Read TAITA BIBLE – Biblia Ilagho Jiboie Kwa Wandu Wose JOHANE 19 Bible Online

JOHANE 19 - TAITA BIBLE – Biblia Ilagho Jiboie Kwa Wandu Wose bible

JOHANE 19

¹Niko Pilato ukamfunya Jesu udamo na viboko.

²Na masikari wikaluka kirumbu cha minjwa wikammbikiria chongonyi kwake, wikamrusha ijoho ja rangi ya zambarau;

³wikamchea wikighamba, “Kuduo moyo ee Mzuri wa Wayahudi.” Wikamkaba na chui.

⁴Nao Pilato ukafuma shighadi sena ukawizera, “Ola hoyo namfunya shighadi konyu, mpate kumanya angu ini siwonie ikosa jingi kwake anduangi.”

⁵Nao Jesu ukafuma shighadi warwa kirumbu cha minjwa na ijoho ja rangi ya zambarau, Pilato ukawizera, “Mzighanenyi uo mundu!”

⁶Nao iji wakohani wabaa na walindiri wammbona Jesu wikaghamba kwa chwaka mbaa, “Msulubishe! Msulubishe!” Pilato ukawizera, “Mmbwadenyi mumsulubishe mmbeni angu ini siwonie ikosa jingi kwake anduangi.”

⁷Wayahudi wikamtumbulia, “Isi deko na sharia, na kunughana na sharia iyo yamfwana ufo, angu orekubonyereghe moni kukaia Mwana wa Mlungu.”

⁸Nao iji Pilato wasikira malagho agho, ukachuria kuobua.

⁹Ukangia sena andenyi ya praetoriumu ukamkotia Jesu, “Welee, kwafuma hao?” Ela Jesu nderetumbulieghe ilagho jingi anduangi.

¹⁰Nao Pilato ukamzera, “Ndekunitumbuliagha? Ndekumanyire angu neko na nguma rekufungua, sena neko na nguma rekusulubisha?”

¹¹Jesu ukamzera, “Oho ndakwakaiagha na nguma ringi aighu yapo ngera kuserenekeloghe ni Mlungu. Kwa wundu ughu, uo wanireda kwako nuo uko na kaung'a mbaa kuchumba.”

¹²Nao kufuma aho Pilato ukakaia ukilola chia emfungua; ela Wayahudi wikachuria kughora kwa chwaka mbaa, “Kukamlekeria uo mundu, ndekuko mghenyi wa Kaisari anduangi; kula mundu ukubonyagha moni mzuri, wadasimana na Kaisari.”

¹³Nao iji Pilato wasikira agho, ukamreda Jesu shighadi, ukasea kidombo aighu ya kifumbi cha kutanya chiwangwagha “Sakafu ya Magho.” (Kiebrania ni Gabatha).

¹⁴Erekoghe sa saa ya karandadu, najo ni Ituku ja Kukutumbanya kwa Pasaka; Pilato ukawizera Wayahudi, “Mzighanenyi Mzuri onyu.”

¹⁵Wikawusira chwaka rawo, “Mwinje noko! Mwinje noko! Msulubishe!” Pilato ukawizera, “Nimsulubishe Mzuri onyu?” Wakohani wabaa wikatumbulia, “Isi ndediwadie mzuri ungi, ela Kaisari moni.”

¹⁶Nao Pilato ukamfunya kwawo usulubisho. Nawo wikammbwada Jesu.

¹⁷Nao ukafuma ukighuduka msalaba ghwake, wikabusa andu kuwangwagha, “Andu kwa Ngoma ya Chongo” (kwa Kiebrania ni Golgotha.)

¹⁸Ahoeni wikamsulubisha, andwamweri na wandu wamu wawi; umu ii chia na umu ii chia na Jesu aghadi.

¹⁹Pilato oreandikieghe iandiko ukajiwika aighu ya msalaba jighambagha, “JESU WA NAZARETI, MZURI WA WAYAHUDI.”

²⁰Wayahudi wengi wikajishoma, angu andu Jesu oresulubishiroghe korekoghe kaavui na muzi. Najo jereandikiloghe kwa Kiebrania, Kilatini, na Kigriki.

