Read TAITA BIBLE – Biblia Ilagho Jiboie Kwa Wandu Wose JOHANE 4 Bible Online

JOHANE 4 - TAITA BIBLE – Biblia Ilagho Jiboie Kwa Wandu Wose bible

JOHANE 4

¹Idana Mafarisayo weresikireghe angu Jesu orekoghe ukipata na kubaputiza wanughi wengi kuchumba Johane.

²(Elaima Jesu moni nderebaputizireghe mndungi, awo werebaputizereghe ni wanughi wake.)

³Niko iji Bwana wamanya agho, ukafuma Judea na kuwuya sena Galilaya;

⁵Nao ukavika Saika muzi ghumu ghwa Samaria, kaavui na ija mbuwa Jakobo oremnekieghe mwana wake Josefu.

⁶Wokoni aho korekoghe na kisima cha Jakobo. Niko Jesu, angu wasilwa kwa wundu ghwa charo chake, ukasea kidombo kaavui na icho kisima; erekoghe ngera sa saa ya karandadu.

⁷Nao ukacha muka wa Kisamaria kudaya machi. Jesu ukamzera, “Nineke machi ninyo.”

⁸Angu wanughi wake wereghendieghe mzinyi kughua vindo.

⁹Uja muka ukamzera, “Yakaia wada oho Myahudi kunilomba machi ini Msamaria?” (angu Wayahudi ndewikaiagha na wungara ghungi na Wasamaria anduangi.)

¹⁰Jesu ukamtumbulia, “Na ngera kodemanya inosi ja Mlungu, na nani uhu ukuzeragha, ‘Nineke machi ninyo,’ kumangu kwamlomba uo ukakuneka machi ghiko moyo.”

¹¹Muka ukamzera, “Bwana, oho ndekuwadie kindo chedaya machi, na kisima cheko ndenyi, kwaghipatira hao agho machi ghiko moyo?

¹²Kwani oho koko m'baa kumchumba aba odu Jakobo? Uo oredinekieghe ichi kisima, nao moni orenyueghe machi gha kisima ichi andwamweri na wana wake, na mfugho rake wori?”

¹³Jesu ukatumbulia, “Uo ose unywagha machi agha uchaoma sena,

¹⁴ela uo uchaanywa machi nichaamneka ini, ndechaaoma jingi; angu machi agho nichaamneka, ghichawuya andenyi kwake ndoria ya machi ghivumbulukagha irangi ja kala na kala.”

¹⁵Muka ukamzera, “Bwana, nineke machi agho niseome sena, hata nisewuye aha kudaya machi.”

¹⁶Jesu ukamzera, “Ghenda kummbange mmigho mchanye aha.”

¹⁷Nao uja muka ukamzera, “Ini siwadie mndwawomi anduangi.” Jesu ukamzera, “Kwaghora loli angu ndekuwadie mndwawomi.

¹⁸Angu korekoghe na womi wasanu, na hata uhu mkwanye agha matuku si mmigho ungi. Aho kwaghora loli.”

¹⁹Uja muka ukamzera, “Bwana, nawona angu oho ko mlodi.

²⁰Weke aba wedu werekoghe wikitasira aighu ya ughu mghondi, nenyo mwadaghamba wei Jerusalemu niko andu kufwane kotasira Mlungu.”

²¹Jesu ukamzera, “Muka, nirumirie; ngelo iacha wandu wisechaamtasa uja Aba aighu ya mghondi ughu, hata andenyi ya Jerusalemu wori.

²²Inyo Wasamaria mwadatasa uo msemmanyagha, ela isi damwichi uo dimtasagha, angu kukia kwafuma kwa Wayahudi.

²³Ela ngelo iacha, hata idana eko aeni, watasi wa loli wichamtasa uja Aba loli, kwa ndighi ra Roho; angu Aba wadawilola wandu wifwane huwo wipate kumtasa.

²⁴Mlungu ni Roho, na watasi wa loli wichadimishwa kumtasa loli ni Roho wake.”

²⁵Uja muka ukamzera, “Namanya angu Masiha uacha, (uo uwangwagha Kristo) nao kasikira wacha, uchadiwonyera maza rose.”

²⁶Jesu ukamzera, “Ini nidedanyagha na oho, Nuo moni.”

²⁷Niko aho wanughi wake wikacha, nawo wikashinika iji wammbona ukidedanya na muka. Ela ndekuwadie ungi wawo oredimieghe kumkotia, “Kwakundaki?” angu “Kwaki kudedanyagha na muka?”

