Read TAITA BIBLE – Biblia Ilagho Jiboie Kwa Wandu Wose MABONYO GHA WADUMI 2 Bible Online

MABONYO GHA WADUMI 2 - TAITA BIBLE – Biblia Ilagho Jiboie Kwa Wandu Wose bible

MABONYO GHA WADUMI 2

¹Nao iji ituku ja Pentekosto javika, awo wanughi werekoghe andu kumweri wose.

²Shwa wori, wikasikira lwaka sa lwa mbeo mbaa iwetagha kufuma mlungunyi na kuichura nyumba yose andu werekoghe kidombo.

³Rikawoneka kwawo chumi sa chumu ra modo riwaghanyiro, na kukaria aighu ya kula umu wawo.

⁴Wikachulwa ni Roho Mweli wose, wikazoya kudeda na viteto vizima, sa iji uo Roho orewidimishireghe kughora.

⁵Na aho korekoghe na Wayahudi wamu werekoghe wikikaia Jerusalemu; wandu wimuobuagha Mlungu, wifumie kula isanga wurumwengunyi.

⁶Nawo iji wasikira ulo lwaka, wikakwanyika izungu ibaa wikishinika; angu werewisikireghe awo wanughi wikideda kwa kiteto cha kula umu wawo.

⁷Wikashinika na kutambika wikighamba, “Welee, awa wose wawuyadeda si Wagalilaya anguwada?

⁸Yakaia wada isi kusikira wikideda kwa kiteto cha kula umu odu?

⁹Wapelethi, Waamedi, Waelami, na wandu wikaiagha Mesopotamia, Judea, Kapadokia, Ponto, na Asia;

¹⁰Frugia na Pamfulia, Misri na isanga jimu ja Libya kaavui na Kurene, na waghenyi wifumie Roma,

¹¹Wayahudi na wandu wingirie dini ya Kiyahudi, Wakirete na Waarabu; dawisikira wikighora malagho mabaa gha Mlungu kwa viteto vedu.”

¹²Wikashinika wose wikikambwa ni chongo na kukotiana, “Ni mazaki iri?”

¹³Ela wazima wikaseka wikighamba, “Waawongerwa ni divei mbishi.”

¹⁴Nao Petro ukawuka kimusi andwamweri na wadumi ikumi na umweri ukaghamba kwa lwaka lubaa, “Inyo wandu wa Judea, nenyo mmbose mkaiagha Jerusalemu, nisikirienyi mtambukilo.

¹⁵Wandu awa ndewiwongerie seji mugheshagha, angu idana ni saa idadu ra dime;

¹⁶ela ilagho iji nijo jereghoreloghe ni mlodi Joeli ukighamba:

¹⁷‘Huwu niko ichaakaia matuku gha kutua mbai, waghamba Mlungu, nichawidiria wandu wose Roho wapo; wana wenyu wa womi na wa waka wichafunya wulodi, na wandu wenyu wa irika wichawona mawono, na waghosi wichaloda ndodo.

¹⁸Ee, hata wadumiki wapo wa womi na waka, nichawidiria Roho wapo matuku ghaja; nawo wichafunya wulodi.

¹⁹Nani nichawiwonyera mashiniko aighu mlungunyi, na alama aisi ndoenyi; kuchakaia na bagha, modo, na mosi ghwa ikungughu.

²⁰Iruwa jichawuya kira, na mori ghuchawuya ghwa ngundu sa bagha imbiri Ituku ja Bwana jisechee, ijo ituku ibaa jimanyikie.

²¹Na aho ichakaia, uo ose uchaajiwangia irina ja Bwana uchakia.’

²²“Sikirenyi malagho agha inyo wandu wa Israeli: Jesu wa Nazareti, ni mundu oremanyishiroghe worinyi konyu ni Mlungu kwa mabonyo gha ndighi, alama na mashiniko Mlungu oreribonyereghe kwa kumtumia aghadi konyu sa iji koni mwawuyamanya.

²³Uo Jesu, orefunyiroghe konyu kwa mpango tiki ghoremanyikieghe kwa Mlungu; nenyo mkamsulubisha na kum'bwagha kwa mikonu ya wandu wawiwi.

