Read TAITA BIBLE – Biblia Ilagho Jiboie Kwa Wandu Wose JOHANE 8 Bible Online

JOHANE 8 - TAITA BIBLE – Biblia Ilagho Jiboie Kwa Wandu Wose bible

JOHANE 8

¹ela Jesu ukajoka cha Mghondi ghwa Mizeituni.

²Nakesho yaro ko kio ukacha sena Hekalunyi; na wandu wose wikamkwanyikia chia rose, nao ukasea kidombo ukawifundisha.

³Nao walimu wa Sharia na Mafarisayo wikamredia muka orewadiloghe ukilaka, nawo wimeria kummbika kimusi aghadi wikaghamba,

⁴“Mwalimu, muka uhu orewadiloghe ukibonya wulaki.

⁵Idana andenyi ya Sharia edu, Musa oredilaghirieghe kuwibwagha kwa kuwilasa na magho waka wifwane huwu. Oho kwaghamba wada?”

⁶Wereghighorieghe agho kwa kumdegha wipate ra kumshitakia. Ela Jesu ukaghomeka andoenyi ukaandika na chala chake.

⁷Hata iji wachuria kumkotia, Jesu ukawuka ukawizera, “Uo usewadie kaung'a aghadi konyu ndekaie wa imbiri kumlasa na magho.”

⁸Ukaghomeka sena, ukaandika na chala chake andoenyi.

⁹Wiendasikira malagho agho, wikazoya kufuma umu umu wikizoya na waghosi; Jesu ukasigharika uekeri chiaimweri na uja muka uko kimusi.

¹⁰Nao Jesu ukawuka na kumzera uja muka, “Awandu wiao? Ungi ndekutanyire?”

¹¹Muka ukatumbulia, “Ndekuwadie ungi Bwana.” Jesu ukamzera, “Hata nani sikutanyagha; ghenda, ela kusebonye kaung'a sena.”]

¹²Jesu ukawizera Mafarisayo sena, “Ini nuo mwengere ghwa wurumwengu, uo uninughagha ini na jingi ndechaaghenda na kira anduangi, ela uchakaia na mwengere ghwa irangi.”

¹³Mafarisayo wikamzera, “Oho kwakushuhudia kumoni, kwa huwo wushuhuda ghwako si ghwa loli anduangi.”

¹⁴Jesu ukawitumbulia, “Hata ngera nakushuhudia nimoni, sena wushuhuda ghwapo ni ghwa loli, angu nakumanya andu nifumie, na andu nighendagha. Inyo ndemwichi andu nifumie hata andu nighendagha anduangi.

¹⁵Inyo mwadatanya kidamu, ela ini simtanyagha mndungi anduangi.

¹⁶Ela hata ngera natanya, sena kutanya kwapo ni kwa hachi, angu siko niekeri anduangi, ela nekwanye andwamweri na uja Aba orenidumieghe.

¹⁷Yaandikilo Sharienyi konyu angu wushuhuda ghwa wandu wawi ni ghwa loli.

¹⁸Nakushuhudia nimoni, na Aba unidumie wanishuhudia wokoni.”

¹⁹Nao wikamkotia, “Ndeyo oko hao?” Jesu ukawitumbulia, “Inyo ndemuniichi, hata na Aba ndemumwichi. Ngera modenimanya, kumangu na Aba mwamwichi.”

²⁰Jesu oreghorieghe malagho agho, iji orekoghe ukifundisha Hekalunyi andenyi ya chumba cha isanduku ja mafunyo. Hata mndungi nderedimieghe kummbwada, angu ngelo yake ndeerevikieghe anduangi.

²¹Nao Jesu ukawizera sena, “Nichaghenda noko nenyo mchanilola, ela mchafwa kaung'enyi konyu. Andu nighendagha, inyo ndemdimagha kucha anduangi.”

²²Niko vilongozi va Wayahudi wikaghamba, “E ughoragha wei, ‘Andu nighendagha inyo ndemdimagha kucha,’ huwo-lee, uchakubwagha moni anguwada?”

²³Jesu ukawitumbulia, “Inyo moko wandu wa ndoenyi, ela ini neko wa aighu; inyo moko wandu wa wurumwengu ughu, ela ini siko wa wurumwengu ughu anduangi.

²⁴Huwo niko namzera angu mchafwa kaung'enyi konyu. Nenyo mchafwa kaung'enyi konyu ngera mserumiriagha angu ‘Ini Nuo Moni.’”

²⁵Nao wikamzera, “Kwani oho nani?” Jesu ukawitumbulia, “Ni ijo jeni nameria kumghoria kiimbiri.

²⁶Neko na mengi gheghora na kutanya aighu yenyu; ela uo orenidumieghe ni mloli, nani nadaghoria wurumwengu agho gheni nighisikire kwake.”

²⁷Ela awo ndeweretambukiloghe wei wawuyawighoria gha uja Aba.

²⁸Niko ukawizera, “Iji mwamjosa Mwana wa Mdamu, aho niko mchaamanya angu ‘Ini Nuo Moni;’ nenyo mchamanya angu sibonyagha ilagho jingi kwa nguma rapo ini moni, ela nadaghora agho gheni nerefundishiroghe ni Aba.

