Read TAITA BIBLE – Biblia Ilagho Jiboie Kwa Wandu Wose MABONYO GHA WADUMI 17 Bible Online

MABONYO GHA WADUMI 17 - TAITA BIBLE – Biblia Ilagho Jiboie Kwa Wandu Wose bible

MABONYO GHA WADUMI 17

¹Paulo na Sila wikadamba, hata iji waida Amfiponia, wikavika Thesalonike; na sunagogi ya Wayahudi erekoghe ahoeni.

²Paulo ukangia sunagoginyi sa mzango ghwake, na kwa Sabato idadu orekoghe ukija malagho na wandu kwa kutumia Maandiko Ghielie.

³Ukawiwonyera loli seji erekoghe suti Kristo utiriro na kuruka kufuma kwa wafu ukighamba, “Uhu Jesu nawuyamchilia nuo Kristo.”

⁴Wamu wikarumiria, wikanughana na Paulo na Sila; na Wagriki wengi winughagha dini, na waka werekoghe vilongozi walazi weni, wikarumiria.

⁵Ela Wayahudi wikangilwa ni iriso, wikawada wandu wamu wawiwi wa kisha-kisha, wikakwanya izungu ja wandu na kuwusira nganyi muzi ghose. Wikaighendia nyumba ya Jasoni, na kukunda wiwifunye Paulo na Sila shighadi kwa wandu.

⁶Hata iji wawisowa, wikamkurudua Jasoni andwamweri na wanidu wamu, na kuwireda kwa wabaa wa muzi wikikema na kughamba kwa lwaka lubaa, “Awandu wighughalusire wurumwengu, hawa wacha aha;

⁷na Jasoni wawikaribisha. Nawo sena waawuyanona sharia ra Kaisari, wikighamba wei oko mzuri mzima uwangwagha Jesu.”

⁸Wandu na wabaa wa muzi wiendasikira agho malagho, wikakambwa ni chongo.

⁹Hata iji wameria kuwusa wufunga kufuma kwa Jasoni na wambao, wikawilekeria wighende.

¹⁰Wanidu wikashashira kuwidambisha Paulo na Sila nakio, wighende Berea; hata iji wavika wikangia sunagoginyi ya Wayahudi.

¹¹Wandu awo werekoghe na suku kuchumba waja wa Thesalonike; wikajiwusa ilagho kwa ngolo mbaa, wikizighana-zighana Maandiko Ghielie kula ituku, wiwone ngera maza iro rerekoghe rikighorwa ni Paulo na Sila ni huwo koni.

¹²Kwa huwo wengi wawo wikarumiria; na waka wa Kigriki wiko na sare iboie, na womi wa Kigriki wori, wikarumiria.

¹³Ela iji Wayahudi wa Thesalonike weresikireghe kukaia ilagho ja Mlungu jachililo ni Paulo sena aho Berea, wikacha kungira wandu sheshe na kuwidemua.

¹⁴Niko wanidu wikamghenja Paulo cha pwani shwa-shwa, ela Sila na Timotheo wikasigharika ahoeni.

¹⁵Awo wandu weremfumiragha Paulo, wereghendanyeghe nao hata wikavika Athene; nawo wikawuya, nyuma ya kulaghirwa ni Paulo angu wiwizere Sila na Timotheo wimnughe kwa shwa-shwa seji idimikagha.

¹⁶Nao iji Paulo orekoghe ukiwiwesera Sila na Timotheo muzi ghwa Athene, orezamiloghe nandighi iji wawona seji ugho muzi ghuchue milimu.

¹⁷Ukaja malagho na Wayahudi andwamweri na wandu wa mbari zima winughagha dini andenyi ya sunagogi; wokoni ukaghora na awo werekoghe wikicha sokonyi kula ituku.

¹⁸Walimu wamu wa mafundisho gha Epikuro na Stoiki wikabonya nganyi nao. Wamu wikaghamba, “Uhu mkelu wawuyakunda kughora wada wele?” Wazima wikaghamba, “Uawoneka sa mchili wa milungu ya kighenyi.” Angu orekoghe ukichila malagho gha Jesu na kuruka.

¹⁹Nao wikammbwada na kumreda andenyi ya Areopago wikighamba, “Kwadima kudighoria agha mafundisho mawishi kwawuyaghireda seji ghiko?

²⁰Kwaawuyadighoria maza rimu ra kighenyi, kwa huwo dakunde dimanye iri maza kutambua kwaro niki.”

²¹Angu Waathene wose, na wandu wa kighenyi werekoghe wikikaia aho, ndewibonyagha kazi ingi zima, ela kughora na kusikiria maza mbishi.

²²Niko aho Paulo ukikaia kimusi aghadi ya Areopago ukaghamba, “Wandu wa Athene, nawona inyo mo wandu wa dini nandighi kwa maza rose.

²³Angu iji nerekoghe ngiida, na kuzighana andu konyu kotasira, nerewonieghe madhabahu iandikilo, ‘KWA UO MLUNGU USEMANYIKAGHA.’ Kwa huwu uo mwawuyamtasa msemmanyagha, nuo moni nawuyamchilia.

²⁴Uja Mlungu orebonyereghe wurumwengu na vose viko andenyi yaro, ni Bwana wa mlungunyi na ndoenyi, nao ndekaiagha andenyi ya hekalu riaghilo ni wandu.

²⁵Hata ndedumikilwagha kwa mikonu ya wandu seji oosowa kindo chingi anduangi; angu uo moni nuo uwinekagha wandu wose irangi, miruke, na vilambo vose.

²⁶Nao orebonyereghe mbari ra wandu kufuma kwa mundu umweri, wikaie ndoenyi kose; nyuma ya kuwika ngelo na mano ya andu kwawo kokaia;

²⁷eri wimlole Mlungu, hata ngera ni kwa kuadada-adada, kwa isuwirio; wimpate. Hata huwo saki ndeuko kula na kula umu odu anduangi;

²⁸angu, ‘Andenyi kwake uo, dakaia moyo, dikisela-sela, na kudua;’ sa iji koni wadungi chumbo wamu wenyu wighorie, ‘Isi loli deko wana wake.’

²⁹Kwa kukaia deko wana wa Mlungu, ndeidifwane digheshe wei Uo ooka sa dhahabu, angu feza, angu igho jiwachilo kwa wuya na maghesho gha mdamu.

³⁰Ngelo ra kusowa kumanya, Mlungu nderetalieghe anduangi; ela idana, walaghira wandu wose andu kose, wihee mawiwi ghawo.

³¹Angu wawikie ituku jechaghutanya wurumwengu kwa hachi, kwa mundu uo oremmbikieghe; nao wawiwonyera wandu wose wuloli ghwa ilagho ijo kwa kumrukisha mundu uo kufuma kwa wafu.”

³²Nao iji wasikira malagho gha kuruka kwa wafu, wamu wikaseka, ela wamu wikaghamba, “Dichakusikiria sena aighu ya maza iri.”

³³Niko Paulo ukafuma aghadi kwawo.

³⁴Wandu wamu wikawadana na Paulo wikarumiria. Umu wawo orekoghe Dionisio wa mwandu ghwa Areopago; na muka umu uwangwagha Damari, na wandu wamu wazima wori.