Read TAITA BIBLE – Biblia Ilagho Jiboie Kwa Wandu Wose WUKUMBUSO 4 Bible Online

WUKUMBUSO 4 - TAITA BIBLE – Biblia Ilagho Jiboie Kwa Wandu Wose bible

WUKUMBUSO 4

¹Musa ukawizera wandu wa Israeli, “Msikire sharia rose nimfundishagha; mpate kukaia moyo, mngie na kujiwada ijo isanga BWANA Mlungu wa weke ndeyo umnekagha.

²Msechurie ilagho jingi aighu ya agho nimlaghiragha, hata msefunye ilagho jingi, mpate kughiwadia malaghiro gha BWANA Mlungu onyu agho nimlaghiragha.

³Mwawonie na meso ghenyu seji BWANA ubonyere aja Baal-peori;

⁴ela inyo morenughaneghe na BWANA Mlungu onyu, mwaduagha moyo hata idime.

⁵“Namfundishire sharia yose na malaghiro, sa iji koni BWANA Mlungu wapo unizerie; mpate kughibonya andenyi ya isanga mungiagha kujiwusa.

⁶Mughiwadie na kughibonya, angu agho nigho ghichaakaia hikima na kumanya konyu imbiri ya wandu; awo, iji wasikira sharia iri rose, wichaghamba, ‘Loli mbari ihi mbaa yawadie hikima na kumanya.’

⁷“Ni mbari iyao mbaa ikwanye na mlungu ghwawo kaavui seji BWANA Mlungu odu uko nesi ingelo dimmbangagha?

⁸Ni mbari iyao mbaa iko na sharia na malaghiro gha hachi sa agha namneka idime?

⁹Inyo mlindie, sena mseliwe iro maza muriwonie na meso ghenyu matuku ghose mchaakaia moyo. Murifundishe wana wenyu na weke wawayo

¹⁰seji morewonieghe iji morekoghe kimusi imbiri ya BWANA Mlungu onyu aja Mghondi ghwa Sinai ngelo orenizerieghe, ‘Nikwanyire wandu, nipate kuwibonya wisikire malagho ghapo, eri wipate kukufundisha kuniobua matuku ghose wichaakaia moyo ndoenyi; nawo wipate kuwifundisha wana wawo wokoni.’

¹¹“Muwighorie wana wenyu seji morekaieghe kimusi aisi ya ugho mghondi ghorefinikiroghe ni iwingu jikambie, na ikungughu ja mosi na lumu lwa modo lukumbikagha cha mawingunyi.

¹²Muwighorie seji BWANA oreghorieghe nenyo kufuma ahoeni modonyi; mkasikira lwaka, ela ndemorewonieghe fwana ingi, modesikira lwaka loni.

¹³Ukaghora nenyo seji iko suti mujiwadie ilaghano jake ijo oremlaghirieghe, iyo Memu Ikumi; ukaiandika aighu ya vishawalata viwi va magho.

¹⁴Ngelo iyo, BWANA ukanilaghira nimfundishe sharia na malaghiro, eri mpate kughibonya isangenyi ijo mwawuyaghenda kujiwada.

¹⁵“Iji BWANA oreghorieghe nenyo andenyi ya modo aighu ya Mghondi ghwa Sinai, ndemorewonieghe fwana ingi. Kwa huwo mkulindie mmbeni;

¹⁶mkumanye, msakebonya wuwiwi kwa kukuwachira fwana ya kindo chingi chiwonekagha chifwanane na mndwawomi angu muka;

¹⁷angu fwana ya nyamandu ingi iko ndoenyi, angu nyonyi ingi iko na mawawa gheburuka mbeonyi;

¹⁸angu kindo chingi chiavuagha andoenyi, angu fwana ya samaki ingi iko machinyi, ndoenyi nakosi.

¹⁹Sena mkulindie, isekaie iji mwawusira meso ghenyu cha mlungunyi na kuwona iruwa, mori na nyerinyeri, ijeshi jose ja mlungunyi nao mlaghalo kwa kuritasa na kuridumikia, navo ni vilambo BWANA Mlungu onyu uwinekie wandu wose wiko aisi ya mlungunyi kose.

²⁰Ela BWANA wammbwadie inyo, ukamfunya Misri modonyi ghwa iwiwi ja chuma; ukamfunya mpate kukaia wandu wake moni seji iko idime.

²¹Chiaimweri na agho, morenishekerieghe BWANA ukanibonyera machu, ukaghema angu siruwukagha Jordani kungia ijo isanga jighokie BWANA Mlungu onyu umnekagha jikaie ifwa jenyu.

²²Ini nichafuya andenyi ya isanga iji, sidimagha putu kuruwuka Jordani; ela inyo mcharuwuka mujiwade ijo isanga jighokie.

²³Mkulindie, msecheliwa ilaghano ja BWANA Mlungu onyu, ijo orebonyereghe nenyo, nao m'bonye fwana riwachilo rifwanane na kilambo chingi icho BWANA Mlungu onyu umkanie.

²⁴Angu BWANA onyu ni modo ghulunguragha; uo ni Mlungu uwadie iriso.