²¹Nao wakohani wabaa wikamzera Pilato, “Kusakeandika ‘Mzuri wa Wayahudi,’ ela ‘Uhu mundu oreghorieghe, Ini ne Mzuri wa Wayahudi.’”

²²Pilato ukawitumbulia, “Icho naandika nameria kuchiandika.”

²³Hata iji masikari wameria kumsulubisha Jesu, wikariwusa nguwo rake na kuriwagha mafungu ana, kula asikari na ifungu jake. Wikaiwusa na kanju yake, nayo erelukiloghe kuseko na kushonwa kungi.

²⁴Masikari wikazerana weni na weni, “Disakeirashua, ela dikabe kura ikaia yani.” Agha gherekaieghe eri maandiko ghikatie ghighambagha, “Werewaghanyireghe nguwo rapo, na kanju yapo wikaikabia kura.” Huwo niko awo masikari werebonyereghe.

²⁵Kaavui na msalaba ghwa Jesu werekaieghe kimusi mae, mruna mae, Maria mkake Kleopa, na Maria Magdaleni.

²⁶Nao iji Jesu wammbona mae wikwanye kimusi na uja mnughi oremkundieghe, ukamzera mae, “Mao, zighana mwana wako hoyo!”

²⁷Ukamzera uja mnughi, “Zighana mayo hoyo!” Na kufuma ngelo iyo uja mnughi ukamdwa cha mzinyi kwake.

²⁸Nyuma ya agha, Jesu ukimanya angu maza rose ramerelwa eri maandiko ghikatisho ukaghamba, “Naoma.”

²⁹Aho korekoghe na bakuli ichue siki. Nao wikawusa sponji, wikaingira andenyi ya siki, wikaifunga mdonyi ghwa hisopu, wikamjosera momunyi kwake.

³⁰Nao iji Jesu waitoa iyo siki, ukaghamba, “Yasia.” Ukaghoghomesha chongo chake ukaifunya roho yake.

³¹Erekoghe mramko kasanu, Ituku ja Kukutumbanya. Eri ija mimbi isekaie misalabenyi ituku ja Sabato, angu iyo Sabato erekoghe ituku ibaa, Wayahudi wikamlomba Pilato angu maghu ghawo ghichikanyo, ija mimbi ipate kuinjwa noko.

³²Nao masikari wikacha wikamchikanya maghu uja wa imbiri na uja wa kawi.

³³Ela iji weremchieghe Jesu, wikammbona angu wameria kufwa. Kwa huwu ndeweremchikanyireghe maghu ghake anduangi.

³⁴Ela asikari umu ukamdunga luwarunyi kwake na ifumu, nao shwa wori ikafuma bagha na machi.

³⁵Uhu uwonie maza iri ni mshahidi, na wushuhuda ghwake ni ghwa loli, sena wamanya wori uaghora loli, eri inyo mpate kurumiria.

³⁶Agha gherebonyekieghe, eri maandiko ghikatisho ghighambagha, “Indi jake jingi ndejichaachikanywa anduangi.”

³⁷Na sena seji maandiko ghaghora andu kuzima, “Wandu wichamzighana uo weremdungieghe.”

³⁸Nao nyuma ya maza iri, Josefu mundu wa muzi ghwa Arimatea, ukamlomba Pilato rusa eghuinja mumbi ghwa Jesu. (Josefu orekoghe mnughi wa Jesu kwa kiviso angu orewiobueghe wabaa wa Wayahudi.) Pilato ukamneka, nao ukaghenda na kughuinja mumbi ghwa Jesu.

³⁹Na wokoni Nikodemo, uo imbiri oremghendieghe Jesu nakio, ukareda maranganyo gha manemane na ubani sa kilo mirongo idadu.

⁴⁰Nao wikaghuwada mumbi ghwa Jesu, wikaghurighiria nguwo ya kitani, chiaimweri na marumba kunughana na mzango ghwa Wayahudi ghorika.

⁴¹Andu aho Jesu oresulubishiroghe, korekoghe na mbuwa erekoghe na kaburi mbishi jingi iserikilo mndungi anduangi.

⁴²Kwa wundu ghwa ituku ja Wayahudi ja Kukutumbanya, na angu kina chija cherekoghe kaavui, wikammbika Jesu aho.