Read TAITA BIBLE – Biblia Ilagho Jiboie Kwa Wandu Wose WUKUMBUSO 8 Bible Online

WUKUMBUSO 8 - TAITA BIBLE – Biblia Ilagho Jiboie Kwa Wandu Wose bible

WUKUMBUSO 8

¹“Mlindie kuisikira sharia yose namlaghira idime eri mkaie moyo na kuchurikia; mngie na kujiwada ijo isanga BWANA orewilaghirieghe weke ndeyo kukaia uchawineka.

²Kumbuka iyo chia yose BWANA Mlungu oremghenjereghe kireti miaka mirongo ina ukimlongoza na kumtima ngera mchaiwadia memu yake angu ngera ndemchaaiwadia.

³Ukamfundisha kuida andenyi ya maza rikurie kwa kumsigha mkaie njala, ima ukamneka mana muje, iyo msereiichighi, hata na weke ndeyo wori; eri mpate kumanya angu mdamu ndekaiagha moyo kwa vindo veni anduangi, ela wadakaia moyo kwa kula ilagho jidedwagha ni BWANA.

⁴Nguwo rako nderererashukieghe, hata chwau rako ndererevimbieghe kwa iyo miaka mirongo ina anduangi.

⁵Kumbukenyi kukaia BWANA Mlungu onyu wadam'bonyera sa wana wake kwa kumkaba na kumfundisha.

⁶Kwa wundu ugho, mughiwadie malaghiro ghake; mughibonye mkimuobua.

⁷BWANA Mlungu onyu waawuyamghenja isanga icha; isanga ja meda ya machi, na ja mariso na ndoria ra machi ghiseagha vololonyi na mighondinyi.

⁸Ni isanga ja ngano na shairi; jiko na mbuwa ra mizabibu; zeituni, makomamanga na wuki.

⁹Ni andu mchaakaia mkija vindo visesiagha, andu msechaasowa kindo chingi; isanga jiko na magho gha chuma, na mighondi yaro, mwadima kukota shaba.

¹⁰Mchaja na kughuda; nenyo mchamkasa BWANA Mlungu onyu kwa wundu ghwa isanga icha umnekie.

¹¹“Mkulindie msemliwe BWANA Mlungu onyu kwa kuleghawadia memu yake yose nimlaghiragha idime.

¹²Isechekaia iji mwameria kuja na kughuda, na kuagha nyumba riboie na kukaia andenyi yaro,

¹³na iji mfugho renyu na feza na dhahabu na vose muko navo kuchurikia,

¹⁴Mzighane msekukase na kumliwa BWANA Mlungu onyu, uo oremfunyireghe isanga ja Misri nyumba ya wuzumba.

¹⁵Ukamghenja kuidia kireti cheobosha, chiko na choka ribirie na weke mwambandenyi, na andu kuomie kusene machi; nao ukamfunyira machi ighonyi jikurie kuu.

¹⁶Wamnekie mana kireti; vindo viserejiloghe ni weke ndeyo. Ukamfundisha kwa maza rikatie, ukamtima eri upate kum'bonyera mecha kutuonyi.

¹⁷Mkulindie mseghambe ngolonyi wei ni ndighi renyu na kudima konyu kwanekwa iyo mali.

¹⁸Mumkumbuke BWANA Mlungu onyu; angu uo nuo umnekagha ndighi reshama eri mpate kujikatisha ilaghano jake seji orewilaghirieghe weke ndeyo.

¹⁹Na iji mwamliwa BWANA Mlungu onyu, na kuinugha milungu mizima kuidumikia na kuitasa, namghoria loli idime iji, kukaia mchatota.

²⁰Mchatota karakara na iro mbari BWANA uribonyagha ritote imbiri konyu; nenyo mchatota, kwa kukaia mwaleghie kumsikira BWANA Mlungu onyu.