Read TAITA BIBLE – Biblia Ilagho Jiboie Kwa Wandu Wose MABONYO GHA WADUMI 16 Bible Online

MABONYO GHA WADUMI 16 - TAITA BIBLE – Biblia Ilagho Jiboie Kwa Wandu Wose bible

MABONYO GHA WADUMI 16

¹Paulo ukadamba hata Deribe na Lustera. Aho korekoghe na mrumirii umu uwangwagha Timotheo, mwana wa muka Myahudi urumirie; ela ndee orekoghe Mgriki.

²Mundu uo orekoghe na sare iboie aghadi ya wanidu wa Lustera na Ikonio.

³Paulo ukakunda ughendanye na Timotheo; kwa huwo ukamshamisha kwa wundu ghwa Wayahudi werekoghe aho, angu weremanyireghe Timotheo ndee orekoghe Mgriki.

⁴Nawo iji werekoghe wikiida mizinyi, wikawineka warumirii ghaja malaghiro gherebonyeroghe ni wadumi na waghosi aja Jerusalemu wipate kughikatisha.

⁵Niko agho makanisa ghikafungishwa ndighi andenyi ya irumirio, na ituku ituku ghikachurikia mtalo ghwawo.

⁶Wikaghenda wikiidiria masanga gha Frugia na Galatia, angu Roho Mweli orewikanieghe wisejichile jija ilagho isanga ja Asia.

⁷Hata iji wacha na kuvika kulangaya Musia, wikatima kungia Bithunia, ela Roho wa Jesu ukawikania;

⁸niko wikaidia mbai na mbai ya Musia wikasea Troa.

⁹Paulo ukachelwa ni mawono nakio; mundu wa Makedonia ukikaia kimusi na kumvoya ukighamba, “Ruwuka nokonu cha Makedonia kuditesie.”

¹⁰Nao iji Paulo waghiwona agho mawono, shwa-shwa dikalola kughenda cha Makedonia dikimanya wori angu Mlungu waadiwanga diendewichilia awo wandu Ilagho Jiboie.

¹¹Niko dikadamba kwa chia ya bahari kufuma Troa hata Samotherake, na ituku ja kawi dikavika Neapoli;

¹²na kufuma aho dikaghenda Filipi muzi m'baa ghwa Makedonia najo ni isanga jibonyerwagha nguma ni Waroma. Dikakaia matuku ghamu andenyi ya muzi ugho.

¹³Nao ituku ja Sabato, dikafuma mbengenyi dikaghenda mbai na mbai ya moda dikighesha koko na wulalo gholombia Mlungu, dikasea kidombo na kudedanya na waka werekwanyikieghe aho.

¹⁴Umu wa awo weredisikireghe orekoghe muka uwangwagha Lidia, ufumie muzi ghwa Thuatira, uuzagha vilambo va rangi ya zambarau. Muka uo orekoghe mtasi Mlungu, na Bwana ukarughua ngolo yake ughisikire malagho gherekoghe ghikighorwa ni Paulo.

¹⁵Nao uendabaputizwa andwamweri na wandu wa nyumbenyi kwake, ukadivoya ukighamba, “Ngera mwaniwona kukaia mloli kwa Bwana, choonyi mkaie nyumbenyi kwapo.” Ukadishingira na ndighi.

¹⁶Nao iji derekoghe dikighenda andu kolombia Mlungu, dikakwana na mwai mzumba umu uko na roho mbiwi ya wulodi, ukakaia ukiwipatira weke bwana wake fwaida nyingi kwa wulodi ghwake.

¹⁷Ukamnugha Paulo andwamweri nesi ukighora kwa lwaka lubaa, “Wandu awa ni wadumiki wa Mlungu Uko Aighu Na Ndighi, nawo wamchilia malagho gha kukia.”

¹⁸Ukabonya huwo matuku malazi. Nao Paulo ukazamilwa, ukaighalukia ija pepo na kuizera, “Kwa irina ja Jesu Kristo nakulaghira kumfume.” Nayo ikamfuma ija ngelo cheni.

