa kuitasa milungu ya kighenyi ya ijo isanga andu wighendagha kukaia, nawo wichanisigha na kujinona ilaghano japo nerejibonyereghe nawo.

¹⁷Ituku ijo, nichajokwa ni machu aighu yawo, nani nichawisigha na kughaluka noko nisewiwone; nawo wichatoteshwa. Ngelo iyo, wichapatwa ni mawiwi mengi na kusumbuka, hata wivikie kumanya kukaia waapatwa ni agha mawiwi angu ini Mlungu wawo sikwanye nawo.

¹⁸Na loli ituku ijo nichaghaluka noko nisewiwone kwa wundu ghwa mawiwi ghawo, angu wighalukie na kuitasa milungu mizima.

¹⁹“Kwa huwo idana andika ulu lumbo, kuwifundishe wandu wa Israeli; lupate kunishuhudiagha aighu yawo.

²⁰Kwa kukaia ngameria kuwingira ijo isanga jinorie, nerelaghirieghe kuwineka weke ndee, na iji waja wikaghuda na kubanda, wichaghaluka na kuitasa milungu mizima; wichanimenya na kujinona ilaghano japo.

²¹Na iji wapatwa ni mawiwi na kusumbuka kungi, ulu lumbo luchakaia lukinishuhudia aighu yawo, (angu luchadua lukiborwa ni wandu wa kivalwa chawo) kwa kukaia namanya seji wikunde kubonya hata imbiri nisewingirie ijo isanga nilaghirie nichawineka.”

²²Niko Musa ukaandika ulu lumbo ijo ituku jeni, na kulufundisha wandu wa Israeli.

²³BWANA ukammbika Joshua mwana wa Nuni kazinyi na kughamba, “Kukaie ing'oni jimange; angu kuchawingira wana wa Israeli andenyi ya ijo isanga nilaghirie nichawineka; ini nichakaia andwamweri na oho.”

²⁴Nao iji Musa wameria kuandika chuonyi malagho ghose putu gha sharia ihi,

²⁵ukawilaghira Walawi awo weredukagha Sanduku ya ilaghano ja BWANA ukighamba,

²⁶“Wadenyi ichi chuo cha sharia, mchiwike mbai na mbai ya Sanduku ya ilaghano ja BWANA Mlungu onyu, chipate kukaia aho chikishuhudia aighu yenyu.

²⁷Angu naichi seji mghilikie; wandu msesikiragha. Kamanya mwawuyamlegha BWANA niko moyo dikwanye, ni kuchumba saki iji nafwa!

²⁸Nikwanyienyi waghosi wose wa vichuku venyu na wabaa wenyu, eri nipate kughora agha malagho wikisikira, na kuwanga mlungunyi na ndoenyi rikaie washahidi aighu yawo.

²⁹Angu namanya loli nyuma ya kufwa kwapo, mchazama na kuisigha nambai iyo chia neremlaghirieghe; na kwa matuku ghichagha mchapatwa ni mawiwi, angu mchabonya kiwiwi imbiri ya BWANA, na kwa kazi renyu, mcham'bonya ujoko ni machu.”

³⁰Niko Musa ukaghora malagho gha ulu lumbo hata ghikasia, ikwanyiko jose ja wandu wa Israeli jikisikiria: