Read TAITA BIBLE – Biblia Ilagho Jiboie Kwa Wandu Wose MABONYO GHA WADUMI 15 Bible Online

MABONYO GHA WADUMI 15 - TAITA BIBLE – Biblia Ilagho Jiboie Kwa Wandu Wose bible

MABONYO GHA WADUMI 15

¹Korekoghe na wandu wamu werechieghe Antiokia kufuma Judea, wikazoya kuwifundisha wanidu wikighamba, “Msaashamishwa karakara na mzango ghwa Musa, ndemdimagha kukia anduangi.”

²Ilagho ijo jikareda nganyi mbaa nandighi aghadi yawo na Paulo na Barnaba. Niko ikawoneka angu Paulo na Barnaba andwamweri na wambao wamu wijoke Jerusalemu kwa wadumi na waghosi, kwa wundu ghwa ilagho ijo.

³Niko wikadumwa ni ikanisa, nawo wikiidia Foinike na Samaria, wikaja malagho seji wandu wa mbari zima wimghalukie Mlungu, na wanidu wikaboilwa na ndighi.

⁴Nao iji wavika Jerusalemu, wikakaribishwa ni ikanisa na wadumi, na waghosi; nawo wikawija malagho gha maza rose Mlungu oreribonyereghe andwamweri nawo.

⁵Ela wandu wamu wa dini ya Mafarisayo wirumirie, wikawuka na kughamba, “Suti wandu wa mbari zima wishamisho, na kulaghirwa angu wiiwadie Sharia ya Musa.”

⁶Wadumi na waghosi wikakwanyika andwamweri kuzighana ilagho ijo.

⁷Nyuma ya kughora malagho mengi aighu yaro, Petro ukawuka na kughamba, “Wanidu, mwamanya angu aho imbiri Mlungu orenisaghueghe aghadi konyu, nipate kuwighoria wandu wa mbari zima Ilagho Jiboie wipate kurumiria.

⁸Na Mlungu uo umanyagha ngolo ra wandu, ukawishuhudia kwa kuwineka Roho Mweli karakara na isi.

⁹Hata nderewonyereghe wuchumbano ghungi aghadi ya awo na isi, ela orerieleshereghe ngolo rawo kwa irumirio.

¹⁰Idana kwaki sena mumtimagha Mlungu kwa kuwidukishira warumirii misigo, iyo weke aba hata isi diweni diseredimieghe kuiduka?

¹¹Ela darumiria angu dichakirwa kwa mvono ghwa Bwana Jesu wokoni sa awo weni.”

¹²Mwandu ghose ghukanyama kima, wikisikiria seji Barnaba na Paulo wijagha malagho gha weke mwakilimbiti, na mashiniko Mlungu orebonyereghe kwa kuwitumia aghadi ya wandu wa mbari zima.

¹³Nao iji wameria kughora agho malagho, Jakobo ukatumbulia, “Wanidu, nisikirienyi.

¹⁴Simeoni waghora idakoni seji Mlungu orezoeghe kuwivikia wandu wa mbari zima, ukupatire wandu kufuma aghadi kwawo kwa wundu ghwa irina jake.

¹⁵Na malagho agho, gharumiriana na gha walodi seji iandikilo:

¹⁶‘Nyuma ya agha nichawuya na kuiagha sena nyumba ya Daudi ighue; nichaghiagha sena maghacho ghake, na kuiwusira.

¹⁷Eri wandu wisigharikie wimlole Bwana, na wandu wose wa mbari zima, wiwangilo kwa irina japo,

¹⁸waghamba Bwana, uo oreghibonyereghe malagho agha ghimanyike kufuma kala.’

¹⁹“Kwa huwo ini natanya huwu, disewijishe wasi wandu wa mbari zima wimghalukiagha Mlungu.

²⁰Ela diwiandikie barua na kuwizera witane na wuchafu ghwa vindo vifunyiro kizongona kwa milimu, kulaka, kuja nyama ra nyamandu rinyorelo, na kuja bagha.

²¹Angu kufuma kala Sharia ya Musa eko na wandu awo wimchilagha andenyi ya kula muzi; kwa kukaia yadashomwa andenyi ya sunagogi kula Sabato.”

²²Niko wadumi na waghosi andwamweri na ikanisa jose, wikadumbua malagho angu wisaghuo wandu aghadi kwawo, na kuwiduma Antiokia andwamweri na Paulo na Barnaba. Wikamsaghua Juda uwangwagha Barisaba, na Sila; nawo ni vilongozi viko na sare iboie aghadi ya wanidu,

²³wikawiduma na barua ihi: “Isi wanyinyu wadumi na waghosi, damroghua mmbose wanidu wa mbari zima mkaiagha Antiokia, Siria, na Kilikia.

²⁴Dasikire wei wandu wamu wifumie mzedu wachemjisha wasi na kum'bwagha ngolo kwa malagho wighighorie; ela isi ndederewidumieghe anduangi.

²⁵Kwa huwu dakwana andwamweri, dikarumiriana kusaghua wandu wamu na kuwiduma konyu; wichanye na wakundwa wedu Barnaba na Paulo;

²⁶wandu werejiwikieghe irangi jawo ndengonyi kwa wundu ghwa wudumiki ghwa Bwana odu Jesu Kristo.

²⁷Kwa huwu, dawiduma Juda na Sila nawo wichamghoria kwa momu iro maza damuandikia.

²⁸Angu Roho Mweli, na isi wori, dawonie nicha disemdukishire msigo ghungi mzima kuchumba agho ghiko gha suti;

²⁹nagho ni agha: mtane putu na vindo vifunyiro vizongona va milimu, kuja bagha, kuja nyamandu rinyorelo, na kulaka. Mkakutanya na maza iri, mchabonya nicha. Mkaie mana.”

³⁰Wiendalaghana nawo, waja wadumwa wikasea Antiokia, nawo wiendajiwanga ikwanyiko wikawineka ija barua.

³¹Hata iji waishoma wikaboilwa na kuhoreshwa ngolo.

³²Na wokoni Juda na Sila angu werekoghe walodi, werewihoreshereghe ngolo wanidu kwa malagho mengi na kuwifungisha ndighi.

³³Nyuma ya kukaia kwa ngelo rimu, wikalaghana na wanidu, wikaghala kwa sere na kuwiwuria awo werewidumieghe. [

³⁴Ela Sila orewonieghe nicha usigharike.]

³⁵Paulo na Barnaba wikakaia Antiokia, nawo chiaimweri na wandu walazi, wikafundisha na kuchila ilagho ja Bwana.

³⁶Nyuma ya matuku ghamu, Paulo ukamzera Barnaba, “Nndoko diwuyezighana wanidu kula muzi dichilie ilagho ja Bwana, diwone ngera weko wada.”

³⁷Barnaba ukakunda wimdo Johane uwangwagha Marko.

³⁸Ela Paulo nderewonieghe nicha kumdwa mundu orewisighieghe Pamfulia ukalegha kughendanya nawo kazinyi.

³⁹Ikawuka nganyi mbaa, hata wikatana; Barnaba ukamdwa Marko wikadamba kwa bahari kughenda Kupro,

⁴⁰ela Paulo ukamsaghua Sila, nao umeria kulombelwa mvono ghwa Bwana ni wanidu, ukafuma ukaghenda.

⁴¹Ukadamba ukiidia Siria na Kilikia ukighimangisha agho makanisa.