Read TAITA BIBLE – Biblia Ilagho Jiboie Kwa Wandu Wose JOHANE 15 Bible Online

JOHANE 15 - TAITA BIBLE – Biblia Ilagho Jiboie Kwa Wandu Wose bible

JOHANE 15

¹“Ini ne mzabibu ghwa loli, na Aba nuo mlimi waro.

²Uo wadainja kula lumbashu andenyi kwapo lusevagha matunda, na kula lumbashu luvagha matunda wadaluboisa luchurie kuva matunda.

³Inyo mwameria kuela kwa wundu ghwa jija ilagho neremghorieghe.

⁴Kaienyi andenyi kwapo, nani nikaie andenyi konyu. Sa iji koni lumbashu lusedimagha kuva matunda loni, ngera lusekaie andenyi ya mzabibu, wokoni na inyo ndemdimagha kuva matunda ngera msekaie andenyi kwapo anduangi.

⁵“Ini ne mzabibu, na inyo mo mbashu. Uo ukaiagha andenyi kwapo na ini andenyi kwake, nuo moni uvagha matunda mengi; angu ndemdimagha kubonya ilagho jingi kuseko na ini.

⁶Mndungi usekaiagha andenyi kwapo, wadadaghwa shighadi sa lumbashu, nao waoma. Mbashu sa iro radasholwa rikumbo modonyi na kukorwa.

⁷Mkakaia andenyi kwapo, na malagho ghapo ghikakaia andenyi konyu, mchalomba icho chose mkundagha nenyo mchanekwa.

⁸Aba uchakaswa mkava matunda mengi, nenyo mchawoneka kukaia moko wanughi wapo.

⁹Ini namkunda inyo sa iji Aba orenikundieghe. Kaienyi andenyi ya lukundo lwapo.

¹⁰Iji mwaiwadia memu yapo mchakaia andenyi ya lukundo lwapo; wokoni seji ini niiwadie memu ya Aba na kukaia andenyi ya lukundo lwake.

¹¹“Namghoria malagho agha, eri kuboilwa kwapo kukaie andenyi konyu, na kuboilwa konyu kukate.

¹²Ughu nigho momu ghwapo, mkundane mmbeni na mmbeni sa iji koni nimkunde.

¹³Ndekuwadie lukundo lungi luchumbie ulu, lwa mundu kujifunya irangi jake kwa wundu ghwa waghenyi wake.

¹⁴Inyo moko waghenyi wapo mkabonya agho nimlaghiragha.

¹⁵Simmbangagha wadumiki sena, angu mdumiki ndemanyagha agho bwana wake ubonyagha anduangi. Ela ini nammbanga waghenyi wapo, angu namgorie malagho ghose nereghisikireghe kwa Aba.

¹⁶Inyo ndemorenisaghueghe ini anduangi, ela ni ini neremsaghueghe inyo, na kumduma mwende muve matunda, matunda ghiduagha; eri icho chose mchaalomba kwa Aba kwa irina japo umneke.

¹⁷Kwa huwu momu ghwapo konyu ni ughu: mkundane mmbeni na mmbeni.

¹⁸“Wurumwengu ghukazamilwa ni inyo, mwaichi angu ghorezoeghe kuzamilwa ni ini imbiri ya kuzamilwa ni inyo.

¹⁹Ngera modeeka wandu wa wurumwengu, kumangu wurumwengu ghwamkunda sa wandu wake; ela kwa kukaia neremsaghueghe kufuma wurumwengunyi, niko mseko wa wurumwengu; kwa wundu ughu, wurumwengu ghwazamilwa ni inyo.

²⁰Jikumbukenyi jija ilagho neremghorieghe, ‘Mdumiki ndekaiagha m'baa kuchumba bwana wake.’ Ngera werenitiririeghe ini, wichamtirira na inyo wori; ngera werejiwadieghe ilagho japo, wichajiwadia na jenyu wori.

²¹Ela wicham'bonyera maza iri rose kwa wundu ghwapo, angu ndewimwichi uo orenidumieghe anduangi.

²²Ngera serechieghe na kughora nawo, kumangu ndewiwadie kaung'a; ela idana ndewiwadie jekudederia kwa wundu ghwa kaung'a yawo.

²³Uo uzamilwagha ni ini, wadazamilwa ni Aba wori.

²⁴Ngera serechieghe na kuribonya iro kazi mndungi jingi useribonyere, kumangu ndewiwadie kaung'a; ela idana wawonie agha nighibonyere, wikazamilwa ni ini, hata na Aba wori.

²⁵Ela agha ghakaia, ghaja ghiandikilo Sharienyi kwawo ghipate kukatia, ‘Werezamiloghe ni ini duu.’

²⁶“Ela iji wacha uja Mtesia, uo nichaamduma konyu kufuma kwa Aba, nao nuo Roho wa loli ufumagha kwa Aba, Uo uchanishuhudia ini.

²⁷Nenyo wori mo washahidi, kwa kukaia morekwanyeghe na ini kufuma imbiri.