Read TAITA BIBLE – Biblia Ilagho Jiboie Kwa Wandu Wose JOHANE 20 Bible Online

JOHANE 20 - TAITA BIBLE – Biblia Ilagho Jiboie Kwa Wandu Wose bible

JOHANE 20

¹Nao Ituku ja Njumwa kokio, ndoe isetambukie, Maria Magdaleni ukaghenda kaburinyi; ukajiwona igho jainjwa mnyangonyi ghwa kaburi.

²Nao ukawuya na iseghe, ukawighoria Petro na uja mnughi orekundoghe ni Jesu ukighamba, “Wamfunya Bwana kaburinyi, nesi ndedimanyire andu wammbika anduangi.”

³Nao Petro na uja mnughi mzima wikaghenda cha kaburinyi.

⁴Wikakimbia na iseghe wose wawi, na uja mnughi mzima ukamwida Petro ukakaia wa imbiri kuvika kaburinyi.

⁵Nao ukaghomeka ukasungia andenyi kaburinyi, ukariwona nguwo ra kitani orerighiriloghe naro, ela nderengirieghe andenyi anduangi.

⁶Niko Simoni Petro ukacha, ukangia kaburinyi. Ukawona rija nguwo ra kitani riko andonyi,

⁷na chija kitambaa cherefungiloghe chongonyi kwa Jesu cherekuchiroghe na kuwikwa chiaro.

⁸Niko uja mnughi mzima wori, uo orezoeghe kuvika, ukangia ukawona, ukarumiria.

⁹Angu werekoghe wisetambukilo kande ni maa ndiko agho ghighambie angu suti uruke kufuma kwa wafu.

¹⁰Nao awo wanughi wikawuya cha mzinyi.

¹¹Maria orekoghe kimusi shighadi ya kina ukilila. Hata iji orekoghe ukilila ukasungia andenyi ya kina,

¹²ukawona weke malaika wawi wirwae nguwo ra chokwa, wasea kidombo andu mumbi ghwa Jesu ghorekoghe, umu cha chongonyi, na umu cha maghunyi.

¹³Nao wikamkotia, “Wele muka, kuliliaki?” Ukatumbulia, “Ni iji wamwinja Bwana wapo, nani simanyire andu wammbika anduangi.”

¹⁴Nao ukighora agho ukaghaluka na nyuma ukammbona Jesu uko kimusi aho, ela nderemmanyireghe ngera ni Jesu anduangi.

¹⁵Jesu ukamzera, “Wele muka, kuliliaki? Nani kumlolagha?” Nao Maria ukimririkanya kukaia mlimi ukamzera, “Bwana, ngera ni oho kwamfunya, nighorie ni hao kwammbika, nani nichammbusa.”

¹⁶Jesu ukamzera, “Maria!” Maria ukaghaluka ukamzera kwa Kiebrania, “Rabboni!” (kutambua kwaro “Mwalimu.”)

¹⁷Jesu ukamzera, “Kusakeniwada, angu sijokie kande kwa Aba, ela ghenda kwa wanidu kuwighorie niajoka kwa Aba na Aba onyu; kwa Mlungu wapo na Mlungu onyu.”

¹⁸Maria Magdaleni ukaghenda ukawighoria waja wanughi angu wammbona Bwana, na seji wamghoria agho malagho.

¹⁹Luma lwa kenyi lwa jija ituku jeni ja Njumwa, wanughi werekoghe wakwanyika andenyi ya nyumba, na minyango yameria kurughwa kwa wundu ghwa kuwiobua Wayahudi. Jesu ukacha, ukakaia aghadi kwawo ukawizera, “Sere ndeikaie konyu.”

²⁰Uendaghora agho, ukawiwonyera mikonu yake, na luwaru lwake. Niko wikaboilwa kwa kummbona Bwana.

²¹Jesu ukawizera sena, “Sere ndeikaie konyu. Sa iji koni Aba orenidumieghe ini, niko koni namduma inyo.”

²²Uendaghora agho, ukawikuya miruke ukawizera, “Wusenyi Roho Mweli.

²³Iji mwalekia wandu kaung'a rawo, wialekelwa na iji msewilekie, ndewilekelwaghwa anduangi.”

²⁴Tomasi, nao ni umu wa waja wanughi ikumi na wawi, (uwangwagha Masa) nderekwanyeghe na wambao iji Jesu orechieghe.

²⁵Waja wanughi wambao wikamzera, “Dammbona Bwana!” Tomasi ukawizera, “Ngera nisewonie na kuriadada alama ra misumari vikotonyi kwake, sena ningire mkonu ghwapo luwarunyi kwake, sichaarumiria anduangi.”

²⁶Nao nyuma ya matuku wunyanya, wanughi wake werekoghe wakwanyika andwamweri sena, na Tomasi orekwanyeghe nawo. Minyango erekoghe irughie, ela Jesu ukangia, ukakaia kimusi aghadi kwawo ukaghamba, “Sere ndeikaie konyu.”

²⁷Nao ukamzera Tomasi, “Reda chala chako kuvizighane vikoto vapo, reda mkonu ghwako kughungire luwarunyi kwapo. Kusakekaia mundu userumiriagha, ela uo urumiriagha!”

²⁸Nao Tomasi ukamtumbulia, “Bwana wapo, na Mlungu wapo!”

²⁹Jesu ukamzera, “Kuarumiria angu kwaniwona? Warasimilwa awa wirumiriagha wisewonie.”

³⁰Jesu orebonyereghe weke mwakilimbiti walazi imbiri ya wanughi wake, wiseandikilo aha.

³¹Ela agha gheandikwa, inyo mpate kurumiria angu Jesu ni Kristo, Mwana wa Mlungu; na kwa kurumiria kwake, mpate kukaia na irangi kwa irina jake.