Read TAITA BIBLE – Biblia Ilagho Jiboie Kwa Wandu Wose JOHANE 12 Bible Online

JOHANE 12 - TAITA BIBLE – Biblia Ilagho Jiboie Kwa Wandu Wose bible

JOHANE 12

¹Matuku arandadu imbiri ya Pasaka, Jesu ukacha Bethania muzi ghwa Lazaro, uo oremrukishireghe kufuma kwa wafu.

²Nao aho wikamkaribisha kwa vindo va nakenyi, na Marita ukakaia ukidumika; ela Lazaro orekoghe umu wa waja werekoghe kidombo mezenyi andwamweri na Jesu.

³Nao Maria ukawada chupa ya marumba gha nardo nusu lita, nagho ni gha zoghori ya ighu na ndighi; ukamdiria Jesu maghu ghake, na kumuaghia kwa iridia jake. Nyumba yose ikanuka marumba mecha.

⁴Ela Juda Iskarioti, umu wa waja ikumi na wawi, (nao nuo moni uchaamfunya Jesu) ukaghamba,

⁵“Kwaki mavuda agha ghisauzwagha kwa pesa dinari maghana adadu na kunekwa wakiwa?”

⁶Oreghorieghe agho, si angu orewitalieghe wakiwa anduangi, ela ni iji orekoghe kitoi; na angu nuo oredwagha mfuko ghwa pesa orekoghe ukiiwa pesa rerekumbiloghe andenyi.

⁷Jesu ukaghamba, “Mlekenyi uhu muka; sighenyi ughiwike agho kwa wundu ghwa ituku ja mariko ghapo.

⁸Wakiwa moko nawo matuku ghose, ela ndemchaakaia na ini matuku ghose anduangi.”

⁹Nao iji Wayahudi wasikira angu Jesu orekoghe Bethania, wikaghenda aho; si kwa wundu ghwa Jesu tu, ela wokoni kwa wundu ghwa kummbona Lazaro uo Jesu oremrukishireghe kufuma kwa wafu.

¹⁰Na wokoni wakohani wabaa wikabonya njama em'bwagha Lazaro,

¹¹angu kwa wundu ghwake, Wayahudi wengi werekoghe wikiwisigha awo, na kumrumiria Jesu.

¹²Nakesho yaro, izungu ibaa ja wandu werechieghe kwa Ndima ya Pasaka, wikasikira angu Jesu orekoghe ukicha Jerusalemu.

¹³Wikafuma kummara wikidwa masawi gha mitende, na kukasa kwa lwaka wikighamba, “Hosana! Warasimilwa uo uchagha kwa irina ja Bwana. Nderasimilo Mzuri wa Israeli.”

¹⁴Nao iji Jesu wampata mwana wa punda, ukajoka aighu yake sa iji koni iandikilo,

¹⁵“Kusakeobua oho muzi ghwa Sioni; Ola Mzuri wako uacha, wajoka aighu ya mwana wa punda!”

¹⁶Ngelo iyo wanughi wake ndeweretambukiloghe ni agho, ela iji Jesu wameria kujoswa kwa wubaa, niko wikakumbuka angu maza iri rereandikiloghe aighu yake, na angu werebonyereghe agho kwa wundu ghwake.

¹⁷Waja wandu werekwanyeghe na Jesu ngelo oremrukishagha Lazaro kufuma kwa wafu, wereghorieghe iro maza rerebonyekieghe.

¹⁸Shekeria ya ijo izungu ibaa kummara ni angu weresikireghe kukaia Jesu orebonyereghe uo mwakilimbiti.

¹⁹Nao Mafarisayo wikazerana weni na weni, “Zighanenyi seji disedimagha kubonya ilagho jingi, wurumwengu ghose ghwamnugha.”

²⁰Korekoghe na Wagriki wamu aghadi ya wandu werechieghe Jerusalemu kutasa ngelo ya ndima.

²¹Wandu awo wikamchea Filipo mundu wa Bethsaida ya Galilaya, wikamzera, “Bwana, isi dakunde kummbona Jesu.”

²²Filipo ukaghenda na kumghoria Andrea, nawo wose wawi wikacha na kumghoria Jesu.

²³Nao Jesu ukawizera, “Ngelo emkasa Mwana wa Mdamu yameria kuvika.

²⁴Namghoria loli, ngera mbeu ya ngano isepotokagha andonyi na kufwa, ichakaia cheni iekeri, ela ikafwa ichava viro vingi.

²⁵Uo ujikundagha irangi jake uchajilaghasha, na uo uzamilwagha ni irangi jake aha wurumwengunyi, uchajiwika hata irangi ja kala na kala.

