Read TAITA BIBLE – Biblia Ilagho Jiboie Kwa Wandu Wose JOHANE 1 Bible Online

JOHANE 1 - TAITA BIBLE – Biblia Ilagho Jiboie Kwa Wandu Wose bible

JOHANE 1

¹Aho kuzoenyi, Ilagho orekoghe aeni, na Ilagho orekoghe andwamweri na Mlungu, nao orekoghe ni Mlungu moni.

²Kufuma kuzoya, orekwanyeghe na Mlungu.

³Kwa chia yake Uo, vilambo vose vereumbiloghe ni Mlungu, hata kuseko Uo ndechereumbiloghe kilambo chingi anduangi.

⁴Andenyi kwake Uo korekoghe na Irangi, najo ijo irangi jerekoghe mwengere ghwa wadamu.

⁵Nagho mwengere ghwadalangala kirenyi, na kira ndechighusimie jingi anduangi.

⁶Mlungu oremdumieghe mndumu uwangwagha Johane,

⁷nao orechieghe kuwighoria wandu malagho gha ugho mwengere, awo wose wimsikiragha wipate kurumiria.

⁸Uo nderekoghe ugho mwengere anduangi, ela oredumiloghe ughushuhudie ugho mwengere.

⁹Ugho mwengere ghorekoghe ghwa loli, ghuchee wurumwengunyi kumlangalishira kula mdamu.

¹⁰Uo Ilagho orekoghe wurumwengunyi, na wurumwengu ghoreumbiloghe kwa chia yake Uo, elaima ndeghoremmanyireghe anduangi.

¹¹Orechieghe kwa isanga jake, ela wandu wake weni ndeweremmbusireghe anduangi.

¹²Elaima awa weremmbusireghe, wikarumiria kwake, orewinekieghe ndighi rewuya wana wa Mlungu.

¹³Awo werewurieghe wana wa Mlungu, si kwa ndighi ra kidamu, angu kwa ndighi ra mumbi, hata kwa lukundo lwa mdamu anduangi, ela kwa Mlungu.

¹⁴Nao Ilagho ukawuya mdamu uchue mvono na loli; ukakaia aghadi kodu, nesi dikaghuwona wubaa ghwake; nagho ni wubaa sa ghwa mwana wa ititi ufumie kwa Aba.

¹⁵Johane ukamghora ukighamba, “Uhu nuo moni neremghoragha ngighamba, ‘Kuchagha mndumu nyuma yapo uko m'baa kunichumba ini, angu orekoghe imbiri nisevalo.’”

¹⁶Kwa kuchua kwake, dapatire mvono isi diwose ghusesiagha jingi.

¹⁷Angu Mlungu orefunyireghe Sharia kwa chia ya Musa, ela mvono na loli verechieghe kwa chia ya Jesu Kristo.

¹⁸Jingi mndungi nderemmbonieghe Mlungu anduangi, ela Mwana wa ititi, uhu uko laghenyi kwa Aba, nuo ummanyishire.

¹⁹Ughu nigho wushuhuda ghwa Johane, iji wabaa wa Wayahudi weredumieghe Wakohani wabaa na Walawi kwake kufuma Jerusalemu kumkotia; “Welee, oho koko ani?”

²⁰Nao moni ukawishuhudia worinyi, ukighamba, “Ini suo ungi Kristo.”

²¹Nawo wikamkotia, “Da koko ani? Oho ko Elija?” Johane ukawitumbulia, “Ini suo ungi.” Wikamkotia, “Oho ni uja mlodi?” Ukaghamba, “Hata.”

²²Nao wikamzera, “Dighorie-cho ngera oho nani; dipate kuwighoria awo wididumie. Kwawuyaghamba oho ko ani?”

²³Johane ukawitumbulia, “Ini ne uja mundu malagho ghake ghereghoreloghe ni mlodi Isaya huwu: ‘Lwaka lwa mndumu lwasikirika kireti; ghoruonyi chia ya Bwana.’”

²⁴Wandu awo weredumiloghe ni Mafarisayo.

²⁵Wikamkotia Johane, “Ikakaia oho kuseko Kristo angu Elija, angu uja mlodi-lee, kwaki sena kubaputizagha?”

²⁶Nao Johane ukawitumbulia, “Ini nabaputiza kwa machi, ela koko umu kimusi aghadi konyu msemwichi.