¹⁹Ela iji weke bwana wake wawona seji isuwirio ja fwaida yawo jasia, wikawiwada Paulo na Sila wikawikurudua na kuwighenja sokonyi kwa wabaa.

²⁰Nawo iji wawireda imbiri ya watanyi wikaghamba, “Awa wandu ni Wayahudi, na sena waawuyasumbua wandu amzinyi kodu;

²¹waawuyafundisha mizango irighidwagha isi Waroma kuiwada angu kuibonya.”

²²Izungu ja wandu jikawadana na waja wandu, jikawuka aighu ya Paulo na Sila, na watanyi wikawirua nguwo kwa kurirashua; wikafunya momu wikabo na zobo.

²³Wiendawikaba makabo malazi, wikawingira jela wikimlaghira m'baa wa jela uwilindie na ndighi.

²⁴Na m'baa wa jela uendawusa malaghiro agho, ukawingira chumba cha ndenyi na kuwifunganya maghu ghawo na vilingo.

²⁵Ela sa kio ghadi, Paulo na Sila werekoghe wikilomba Mlungu na kum'boria chumbo; na wafungwa wikakaia wikisikiria.

²⁶Nao ahoeni, korekoghe na msughusiko m'baa ghwa ndoe; misingi ya jela ikasughusika, na shwa wori minyango yose ikarughuka, na vifungo va kula mfungwa vikafunguka.

²⁷M'baa wa jela uendawuka na kuwona minyango ya jela iko iari, ukalukua lufu lwake na kukunda kukubwagha, ukighesha angu wafungwa wose wameria kukimbia.

²⁸Ela Paulo ukaghora na lwaka lubaa, “Kusakekubonya kiwiwi chingi, angu deko aeni diwose.”

²⁹Uja m'baa wa jela ukawanga uredelo taa, ukangia andenyi na iseghe, na kughwa imbiri ya Paulo na Sila ukisughusika.

³⁰Ukawifunya shighadi ukaghamba, “Weke bwana, nibonya wada nipate kukia?”

³¹Nawo wikaghamba, “Rumiria kwa Bwana Jesu, na oho kuchakia, oho na wandu wa nyumbenyi kwako wori.”

³²Wikamghoria ilagho ja Bwana andwamweri na awo werekoghe nyumbenyi kwake.

³³Uja m'baa wa jela ukawidwa Paulo na Sila ija ngelo cheni ya nakio, na kuwioghosha ngoru rawo; nao ahoeni ukabaputizwa andwamweri na wandu wose wa nyumbenyi kwake.

³⁴Niko ukawidwa na kujokanya nawo cha nyumbenyi kwake, ukawibonyera vindo; nao ukaboilwa andwamweri na wandu wose wa nyumbenyi kwake, angu wamrumiria Mlungu.

³⁵Nao iji ndoe yaela, watanyi wikaduma masikari wikighamba, “Wilekerenyi waja wandu wighende.”

³⁶M'baa wa jela ukamghoria Paulo ukighamba, “Watanyi waduma mlekero mwende, kwa huwo idana fumenyi mghende kwa sere.”

³⁷Ela Paulo ukamzera, “Wadikabie imbiri ya wandu wose disetanyiro, nesi de Waroma; sena wadingirie jela, da sena weekunda kudifunya kwa kiviso? Ii hata; ndewiche widifunye weni.”

³⁸Masikari wikawighenjera watanyi agho malagho, nawo wikaobua iji wasikira wei Paulo na Sila ni Waroma.

³⁹Niko wikacha na kuwilomba wughoma, wikawifunya jela, na kuwilomba wifume ghuja muzi.

⁴⁰Paulo na Sila wikafuma jela wikaghenda nyumbenyi kwa Lidia. Hata iji wawiwona wanidu, wikawikumba ngolo, na kughenda chia rawo.