Read TAITA BIBLE – Biblia Ilagho Jiboie Kwa Wandu Wose JOHANE 21 Bible Online

JOHANE 21 - TAITA BIBLE – Biblia Ilagho Jiboie Kwa Wandu Wose bible

JOHANE 21

¹Nyuma ya agho, Jesu ukawifutukia wanughi wake mbai na mbai ya ndiwa ya Tiberia. Nao ukakuwonyera huwu:

²Simoni Petro, Tomasi (uwangwagha Masa), Nathanaeli mundu wa Kana ya Galilaya, wana wa Zebedayo, na wanughi wake wawi sena, werekoghe chia imweri.

³Simoni Petro ukawizera, “Niaendawada samaki.” Nawo wikamtumbulia, “Nesi wori diaendanya.” Nao wikaghenda na kungia ishuonyi, ela kio chija ndewerewadieghe samaki ingi.

⁴Iji ndoe yazoya kuela, Jesu ukakaia kimusi mbai na mbai ya ndiwa, ela wanughi ndeweremmanyireghe anduangi.

⁵Jesu ukawikotia, “Wanake, mwawada samaki ringi?” Wikatumbulia, “Hata!”

⁶Ukawizera, “Kumbenyi nyavu chia ya mkonu ghwa kiwomi ghwa ishua, nenyo mchapata.” Nao wikaikumba, nawo ndeweredimieghe kuiruda sena kwa wundu ghwa wungi ghwa samaki.

⁷Nao uja mnughi orekundiloghe ni Jesu ukamzera Petro, “Ni Bwana!” Simoni Petro uendasikira angu ni Bwana, ukakufunga nguwo yake, (angu orekoghe wafunya nguwo rake) ukarama cha machinyi.

⁸Ela wanughi wazima werekoghe wikicha na ishua, wikiiruda ija nyavu ichue samaki, angu ndewerekoghe kula na ndoenyi anduangi, ngera sa wukula ghwa meta ighana.

⁹Wiendavika ndoe iomie, wikawona modo ghwa maka, na samaki yawikwa aighu yaro, na mkate.

¹⁰Jesu ukawizera, “Redenyi samaki rimu iro mwariwada idakoni.”

¹¹Nao Simoni Petro ukajoka ishuonyi, ukairuda ija nyavu hata andoenyi, ichuagha samaki mbaa ighana na mirongo misanu na idadu. Hata ngera rerekoghe nyingi huwo, nyavu ndeererashukieghe anduangi.

¹²Jesu ukawizera, “Choonyi mdambuo momu.” Ndekorekoghe na mnughi ungi oredimieghe kumkotia wei, “Oho nani?” Angu weremmanyireghe kukaia ni Bwana.

¹³Jesu ukacha ukaghuwada mkate ukawineka, na samaki wokoni.

¹⁴Iji ni indo ja kadadu Jesu orekuwonyereghe uo moni kwa wanughi wake nyuma ya kuruka kufuma kwa wafu.

¹⁵Nao iji wameria kuja, Jesu ukamzera Simoni Petro, “Wele Simoni, mwana wa Johane, kwanikunde kuchumba awa?” Ukatumbulia, “Ee Bwana, oho kwaichi angu nakukunde.” Jesu ukamzera, “Kuzighaneghee wana wa ng'ondi wapo.”

¹⁶Jesu ukamkotia sena indo ja kawi, “Wele Simoni mwana wa Johane kwanikunde?” Ukatumbulia, “Ee Bwana, oho kwaichi angu nakukunde.” Jesu ukamzera, “Lindia ng'ondi rapo.”

¹⁷Jesu ukamkotia sena indo ja kadadu, “Wele Simoni mwana wa Johane, kwanikunde?” Petro ukangilwa ni wasi angu oremkotereghe indo ja kadadu, kwanikunde? Ukamzera, “Bwana oho kwavimanya vilambo vose, kwaichi angu nakukunde.” Jesu ukamzera, “Kuzighaneghee ng'ondi rapo.

¹⁸Nakughoria loli, iji korekoghe mdawana, korekufungieghe kumoni mkowa ghwako, na kughenda andu uko kose korekundieghe; ela iji kwaghosia, kuchaighorua mikonu yako, na mundu mzima uchakufunga na kukudwa andu kusekunde.”

¹⁹Kwa kughora huwu, Jesu orekoghe ukiwonyera seji Petro uchaafwa kwa kumredia Mlungu wubaa. Nao ukamzera, “Ninughe!”

²⁰Nao Petro ukazighana na nyuma ukammbona uja mnughi mzima orekundiloghe ni Jesu ukinugha-ni uja mnughi orekoghe kaavui na Jesu ngelo ya vindo va nakenyi ukimkotia Jesu, “Bwana, nani ukufunyagha?”

²¹Nao iji Petro wammbona ukamkotia Jesu, “Bwana, umundu uo ni wada?”

²²Jesu ukamzera, “Ngera nakunda ukaie moyo hata nawuya, ni ilaghoki kwako? Kuninughe ini.”

²³Nao malagho ghikaereshwa kwa awo wanidu wei uja mnughi ndechaafwa anduangi. Ela Jesu nderemzerieghe wei ndechaafwa anduangi, ela odeghora, “Ngakunda ukaie moyo hata nawuya ni ilaghoki kwako.”

²⁴Uhu nuo uja mnughi ushuhudiagha maza iri, na kuriandika. Nesi damanya angu agho ughighorie ni gha loli.

²⁵Koko na maza nyingi zima Jesu oreribonyereghe. Naro ngera raandikwa rose imu imu, niaghesha hata wurumwengu ndaghwadimagha kukata vuo vichaandikwa anduangi.