²⁷Nao nuo uchagha nyuma yapo, nisefwane hata kufungua vadu vake.”

²⁸Maza iri rerebonyekieghe Bethania, kimonu cha moda ghwa Jordani andu Johane orekoghe ukibaputiza.

²⁹Nakesho yaro, Johane ukammbona Jesu ukimchea ukaghamba, “Zighanenyi Mwana wa ng'ondi wa Mlungu, uinjagha kaung'a ra wurumwengu.

³⁰Uhu nuo moni neremghoriagha, ‘Mndumu ucha nyuma yapo uko m'baa kunichumba ini, angu orekoghe imbiri nisevalo.’

³¹Ini seremmanyireghe ngera uo moni nani, ela nerechieghe ngibaputiza kwa machi, eri nim'bonye uo umanyike kwa Israeli.”

³²Nao Johane ukashuhudia ukighamba, “Neremmbonieghe Roho sa mbughi ukisea kufuma mlungunyi na kukaria aighu yake.

³³Hata ini seremmanyireghe; ela Uo orenidumieghe nibaputize kwa machi orenizerieghe huwu, ‘Uo mundu kuchaammbona Roho ukimseria kufuma mlungunyi na kukaria aighu kwake, nuo moni ubaputizagha kwa Roho Mweli.’

³⁴Nani nawonie, niko nashuhudia angu uhu ni Mwana wa Mlungu.”

³⁵Nakesho yaro sena Johane orekoghe kimusi ahoeni na wawi wa wanughi wake.

³⁶Ukamzighana Jesu ukighenda ukaghamba, “Zighanenyi Mwana wa Ng'ondi wa Mlungu.”

³⁷Waja wanughi wawi wikamsikira Johane ukighora, wikamnugha Jesu.

³⁸Jesu ukaghaluka ukawiwona wikimnugha, ukawikotia, “Niki mlolagha?” Wikamtumbulia, “Rabi (kutambua kwaro Mwalimu) kwakaiagha hao?”

³⁹Nao ukawizera, “Choonyi mmbone.” Nawo wikaghendanya wikawona andu ukaiagha, na ngelo iyo erekoghe sa saa ikumi, wikasindanya ijo ituku.

⁴⁰Umu wa waja weremsikireghe Johane ukishuhudia malagho gha Jesu ima wikamnugha, orekoghe Andrea, mruna Simoni Petro.

⁴¹Imbiri ukammbona mruna Simoni, ukamzera, “Dammbona Masiha.” (Kutambua kwaro ni Kristo.)

⁴²Ukamghenja kwa Jesu. Nao Jesu ukamzighana ukaghamba, “Oho ko Simoni mwana wa Johane, ela kuchawangwa Kefa” (kutambua kwaro ni Petro, angu Igho.)

⁴³Jesu ukawona uaghenda Galilaya, ukammbona Filipo ukamzera, “Kuninughe.”

⁴⁴Filipo orekoghe mundu wa Bethsaida muzi ghwa weke Andrea na Petro.

⁴⁵Filipo ukammbona Nathanaeli ukamzera, “Dammbona Uo Musa oremuandikieghe sharienyi, na wokoni oreandikiloghe andenyi ya vuo va walodi; nao ni Jesu mwana wa Josefu, mundu wa Nazareti.”

⁴⁶Nathanaeli ukamzera, “Idimika kilambo chingi chiboie chifume Nazareti?” Filipo ukamzera, “Choo kuwone.”

⁴⁷Nao iji Jesu wammbona Nathanaeli ukimchea, ukamghora ukighamba, “Wonenyi Muisraeli wa loli, usene wukalo ghungi andenyi kwake anduangi.”

⁴⁸Nathanaeli ukamzera, “Kwanimanya wada?” Jesu ukamtumbulia, “Nakuwonieghe aisi ya mtini imbiri Filipo usekuwangie.”

⁴⁹Nathanaeli ukamzera, “Mwalimu, oho ko Mwana wa Mlungu! Ko Mzuri wa Israeli!”

⁵⁰Jesu ukamzera, “Welee, kuarumiria angu nakuzera nakuwonieghe aisi ya mtini? Kuchawona maza mbaa kuchumba iri.”

⁵¹Nao ukachuria kughamba, “Namghoria loli, mchawona mlungunyi kukirughuka, na weke malaika wa Mlungu wikijoka na kusea aighu ya Mwana wa Mdamu.”