²⁵“Kukakaia isangenyi luma hata kughosie, kuve wana, na wana wive weke wawayo; kusebonye mawiwi kwa kuwacha mlimu ghufwananagha na kilambo icho chose imbiri ya BWANA Mlungu wako, kuchawusira machu ghake.

²⁶Nawanga mlungunyi na ndoenyi rishuhudie aighu yenyu idime, kukaia mchatota putu shwa wori andenyi ya ijo isanga kwawuyaruwuka Jordani kujiwada; ndemchaadua luma andenyi yaro, ela mchatoteshwa shwa wori.

²⁷BWANA uchamsaghisa aghadi ya wandu wa iro mbari, nenyo mchavuvuka watinieri.

²⁸Mchatasa milungu ya midi na magho ibonyero ni wadamu; isewonagha, hata kusikira; isejagha hata isenukilwagha.

²⁹Na aeni aho kuko, kuchamlola BWANA Mlungu wako, na kumpata iji kwamlola kwa ngolo yako yose na kwa roho yako yose.

³⁰Iji kwangilwa ni wasi, na kupatwa ni maza iri rose, kutua kuchamghalukia BWANA Mlungu wako na kumsikira.

³¹Angu BWANA Mlungu wako ni Mlungu wa wughoma; ndechaakusigha hata kukutotesha angu kujiliwa ilaghano orejibonyereghe na weke ndeyo, ijo orejibonyereghe kwa ighemi.

³²“Kotia malagho gha ngelo riidie, iro rerekoghe imbiri kusevalo, kufuma Mlungu waumba mdamu ndoenyi; lola kufuma iichia hata iichia wurumwengunyi kose, kuwone ngera jingi ilagho sa iji jabonyekie angu kusikirwa andu kungi.

³³Weko wandu wangi jingi wisikire mlungu ghungi ghukideda andenyi ya modo sena wikakaia moyo?

³⁴Angu ghoko mlungu ghungi jingi ghutimie kughenda na kuwusa wandu kufuma kwa mbari imu wikaie kwa chia ya matimo, na weke mwakilimbiti, na mashiniko, na kwa wuda, na kwa mkonu ghwa wusimi ghuwadie ndighi, na maza reobosha karakara na seji BWANA Mlungu onyu orebonyereghe Misri kwa wundu ghonyu mkiwona?

³⁵BWANA odekuwonyera huwo, eri kupate kumanya angu uo nuo Mlungu, na angu ndekuwadie ungi mzima uko sa uo.

³⁶Orekusighieghe kusikire lwaka lwake kufuma mlungunyi, eri upate kukufundisha; ukakusigha kuwone modo ghwake m'baa andoenyi, na oho kukalusikira lwaka lwake kufuma modonyi.

³⁷Na angu orewikundeghe weke ndeyo, oresaghueghe kivalwa chawo; ukakufunya Misri moni kwa ndighi rake mbaa.

³⁸Ukawinga mbari mbaa imbiri kwako riko na kudima kukuchumba oho, upate kukungira andenyi ya isanga jawo, jiwuye ifwa jako seji iko idime.

³⁹Kwa huwo kumanye kufuma idime, sena kuwike ngolonyi kwako kukaia BWANA ni Mlungu koighu mlungunyi na ndoenyi nakosi hata ndekuwadie mlungu ungi mzima anduangi.

⁴⁰Kwa huwo kuriwadie sharia rake na malaghiro ghake, agho nikulaghiragha idime, eri kupate kukaia nicha, na kivalwa chako kupate kukaia luma andenyi ya ijo isanga kunekwagha ni BWANA Mlungu wako kwa kala na kala.”

⁴¹Niko Musa ukaiwika mizi idadu iichia cha mashariki ya Jordani nakimonu,

⁴²eri mundu ukabwagha mmbao kwa ndengwa wiserechumbaneghe kiimbiri, ukimbirie aho, na kukira irangi jake.

⁴³Mizi iyo ni Bezeri ghuko kireti andu kwa wurindi, ghukaie kwa wundu ghwa kichuku cha Reubeni, na Ramothi ghuko Gileadi kwa wundu ghwa kichuku cha Gadi, na Golani ghuko Bashani kwa wundu ghwa kichuku cha Manase.

⁴⁴Ihi niyo sharia Musa orewinekieghe wana wa Israeli;

⁴⁵naro niro kanuni, na sharia, na malaghiro agho Musa orewighorieghe iji werefumieghe Misri,

⁴⁶wiko Jordani nakimonu, vololonyi kulangaya Beth-peori. Ijo nijo jerekoghe isanga ja Sihoni mzuri wa Waamori, uo orekoghe ukibonya nguma Heshboni. Musa na wana wa Israeli wikamsima iji werechieghe kufuma Misri.

⁴⁷Wikawada isanga jake na isanga ja Ogu mzuri wa Bashani; wazuri wawi wa Waamori, awo werekoghe wikikaia iichia cha mashariki Jordani nakimonu.

⁴⁸Isanga ijo jereshabukieghe kufuma Aroeri kuanane na luwaru lwa Moda ghwa Arnoni, hata kuvikia Mghondi ghwa Sirioni (nagho nigho Mghondi ghwa Hermoni.)

⁴⁹Sena ghorekoghe chiaimweri na Araba yose iichia cha mashariki ya Jordani hata kuvikia Bahari ya Araba, naisi ya lughongo lwa Pisga.