Read TAITA BIBLE – Biblia Ilagho Jiboie Kwa Wandu Wose MABONYO GHA WADUMI 22 Bible Online

MABONYO GHA WADUMI 22 - TAITA BIBLE – Biblia Ilagho Jiboie Kwa Wandu Wose bible

MABONYO GHA WADUMI 22

¹“Wanidu na weke aba, sikirienyi nikudederie imbiri konyu.”

²Hata iji wasikira ukidedanya nawo kwa kiteto cha Kiebrania, wikachuria kunyama kima kuchumba. Nao ukaghamba,

³“Ini ne Myahudi, neevailwa Tariso muzi ghwa Kilikia, ela neelelelwa ughu muzi ghoni ngifundishwa ni Gamalieli, karakara na Sharia ya weke aba ikurie na ndighi; ngafunga ndighi loli-loli kwa maza ra Mlungu sa iji koni inyo mmbose muko idime.

⁴Nerewikorongieghe nandighi hata kuwibwagha wandu werekoghe wikiinugha Chia ihi. Ngawifunga na kuwingira jela womi na waka wori;

⁵Mkohani M'baa na mwandu ghwa waghosi ni washahidi. Awo weni wereninekieghe barua nighende naro kwa Wayahudi wamzedu, nani ngadamba hata Dameshki, niwiwade na kuwifunga awo werekoghe aho, nawo weni niwirede Jerusalemu wipate kutirirwa.

⁶“Nao iji nerekoghe ngidamba, na kulighisa kuvika Dameshki, sa dime ghadi, shwaa mwengere m'baa kufuma mlungunyi ghukang'ala-ng'ala chia rose kwapo;

⁷ngaghwa andonyi, ngasikira lwaka lukinizera, ‘Sauli, Sauli! Kwaki kunikorongagha?’

⁸Nani ngatumbulia, ‘Oho nani Bwana?’ Ukanitumbulia, ‘Ini ne Jesu wa Nazareti uhu kwawuyamkoronga.’

⁹Awa wandu deredambanyagha wawonie mwengere ela ndeweresikireghe ulo lwaka lorekoghe lukighora nani anduangi.

¹⁰Niko ngaghamba, ‘Nibonya wada Bwana?’ Bwana ukanizera, ‘Wuka kungie Dameshki, kuchaghorelwa agho ghikufwanagha kubonya.’

¹¹Nerekoghe nabwaghwa meso ni ghuja mwengere, nani ngadwalwa nikiwadilwa mkonu ni waja derekwanyeghe; dikavika Dameshki.

¹²“Korekoghe na mndumu aho uwangwagha Anania, muoboi Mlungu kwa kunugha Sharia, uko na sare iboie kwa Wayahudi wose werekoghe aja.

¹³Ukanichea, nao ukikaia kimusi kaavui nani ukanizera, ‘Mwanidu Sauli, kuwone.’ Ngelo ija cheni ngawurilwa ni kuwona kwapo, ngamzighana.

¹⁴Nao ukaghamba, ‘Mlungu wa weke aba wakusaghue kumanye lukundo lwake, kummbone uja Mhachi, na kusikira lwaka kufuma momunyi kwake;

¹⁵angu kuchakaia mshahidi wake kwa wandu wose aighu ya maza kuriwonie na kusikira.

¹⁶Idana kuweseraki? Wuka kubaputizo, kuoghosho kaung'a rako, kukijiwangia irina jake.’

¹⁷“Hata iji nerewurieghe Jerusalemu, nani ngilomba Hekalunyi nerewonieghe mawono;

¹⁸ngammbona Bwana ukinizera, ‘Shashira kufume Jerusalemu shwa-shwa; angu ndewichaarumiria wushuhuda ghwako aighu yapo anduangi.’

¹⁹Nani ngaghamba, ‘Bwana, awo weni wamanya seji nerewifungieghe na kuwikaba awo werekurumirieghe andenyi ya kula sunagogi.

²⁰Hata iji Stefano mshahidi wako orebwaghwagha, nerekoghe kimusi ngirumiria na kurilindia nguwo ra awo werekoghe wikim'bwagha.’

²¹Nao ukanizera, ‘Ghenda; angu nichakuduma kula kwa wandu wa mbari zima.’”

²²Wandu wikamsikiria Paulo hata ukaghora ilagho ijo; niko wikaghora kwa lwaka lubaa, “Mwinjenyi wurumwengunyi mundu ufwane huwo; ndeifwane ukaie moyo.”

²³Nao iji werekoghe wikikema na kumicha-micha nguwo rawo, wikikumba teri noko ighu,

²⁴m'baa wa majeshi ukafunya momu Paulo ungiro ngomenyi, nao ukotelo kwa kudamwa na kiboko, umanyike kwaki wawuyakemelwa huwo.

²⁵Ela iji wameria kumfunga na mikowa, Paulo ukamzera m'baa wa masikari uko kimusi, “Welee, ni hachi oho kumdama mundu na kiboko uko mkitina wa Roma nao usetanyiro?”

²⁶M'baa wa masikari uendasikira huwo, ukamghendia m'baa wa majeshi ukamzera, “Kuamba kubonye wada? Uja mundu ni mkitina wa Roma.”

²⁷Niko m'baa wa majeshi ukacha ukamzera Paulo, “Nighorie, oho ko mkitina wa Roma?” Paulo ukatumbulia, “Hee.”

²⁸Uja m'baa wa majeshi ukaghamba, “Ini nereghueghe wukitina ughu kwa pesa nyingi.” Paulo ukamzera, “Ini neevalwa mkitina.”

²⁹Niko awo weambaa wimkotie wikainjika shwa-shwa; na m'baa wa majeshi wori ukaobua angu wachamanya Paulo ni mkitina wa Roma, na sena wamfunga na minyororo.

³⁰Ela nakesho, m'baa wa majeshi ukikunda kumanya nicha ni malaghoki Paulo wawuyashitakilwa nagho ni Wayahudi, ukamfungua; ukafunya momu Mkohani M'baa chiaimweri na mwandu ghukwane, ukamreda Paulo na kummbika imbiri kwawo.