Read TAITA BIBLE – Biblia Ilagho Jiboie Kwa Wandu Wose JOHANE 9 Bible Online

JOHANE 9 - TAITA BIBLE – Biblia Ilagho Jiboie Kwa Wandu Wose bible

JOHANE 9

¹Nao iji Jesu orekoghe ukiida, ukammbona mundu orevaloghe kitungure.

²Wanughi wake wikamkotia, “Mwalimu, nani orebonyereghe kaung'a hata mundu uhu ukavalwa kitungure, ni uo moni, angu ni wavi wake?”

³Jesu ukawitumbulia, “Mundu uhu nderebonyereghe kaung'a, hata wavi wake anduangi; ela odevalwa kitungure eri kazi ra Mlungu ripate kufunukuka andenyi kwake.

⁴Ni suti dibonye kazi rake Uo orenidumieghe ndoe iko dime, angu kio chichacha, mndungi usechaadima kubonya kazi anduangi.

⁵Iji ini niko wurumwengunyi, neko mwengere ghwa wurumwengu.”

⁶Nao umeria kughora agho, ukachuya mada andonyi, ukabonya kizozo na agho mada, ukamshinga uja mundu icho kizozo mesonyi kwake;

⁷ukamzera, “Ghenda ndiwa ya Siloamu, kuoghe wushu” (kutambua kwaro irina ijo ni “Udumilo.”) Nao ukaghenda ukaogha, ukawuya ukiwona.

⁸Nao wambao na waja weremmbonieghe imbiri uko mkiwa, mlombi, wikaghamba, “Welee, uhu mundu suo moni orekoghe ukisea kidombo na kulomba?”

⁹Wamu wikaghamba, “Nuo moni;” ela wazima wikaghamba, “Suo ungi ela ni mundu mzima ufwanane nao.” Uja mundu moni ukaghamba, “Ni ini moni.”

¹⁰Wikamkotia, “Kwapatire wada kuwona?”

¹¹Ukawitumbulia, “Umundu uwangwagha Jesu orebonyereghe kizozo ukanishinga meso ukanizera, ‘Ghenda Siloamu kuoghe wushu.’ Ngaghenda ngaogha, ngapata kuwona.”

¹²Wikamkotia, “Oko hao?” Nao ukawitumbulia, “Simanyire.”

¹³Nao wikamghenja uja mundu utambulo meso kwa Mafarisayo.

¹⁴Ituku uo kitungure oreshingiloghe kizozo cha meso na kuboiswa, jerekoghe ituku ja Sabato.

¹⁵Mafarisayo wikamkotia sena, “Kwapatire wada kuwona?” Ukawitumbulia, “Odenishinga kizozo cha meso, ngaogha, na idana nawona.”

¹⁶Mafarisayo wamu wikaghamba, “Mundu uhu nderefumieghe kwa Mlungu kungi, angu useiwadagha sharia ya Sabato.” Ela wazima wikaghamba, “Mkaung'a udima wada kubonya awa weke mwakilimbiti?” Nao kukakaia na mawaghanyiko aghadi kwawo.

¹⁷Wikamkotia uja mundu sena, “Oho kughora wada aighu yake angu ukutambuye meso?” Ukawitumbulia, “Uo ni mlodi.”

¹⁸Wayahudi ndewererumirieghe wei uja mundu odedua kitungure ima ukachapata kuwona kwake, hata wikawiwanga wavi wake uja orekoghe kitungure.

¹⁹Nao wikawikotia, “Welee, uhu ni mwana onyu uhu mghoragha odevalwa kitungure? Wapatire wada kuwona?”

²⁰Nao wavi wake wikatumbulia, “Isi damanya angu uhu ni mwana odu orevaloghe kitungure;

²¹ela seji upatire kuwona ndedimanyire; hata na mundu um'boisire ndedimwichi anduangi. Mkotienyi mmbeni, ni mundu wa henga, uchamtumbulia moni.”

²²Wavi wake wereghorieghe agho kwa kuwiobua vilongozi va Wayahudi, angu ivo vilongozi werepataneghe wei, mndungi ukamghora Jesu kukaia Kristo, uwingo sunagoginyi.

²³Niko wereghoragha, “Uo ni mundu wa henga, mkotienyi moni.”

²⁴Nao wikammbanga indo ja kawi uo mundu orevaloghe kitungure wikamzera, “Mneke Mlungu wubaa, isi daichi angu mundu uhu ni mkaung'a.”

²⁵Uja mundu ukatumbulia, “Ngera uo ni mkaung'a ini simanyire, ela naamanya ilagho jimweri, nerekoghe kitungure, na idana nawuyawona.”

²⁶Wikamkotia, “Wakubonyere wada? Watambue wada meso ghako?”

²⁷Ukawitumbulia, “Nameria kumghoria, nenyo ndemsikiragha. Kwaki mkunde kusikira sena? Nenyo mookunda kuwuya wanughi wake?”

²⁸Nao wikamsholia wikighamba, “Oho nuo mnughi wake, ela isi de wanughi wa Musa.

²⁹Isi daichi angu Mlungu oreghorieghe na Musa, ela mundu uhu ndediichi andu ufumagha anduangi.”

³⁰Nao uja mundu ukaghamba, “Iji si ishiniko inyo kughamba ndemumwichi andu ufumie, nao moni wanitambue meso ghapo!

³¹Isi daichi angu Mlungu ndewisikiragha wakaung'a, ela uo usikirwagha ni uja umtasagha Mlungu, na kulubonya lukundo lwake.

³²Na jingi ndeisikirikie kufuma wurumwengu ghwaumbwa wei mndungi wamtambuye meso mundu uvalo kitungure.

³³Ngera mundu uhu userefumieghe kwa Mlungu, kumangu nderedimagha kubonya ilagho jingi anduangi.”

³⁴Wikatumbulia, “Wele kuadifundisha isi, na oho koovailwa kaung'enyi tiki?” Nao wikammbinga noko.

³⁵Nao Jesu ukasikira angu weremmbingieghe, hata iji wammbona ukamkotia, “Welee, oho kwarumiria kwake Mwana wa Mdamu?”

³⁶Uja mundu ukamzera, “Uo mundu nani Bwana, nipate kumrumiria?”

³⁷Jesu ukamzera, “Kwameria kummbona, nao nuo moni mdedanyagha.”

³⁸Uja mundu ukaghamba, “Narumiria Bwana!” Nao ukamtasa.

³⁹Nao Jesu ukaghamba, “Ini nerechieghe wurumwengunyi kutanya, awa wisewonagha wipate kuwona, na awa wiwonagha wiwuye vitungure.”

⁴⁰Mafarisayo wamu werekoghe kaavui wikasikira agho malagho wikamkotia, “Welee, na isi wori deeka vitungure?”

⁴¹Jesu ukawizera, “Ngera modeeka vitungure, kumangu ndemsikiragha kutanywa kungi; ela idana angu mwaghamba, ‘Dawuyawona,’ huwo muadua na kutanywa konyu.”