²⁴Ela Mlungu oremrukishireghe kufuma kwa wafu, ukamuinja luwawo lwa kifwa, angu ndeeredimikieghe chimmazire anduangi.

²⁵Angu Daudi waghorie huwu aighu yake; ‘Neremmbonieghe Bwana imbiri kwapo ngelo rose, uko chia ya mkonu ghwapo ghwa kiwomi, eri nisenyavurike.

²⁶Kwa huwu ngolo yapo ikaboilwa, na madedo ghapo ghikachua iseko, nani hata ngera neko na mumbi ghwa wunyonge, nichadua ngikusuwiria.

²⁷Angu ndekuchaaisigha roho yapo iduo kwa wafu, hata ndekuchaamsigha Mweli wako uwone kuwoa kungi anduangi.

²⁸Oho kwanimanyisha chia ra irangi, na iji kuko andwamweri nani, nichachulwa ni kuboilwa.’

²⁹“Wanidu, nadima kughora malagho gha aba odu Daudi kwa wuwana, seji uo moni orefueghe na kurikwa, na kaburi yake eko kodu hata linu.

³⁰Uo moni angu orekoghe mlodi, nao ukimanya seji Mlungu orem'bonyereghe ighemi, angu uchamsera kidombo mndumu wa kivalwa chake kifumbinyi chake cha nguma,

³¹orezoeghe kuwona; ukaja malagho gha kuruka kwake Kristo, seji usechaadua kwa wafu, hata mumbi ghwake ghusechaawoa anduangi.

³²Uo Jesu, Mlungu oremrukishireghe kufuma kwa wafu, nesi diwose deko washahidi wa maza iri.

³³Nao moni, umeria kujoswa kwa mkonu ghwa kiwomi ghwa Mlungu, na kuwusa kufuma kwa Aba ijo ilaghiro ja Roho Mweli, niko wachidia ichi mchiwonagha na kuchisikira wori.

³⁴Angu Daudi nderejokieghe mlungunyi anduangi, ela uo moni waghamba, ‘Bwana oremzerieghe Bwana wapo, sea kidombo chia ya mkonu ghwapo ghwa kiwomi,

³⁵hata nimerie kuwibonya wamaiza wako wikaie kifumbi chewikiria maghu ghako.’

³⁶“Kwa huwu Waisraeli wose ndewimanye loli, uhu Jesu moremsulubishireghe, Mlungu wam'bonya ukaie Bwana na Kristo wori.”

³⁷Nao iji wereghisikireghe agho, wikadungwa ngolonyi kwawo wikamzera Petro na wadumi wambao, “Dibonya wada wanidu?”

³⁸Petro ukawizera, “Heenyi m'baputizo kula umu onyu kwa irina ja Jesu Kristo mpate kulekwa kwa kaung'a renyu, nenyo mchapata inosi ja Roho Mweli.

³⁹Angu ilaghiro iji ni jenyu, na ja wana wenyu, na awo wose wiko kula; awo wose Bwana Mlungu uchaawiwanga wiche kwake.”

⁴⁰Na kwa malagho mazima mengi ukawishuhudia na kuwishashira ukighamba, “Mkukire mmbeni na kivalwa ichi chizamie.”

⁴¹Awo wereghiwadieghe malagho ghake werebaputiziroghe, na mtalo ghwa awo werechurikieghe jija ituku ghukavika elfu idadu.

⁴²Wikafunga ndighi kughiwadia mafundisho gha wadumi, na kukaia na wungara, chiaimweri na kughuchikanya mkate, na kulomba Mlungu.

⁴³Alama na mashiniko rerekoghe rikibonywa ni wadumi, na wandu wose wikangilwa ni wowa.

⁴⁴Na awo wose wererumirieghe, werekoghe chia imweri, nawo wikakaia na wungara ghwa vilambo vose.

⁴⁵Wikauza mali rawo, na vilambo vawo, wikawaghiana wose kula mundu seji orekundieghe.

⁴⁶Na ituku ituku werekoghe wikingia Hekalunyi, na kughuchikanya mkate nyumbenyi kwawo, wikija vindo kwa kuboilwa na ngolo rielie,

⁴⁷wikimkasa Mlungu na kukundwa ni wandu wose; na Bwana ukaghuchuria ituku ituku mtalo ghwa awo werekoghe wikikirwa.