Read TAITA BIBLE – Biblia Ilagho Jiboie Kwa Wandu Wose MABONYO GHA WADUMI 18 Bible Online

MABONYO GHA WADUMI 18 - TAITA BIBLE – Biblia Ilagho Jiboie Kwa Wandu Wose bible

MABONYO GHA WADUMI 18

¹Nyuma ya agho, Paulo ukafuma Athene ukaghenda Korintho.

²Ukamkua Myahudi umu aho uwangwagha Akula uvailo Ponto, uchee kafwani kufuma Italia andwamweri na mkake Prisila; angu m'baa wa isanga Klaudio orefunyireghe momu Wayahudi wose wifume Roma. Nao Paulo ukaghenda kuwiwona,

³na kwa kukaia kazi rawo redeeka rifwanane, ukakaianya nawo; angu wose wedeeka na kazi ebonya hema.

⁴Na kula Sabato, ukakaia ukikotiana na wandu malagho andenyi ya sunagogi, ukitima kuwiruda Wayahudi na Wagriki wori.

⁵Nao iji Sila na Timotheo wavika kufuma Makedonia, Paulo ukafunga ndighi kuchila na kuwishuhudia Wayahudi kukaia Jesu nuo Kristo.

⁶Nawo iji walegha na kumsholia, Paulo ukaghughudua nguwo rake na kughamba, “Mkatota, ni aighu yenyu. Ini siwadie ikosa, kufuma idana nichaghenda kwa mbari zima.”

⁷Ukafuma aho, ukaghenda kukaia nyumbenyi kwa mundu uwangwagha Tito Justo mtasi Mlungu; nyumba yake erekoghe kaavui na sunagogi.

⁸Na Krispo, uo orekoghe m'baa wa Sunagogi, oremrumirieghe Bwana chiaimweri na wandu wose wa nyumbenyi kwake; na Wakorintho wengi wikajisikira jija ilagho, nawo wikarumiria na kubaputizwa.

⁹Nao kio chimu, Bwana ukaghora na Paulo kwa mawono ukamzera, “Kusakeobua, hata kusenyame, ela ghora tu;

¹⁰angu ini neko andwamweri na oho, hata ndekuwadie mndungi uchaakubonya ilagho jingi jizamie anduangi; angu ini neko na wandu wengi andenyi ya muzi ughu.”

¹¹Niko Paulo ukakaia aho mwaka mlazi na meri irandadu, ukifundisha wandu ilagho ja Mlungu.

¹²Ela iji Galio orekoghe m'baa wa Akaya, Wayahudi werewukieghe kwa ngolo imweri, wikammbwada Paulo na kumghenja kotinyi

¹³wikighamba, “Mundu uhu waawuyakumba wandu wurumu wimtase Mlungu kwa chia irighidwagha ni Sharia.”

¹⁴Ela iji Paulo orekundieghe kudeda, Galio ukawizera Wayahudi, “Ngera ghedeka ni malagho gha ikosa jingi angu kuchikanya sharia-lee, nadimagha kumsikiria inyo Wayahudi.

¹⁵Ela angu ni maza rekotiana malagho, marina, na sharia yenyu, ghizighanenyi mmbeni; ini sikunde kukaia mtanyi wa maza iri kungi.”

¹⁶Nao ukawiwinga kotinyi.

¹⁷Nawo wose wikammbwada Sothesene m'baa wa Sunagogi wikamkaba imbiri ya koti; ela Galio nderetalieghe ilagho ijo anduangi.

¹⁸Nyuma ya agho, Paulo orekaieghe matuku malazi aho Korintho, niko ukalaghana na wanidu ukadamba kwa bahari kughenda Siria andwamweri na Prisila na Akula. Aho Kenkrea ukadumbua iridia jake angu orebonyereghe ighemi.

¹⁹Wikavika Efeso, na Paulo ukawisigha Prisila na Akula, ukangia sunagoginyi na kukotiana malagho na Wayahudi.

²⁰Hata iji wandu wamlomba umuke-muke, ndererumirieghe;

²¹ela iji orekoghe ukilaghana nawo ukawizera, “Nichammburia sena Mlungu ukakunda.” Nao ukadamba kwa bahari kufuma Efeso.

²²Uendavika Kaisaria, ukajoka Jerusalemu kujiroghua ikanisa; niko ukasea Antiokia.

²³Nao uendakaia-kaia aho, ukafuma ukamara-mara masanga gha Galatia, na Frugia, ukawimangisha awo wose wererumirieghe.

²⁴Nao Myahudi umu uwangwagha Apolo, uvailo Alekizanderia, ukacha Efeso. Mundu uo orekoghe na wuya ghodeda loli-loli, uichi Maandiko Ghielie na ndighi.

²⁵Orekoghe wafundishwa Chia ya Bwana, nao ukiaka modo rohonyi, ukaghora na kufundisha nicha malagho gha Jesu; ela uo moni odeeka waghumanya wubaputizo ghwa Johane ghoni.

²⁶Ukazoya kughora kwa wuwana andenyi ya sunagogi; ela iji Prisila na Akula wamsikira, wikamdwa kwawo na kummbonyera nicha chia ya Mlungu.

²⁷Hata iji Apolo wakunda kuruwuka cha Akaya, wanidu wikamkumba ngolo kwa kuwiandikia wandu wererumirieghe wimmbuse. Uendavika, ukawitesia nandighi awo wandu wererumirieghe kwa chia ya mvono ghwa Mlungu;

²⁸ukawisima Wayahudi imbiri ya wandu wose, ukiwonyera kwa Maandiko Ghielie kukaia Jesu nuo Kristo.