Read TAITA BIBLE – Biblia Ilagho Jiboie Kwa Wandu Wose JOHANE 3 Bible Online

JOHANE 3 - TAITA BIBLE – Biblia Ilagho Jiboie Kwa Wandu Wose bible

JOHANE 3

¹Korekoghe na mndumu m'baa wa Wayahudi, Mfarisayo uwangwagha Nikodemo.

²Ukamghendia Jesu nakio ukamzera, “Rabi, dakumanya angu ko mwalimu udumilo kufuma kwa Mlungu, angu ndekuwadie mndungi udimagha kubonya weke mwakilimbiti awa kuwibonyagha, isaakaia Mlungu oko andwamweri nao.”

³Jesu ukamtumbulia, “Nakughoria loli, ngera mundu usevalo kawi ndedimagha kughuwona wuzuri ghwa Mlungu anduangi.”

⁴Nikodemo ukamzera, “Idimika wada mundu uko mghosi kuvalwa sena? Wadima kungia kifunyi kwa mae na kuvalwa indo ja kawi?”

⁵Jesu ukamtumbulia, “Nakughoria loli, ngera mundu usevalo kwa machi na Roho, ndedimagha kungia kwa wuzuri ghwa Mlungu anduangi.

⁶Mundu wadavalwa kimumbi ni wavi wa kimumbi, ela wadavalwa kiroho kwa Roho.

⁷Kusakeshinika wei nakuzera, ‘Suti kuvalo kawi.’

⁸Mbeo yadaweta seji ikundagha, lwaka lwaro kwalusikira, ela ndekuimanyagha andu ifumagha hata andu ighendagha anduangi. Niko koni kwa mundu uo ose uvalwagha kwa Roho.”

⁹Nikodemo ukamkotia, “Maza iri ridimika wada?”

¹⁰Jesu ukamtumbulia, “Wele oho ko Mwalimu wa Israeli, sena ndekutambukilwagha ni maza iri?

¹¹Nakughoria loli, isi dadeda agho dighiichi, na kushuhudia agho dighiwonie, ela inyo ndemghurumiriagha wushuhuda ghodu anduangi.

¹²Ikakaia namghoria maza ra ndoenyi, nenyo ndemrumiriagha, mcharumiria wada ngamghoria maza ra mlungunyi?

¹³Ndekuwadie mndungi ujokie mlungunyi, ela Mwana wa Mdamu uo userie kufuma mlungunyi.

¹⁴“Sena sa iji koni Musa oreijosereghe ija choka ya shaba kireti, ni huwo koni Mwana wa Mdamu suti ujoso;

¹⁵uo ose urumiriagha kwake, ukaieghe na irangi ja kala na kala.

¹⁶Angu Mlungu oreghukundieghe wurumwengu, hata ukamfunya Mwana wake uvalwagha wa ititi, uo ose urumiriagha kwake usetote anduangi, ela ukaieghe na irangi ja kala na kala.

¹⁷Angu Mlungu nderemdumieghe Mwana wake ughutanye wurumwengu anduangi, ela ughukire wurumwengu.

¹⁸“Uo umrumiriagha Mwana ndetanywagha anduangi; ela uo userumiriagha wameria kutanywa, kwa kukaia ndeurumirie kwa Mwana wa ititi wa Mlungu anduangi.

¹⁹Nako kutanywa niko uku: Mwengere ghwameria kucha wurumwengunyi, ela wandu wikachikunda kira kuchumba mwengere, angu mabonyo ghawo gherekoghe ghizamie.

²⁰Angu kula umu ubonyagha maza rizamie, wadazamilwa ni mwengere, nao ndechagha mwengerenyi anduangi, mabonyo ghake ghizamie ghichewoneka.

²¹Ela uo ose ubonyagha maza ra loli, wadacha mwengerenyi, mabonyo ghake ghipate kuwoneka mwengerenyi seji ghabonywa kwa kumsikira Mlungu.”

²²Nyuma ya agho, Jesu na wanughi wake wikaghenda isanga ja Judea. Ukakaia aho andwamweri nawo, ukabaputiza.

²³Na wokoni Johane orekoghe ukibaputiza Ainoni kaavui na Salemu, angu aho korekoghe na machi mengi; na wandu wikamghendia, ukawibaputiza.

²⁴Ngelo iyo Johane nderengiriloghe kifungonyi anduangi.

²⁵Nao kukawuka nganyi aghadi ya wanughi wa Johane na Myahudi umu aighu ya mzango ghwa kukuelesha.

²⁶Wikamghendia Johane wikamzera, “Mwalimu, uja mundu morekwanyeghe kimonu cha Jordani, uo koremshuhudieghe, waawuyabaputiza na wandu wose waawuyamghendia.”

²⁷Johane ukawizera, “Mndungi ndedimagha kukaia na kilambo chingi ngera usenekelo ni Mlungu.

²⁸Inyo mmbeni moko washahidi sa iji nereghambieghe, ‘Ini suo ungi Kristo, ela ini needumwa nikirie imbiri kwake.’

²⁹Uo uko na muka nuo bwana arusi, ela mghenyi wa bwana arusi, uo ukaiagha kimusi na kumsikira, wadaboilwa kumsikira bwana arusi ukideda. Idana kuboilwa kwapo kwakatishwa.

³⁰Ni suti uo uchurikie kukaia m'baa, na ini suti nipunguo.”

³¹Uo uchagha kufuma aighu ni m'baa kuchumba wose, uo ufumagha ndoenyi ni wa ndoenyi, nao wadadeda ra ndoenyi; ela uo ufumagha mlungunyi oko aighu ya wose.

³²Uo wadashuhudia agho oreghiwonieghe na kughisikira, ela ndekuwadie mndungi ughurumiriagha wushuhuda ghwake anduangi.

³³Uo ughurumiriagha wushuhuda ghwake wadahakikisha kwa ilagho iji: Mlungu ni mloli.

³⁴Uo udumilo ni Mlungu wadaghora malagho gha Mlungu, angu Mlungu wadamneka roho wake kuseko na kupima.

³⁵Uja Aba wamkunde Mwana, nao wamnekie vilambo vose.

³⁶Uo umrumiriagha Mwana oko na irangi ja kala na kala, ela uo usemsikiragha Mwana, ndechaapata irangi anduangi, ela machu gha Mlungu ghiadua aighu kwake.