²⁸Nao uja muka ukasigha mtungi ghwake, ukawuya mzinyi na kuwighoria wandu,

²⁹“Choonyi mmbone mundu wanighoria maza rose nereribonyereghe! Kewada uhu nuo moni Kristo-o anguwada?”

³⁰Wandu wikafuma mzinyi wikamghendia Jesu.

³¹Ngelo iyo cheni wanughi wake wikamlomba wikighamba, “Mwalimu, jaa vindo.”

³²Ela Jesu ukawizera, “Ini neko na vindo veja inyo mseviichi.”

³³Niko wanughi wikakotiana weni na weni, “Kewada mndungi wamredia vindo?”

³⁴Jesu ukawizera, “Vindo vapo ni kubonya lukundo lwa uo orenidumieghe na kuimeria kazi yake.

³⁵Inyo mwaghambagha, ‘Yaasighwa meri ina mvono ghuche.’ Ela ini namzera, zighanenyi mbuwa seji viro vakaia tayari kukuwidwa.

³⁶Uo ukuwidagha wadalipwa ifungu jake, nao wadakuwida viro kwa wundu ghwa irangi ja kala na kala; huwo uo uwagha, na uo ukuwidagha, wiaboilwa chia imweri.

³⁷Niko huwo agho ghighorelo ni gha loli: ‘Umu wadawa na mzima wadakuwida.’

³⁸Ini namduma mkuwide mvono kwa mbuwa msereridumikieghe. Wazima werebonyereghe kazi, na inyo mwangia kwa kazi rawo.”

³⁹Nao Wasamaria wengi wa muzi ghuja wikarumiria kwa wundu ghwa wushuhuda ghwa uja muka, wei, “Wanighoria maza rose nereribonyereghe.”

⁴⁰Wasamaria wikamghendia Jesu, wikamlomba ukaie kwawo; na Jesu ukakaia kwawo matuku awi.

⁴¹Wazima wengi wikarumiria kwa wundu ghwa ilagho jake.

⁴²Wikamzera uja muka, “Idana isi darumiria, si kwa wundu ghwa malagho ghako tu, ela angu damsikira isi diweni, nesi damanya loli uhu ni Mkiri wa wurumwengu.”

⁴³Nao nyuma ya matuku awi, Jesu ukafuma aho ukaghenda Galilaya;

⁴⁴angu uo moni oreghorieghe, “Mlodi ndenekwagha ishima andenyi ya isanga jake anduangi.”

⁴⁵Hata iji wameria kuvika Galilaya, wandu wa aja wikamkaribisha, angu iji werejokieghe Jerusalemu kwa Ndima ya Pasaka, wereriwonieghe maza rose oreribonyereghe aho.

⁴⁶Jesu ukawuya sena Kana muzi ghwa Galilaya andu oreghalusireghe machi ghikawuya divei, na aho korekoghe na m'baa umu, mwana wake orekoghe mkongo aja Kafarnaumu.

⁴⁷Nao iji wasikira angu Jesu wameria kucha Galilaya kufuma Judea, ukamghendia ukimlomba angu usee Kafarnaumu um'boise mwana wake uko kaavui na kufwa.

⁴⁸Jesu ukamzera, “Msaawona weke mwakilimbiti na mashiniko ndemdimagha kurumiria anduangi.”

⁴⁹Uja m'baa ukamzera, “Bwana, dighende mwanwapo usechefwa.”

⁵⁰Jesu ukamzera, “Ghenda, mwanwako uchakaia moyo.” Nao uja m'baa ukajirumiria ilagho jija jereghoreloghe ni Jesu ukaghenda chia yake.

⁵¹Hata iji orekoghe chienyi ukighala, ukakwana na wadumiki wake, wikamghoria angu mwanwake oko moyo.

⁵²Niko ukawikotia ngera ni ngelo iao uzoe kuboa; nawo wikamtumbulia, “Ighuo saa mfungade niko homa imsighie.”

⁵³Nao uja ndee mwana ukakumbuka angu ni ngelo ija cheni Jesu oremzerieghe, “Mwana wako uchakaia moyo.” Nao ukarumiria na nyumba yake yose.

⁵⁴Uhu orekoghe mwakilimbiti wa kawi orebonyeroghe ni Jesu nyuma ya kucha Galilaya kufuma Judea.