²⁶Uo ose ukundagha kunidumikia, ni suti uninughe ini, na andu nichaakaia ini, nikokoni na mdumiki wapo uchaakaia wori; mndungi ukanidumikia, uo moni uchabonyerwa ishima ni Aba.”

²⁷“Idana ngolo yapo yaja wasi. Nighora wada? Niaghora, ‘Aba kunikire na ihi ngelo?’ Ii hata, nedecha kwa wundu ghwa ihi ngelo.

²⁸Aba, jikase irina jako.” Nao lwaka lukacha kufuma mlungunyi, “Nameria kujikasa sena nichajikasa.”

²⁹Wandu werekoghe kimusi wikalusikira ulo lwaka, na wamu waro wikaghamba, “Ni lukuwa lwadeda.” Wazima wikaghamba, “Malaika waghora nao.”

³⁰Ela Jesu ukawizera, “Lwaka ulu ndeluchee kwa wundu ghwapo ini, ela kwa wundu ghonyu.

³¹Idana ngelo ya wurumwengu ughu kutanywa yavika, idana m'baa wa wurumwengu ughu uchakumbwa noko.

³²Nani ngameria kujoswa aighu ya ndoenyi, nichawiruda wandu wose cha kwapo.”

³³Agha oreghighorieghe kwa kuwonyera ni kifwa chifwane wada uchaafwa.

³⁴Nao ijo izungu jikamtumbulia, “Isi daghorelwa ni Sharia edu angu Kristo uchadua kwa kala na kala. Yakaia wada oho kughora, ‘Suti Mwana wa Mdamu ujoso aighu?’ Uo Mwana wa Mdamu nani?”

³⁵Jesu ukawitumbulia, “Mwengere ghoko andwamweri nenyo kwa ngelo vui eni. Ghendenyi iji muko na ugho mwengere, msecheserelwa ni kira, angu uo ughendagha kirenyi, ndemanyagha andu ughendagha anduangi.

³⁶Iji muko na ugho mwengere mughurumirie; mpate kuwuya wana wa mwengere.” Nao nyuma ya kughora malagho agho, Jesu ukaghenda chia yake, ukakuvisa, na kukaia kula nawo.

³⁷Hata ngera Jesu orebonyereghe awa weke mwakilimbiti wose imbiri yawo, ela ndewererumirieghe kwake anduangi,

³⁸edeeka huwo eri malagho ghereghoreloghe ni mlodi Isaya ghipate kukatia: “Bwana, nani oreghirumirieghe malagho ghedu? Na ndighi ra Bwana rerewonyeroghe kwani?”

³⁹Kwa huwu ndeweredimieghe kurumiria, angu Isaya waghora sena:

⁴⁰“Mlungu wawifunga meso ghawo, na kurikurisha akili rawo eri meso ghawo ghisepate kuwona, na akili rawo risetambukilo, wisechenighalukia, nipate kuwiboisa.”

⁴¹Isaya oreghorieghe malagho agha angu oreghuwonieghe wubaa ghwa Jesu, nao ukaghora malagho ghake.

⁴²Elaima sena, wengi wa vilongozi wa Wayahudi weremrumirieghe Jesu; ela kwa wundu ghwa Mafarisayo, ndewereghorieghe worinyi anduangi, angu wereobueghe kuwingwa sunagoginyi;

⁴³sena angu werekundieghe kukaswa ni wadamu kuchumba kukaswa ni Mlungu.

⁴⁴Nao Jesu ukaghora kwa lwaka lubaa, “Mndungi ukanirumiria ini, ndenirumiriagha ini tu, ela wamrumiria uo orenidumieghe.

⁴⁵Na uo uniwonagha ini, wammbona uo orenidumieghe wori.

⁴⁶Ini nachee kukaia mwengere wurumwengunyi, eri uhu unirumiriagha usesigharike kirenyi.

⁴⁷Uo usikiragha ilagho japo nao ndejiwadagha, simtanyagha anduangi; angu ini serechieghe kughutanya wurumwengu, ela kughukira.

⁴⁸Uo unileghagha ini, nao ndewadagha malagho ghapo, oko na umu umtanyagha. Ilagho jija nijighorie, nijo jichaakaia mtanyi wake ituku ja kutua mbai.

⁴⁹Angu sereghorieghe kwa nguma rapo reni anduangi, ela Aba orenidumieghe nuo oreninekieghe momu, nidede ghiao, na nighore ghiao.

⁵⁰Nani namanya angu momu ghwake ni irangi ja kala na kala. Kwa huwu agho nighighoragha ni agho gheni Aba orenilaghirieghe.”