²⁹Uo orenidumieghe oko chiaimweri nani, hata ndenisighie niekeri anduangi, angu nadabonya matuku ghose agho ghimriragha Uo.”

³⁰Nao ukighora agho, wandu wengi wikamrumiria.

³¹Jesu ukawizera waja Wayahudi weremrumirieghe, “Mkaghiwadia mafundisho ghapo, mchakaia wanughi wapo loli,

³²nenyo mchaimanya ija loli, nayo loli icham'bonya kukaia wakitina.”

³³Wikatumbulia, “Isi deko kivalwa cha Abrahamu, hata na jingi ndederekoghe wazumba wa mndungi anduangi. Kwaki kughambagha wei, ‘Mchakaia wakitina.’”

³⁴Jesu ukawizera, “Namghoria loli, uo ose ubonyagha kaung'a ni mzumba wa kaung'a.

³⁵Mzumba ndekaiagha nyumbenyi matuku ghose anduangi, ela mwana wadakaia matuku ghose.

³⁶Na Mwana ukam'bonya kukaia wakitina, mchakaia wakitina tiki.

³⁷Ini naichi angu moko kivalwa cha Abrahamu; ela sena mwawuyakunda kunibwagha, angu msewadagha mafundisho ghapo.

³⁸Ini naghora agho niwonyero ni Aba, ela inyo mwadabonya agho mzerelo ni ndeyo.”

³⁹Nao wikamzera, “Aba odu ni Abrahamu.” Jesu ukawizera, “Ngera loli modeeka wana wa Abrahamu, kumangu mwabonya seji Abrahamu orebonyereghe.

⁴⁰Ini neemghoria iyo loli nereisikireghe kwa Mlungu, nenyo mualola kunibwagha. Abrahamu nderebonyereghe huwo anduangi.

⁴¹Inyo mwaawuyabonya sa ndeyo.” Nao wikamzera, “Isi ndederevaloghe kwa chia ya kulaka, deko na Aba umweri, Mlungu moni.”

⁴²Jesu ukawizera, “Ngera loli Mlungu odeeka ndeyo, kumangu mwanikunda ini; angu nerefumieghe kwa Mlungu ngacha aha, nani serechieghe kwa nguma rapo ini moni anduangi, ela uo nuo orenidumieghe.

⁴³Kwaki msetambukilwagha ni agho nighoragha? Ni angu msedimagha kusikira ilagho japo anduangi.

⁴⁴Inyo mo wana wa ndeyo uja Mmbiwi, na bea rake niro reni mkundagha kuribonya. Uo orekoghe m'bwaghi kufuma kuzoya, hata na jingi ndekaiagha na loli, angu ndekuwadie loli ingi andenyi kwake anduangi. Iji waghora tee, wadaghora kikwake cheni: angu uo moni ni mtee, na ndee wa tee rose.

⁴⁵Ela angu ini nawuyamghoria loli, niko msewuerumiria.

⁴⁶Nani konyu udimagha kunishuhudia kukaia neko na kaung'a? Ngera naghora loli kwaki msenirumiriagha?

⁴⁷Uo uko wa Mlungu wadasikira malagho gha Mlungu. Ela inyo ndemko wa Mlungu, niko msesikiragha.”

⁴⁸Nao Wayahudi wikamzera, “Welee, dikaghamba angu oho ko Msamaria, sena koko na pepo si loli anguwada?”

⁴⁹Jesu ukawitumbulia, “Ini siwadie pepo ingi, ela nam'bonyera ishima Aba, nenyo muaninonia ishima.

⁵⁰Ini siwuekulolia wubaa anduangi, ela koko Umu ughulolagha, nao uchakaia mtanyi.

⁵¹Namghoria loli, uo usikiragha mafundisho ghapo ndechaafwa anduangi.”

⁵²Wayahudi wikamzera, “Idana damanya loli angu koko na pepo. Abrahamu wafue, na walodi wafue, na oho kwadizera wei, ‘Uo usikiragha mafundisho ghapo ndechaafwa anduangi.’

⁵³Oho ko m'baa kuchumba aba odu Abrahamu nao wafue, na walodi wafue! Kwakubonya kumoni kukaia ani?”

⁵⁴Jesu ukawizera, “Ngakukasa ini moni kukukasa kwapo ni kwa duu. Uo unikasagha ni Aba, uo mummbangagha Mlungu onyu.

⁵⁵Inyo ndemumwichi, ela ini namwichi; nani ngaghamba simwichi, nichakaia mtee karakara na inyo; ela ini namwichi sena nadamsikira.

⁵⁶Ndeyo onyu Abrahamu oreboiloghe angu ochaajiwona ituku japo, nao ukajiwona ukaboilwa.”

⁵⁷Nao Wayahudi wikamzera, “Oho ndekuvikie irika ja miaka mirongo misanu, sena kuaghamba kwammbonie Abrahamu?”

⁵⁸Jesu ukawizera, “Namghoria loli, imbiri ya Abrahamu kukaia, ‘Ini Neko.’”

⁵⁹Nao wikashoa magho wimlase, ela Jesu ukakuvisa, ukafuma Hekalunyi.