Read TAITA BIBLE – Biblia Ilagho Jiboie Kwa Wandu Wose MABONYO GHA WADUMI 11 Bible Online

MABONYO GHA WADUMI 11 - TAITA BIBLE – Biblia Ilagho Jiboie Kwa Wandu Wose bible

MABONYO GHA WADUMI 11

¹Nao wadumi na wanidu werekoghe Judea, wikasikira angu wandu wa mbari zima nawo weni wajiwusire ilagho ja Mlungu.

²Na Petro uendajoka Jerusalemu, waja wishamishiro wikamfunya makosa wikighamba,

³“Welee, kwaki kughendie kwa wandu wiseshamishiro, sena kukajanya nawo?”

⁴Niko Petro ukawighoria malagho ghose seji ghibonyekie:

⁵“Nerekoghe muzi ghwa Jopa ngilomba, ngawona mawono. Kilambo chimu cherekoghe chikisea sa nguwo mbaa kufuma mlungunyi kwa mbembe inya, nacho chikanichea.

⁶Iji nerechizighanireghe kaavui, ngawona vichuku vose va nyamandu, shimandu riavuagha na nyonyi ra mbeonyi.

⁷Ngasikira lwaka lukinizera, ‘Wuka Petro; bwagha kuje.’ Ela ngaghamba,

⁸‘Ii hata Bwana, na jingi sijie kilambo chingi cha wuchafu, angu chiseelie anduangi.’

⁹Ela lwaka lukanitumbulia indo ja kawi kufuma mlungunyi, ‘Icho Mlungu uchieleshere, oho kusechiwange cha wuchafu.’

¹⁰Ilagho ijo jikabonyeka mando adadu, na vilambo vose vikawuswa sena nokoighu cha mlungunyi.

¹¹Nao ija ngelo cheni, wandu wadadu wikavika nyumbenyi andu derekoghe dikikaia; wadumwa kwapo kufuma Kaisaria.

¹²Roho ukanizera nighendanye nawo nisekaie na ngera ingi. Na awo wanidu warandadu dereghendanyeghe, dikangia nyumbenyi kwa uja mundu.

¹³Niko ukadighoria seji ummbonie malaika uko kimusi kwake ukighamba, ‘Duma wandu Jopa, kumrede Simoni uwangwagha Petro,

¹⁴nao uchakughoria malagho; kwa agho, kuchakia oho chiaimweri na wandu wose wa nyumbenyi kwako.’

¹⁵Hata iji nazoya kughora, Roho Mweli ukawiseria wose sa iji koni orediserieghe isi aho imbiri.

¹⁶Nao ngakumbuka ilagho ja Bwana seji oreghorieghe, ‘Johane orebaputizireghe kwa machi, ela inyo mchabaputizwa kwa Roho Mweli.’

¹⁷Ikakaia Mlungu wawinekie inosi ijo jeni oredinekieghe isi, iji dererumirieghe kwa Bwana Jesu Kristo, ini nani, hata nimtangale Mlungu?”

¹⁸Wiendasikira agho wikanyama kima. Wikamkasa Mlungu wikighamba, “Mlungu wawinekie wandu wa mbari zima wori kuhea kovikia kupata irangi.”

¹⁹Idana wandu wamu wa awo wererumirieghe weresaghisiroghe kwa wundu ghwa matiriro gha Stefano, nawo wikadamba hata Foinike, Kupro, na Antiokia wikijighora ijo ilagho kwa Wayahudi weni.

²⁰Ela korekoghe na warumirii wamu, wandu wifumie Kupro na Kurene, nawo iji wereghendieghe Antiokia, wikawighoria Wagriki agho malagho wori; wikiwichilia ijo Ilagho Jiboie ja Bwana Jesu.

²¹Na ndighi ra Bwana rerekoghe andwamweri nawo, wandu wengi wikarumiria na kumghalukia Bwana.

²²Malagho agho ghikajivikia Ikanisa jerekoghe Jerusalemu, nawo wikamduma Barnaba ughende Antiokia.

²³Nao iji wavika aho, na kuwona seji Mlungu uredie mvono ghwake kwa wandu, ukaboilwa; ukawishashira wose widuo waloli kwa Bwana wikifunga ndighi kumnugha kwa ngolo yose.

²⁴Barnaba orekoghe mundu mucha, uchue Roho Mweli na irumirio. Wandu wengi wikachuria kumrumiria Bwana.

²⁵Niko Barnaba ukaghenda Tariso kumlola Sauli;

²⁶nao uendammbona ukamreda Antiokia. Na kwa mwaka ghose mlazi werekoghe wikikwana na ikanisa, wikawifundisha wandu wengi na ndighi; na aho Antiokia, kwa indo ja imbiri, wanughi werezoeghe kuwangwa Wakristo.

²⁷Matuku ghaja gheni, walodi wamu wereserieghe kufuma Jerusalemu wikacha Antiokia.

²⁸Na umu wawo uwangwagha Agabo, ukawuka na kuloda kwa ndighi ra Roho seji njala mbaa ichaabuka wurumwengu ghose. Na njala io, erebukieghe iji Klaudio orekoghe ukibonya nguma.

²⁹Wanughi wikawona nicha wiwidumie wutesia waruna werekoghe wikikaia Judea kula umu seji udimagha;

³⁰nawo wikabonya wokoni, wikaghughenja ugho wutesia kwa waghosi, wikiwiduma Barnaba na Sauli.