Read TAITA BIBLE – Biblia Ilagho Jiboie Kwa Wandu Wose MABONYO GHA WADUMI 24 Bible Online

MABONYO GHA WADUMI 24 - TAITA BIBLE – Biblia Ilagho Jiboie Kwa Wandu Wose bible

MABONYO GHA WADUMI 24

¹Nyuma ya matuku masanu, Mkohani M'baa Anania, na waghosi, na wakili umu uwangwagha Teritulo, wikasea Kaisaria. Wikamshitakia Paulo imbiri ya m'baa wa isanga.

²Nao iji Paulo wawangwa, Teritulo ukazoya kumshitakia ukighamba, “Kwa kukaia dapata sere mbaa aisi yako na kwa wuzighaniri ghwako ee Felike Mucha, maza nyingi raboiswa kwa wundu ghwa mbari yedu;

³naro dariwusa kwa chawucha, andu kose kwa kula chia.

⁴Ela sikunde kukumeria ngelo; naalomba kudisikirie kutini kwa wughoma ghwako.

⁵Dawonie mundu uhu oko na ndengwa, ni m'bonyi sheshe aghadi ya Wayahudi wose wurumwengunyi kose, nao ni kilongozi cha dini ya Wanazareti.

⁶Hata oretimieghe kuilusha Hekalu ela dikaammbwada. [Derekundieghe dimtanye karakara na Sharia edu,

⁷ela m'baa wa majeshi Lusia ukacha na kumfunya mikonunyi kodu kwa ndighi mbaa;

⁸ukifunya momu wei washitaki wake wiche kwako.] Kwa kumkotia kumoni kuchamanya malagho ghose dimshitakiagha nagho.”

⁹Wayahudi wikawadana wikirumiria kukaia malagho agho ghose ni loli.

¹⁰Nao iji m'baa wa isanga wamkunyiria udede, Paulo ukatumbulia, “Ini namanya angu oho kwakaie mtanyi aighu ya mbari ihi kwa miaka mingi, kwa huwu nichakudederia imbiri kwako kwa ngolo ielie.

¹¹Oho kwadima kulola wuloli kumoni, na kumanya angu ndeghiidie matuku ikumi na awi kufuma nijokie kwenda Jerusalemu.

¹²Wayahudi ndewiniwonie ngibonya nganyi angu kungira sheshe kwa mndungi; ikaiagha Hekalunyi, sunagoginyi, angu mzinyi.

¹³Hata ndewidimagha kuwonyera wuloli ghwa malagho winishitakiagha nagho idana anduangi.

¹⁴Ela ilagho iji, ijo najirumiria, kukaia naawuyamtasa Mlungu wa weke aba kunughana na ija Chia wiiwangagha ya tee, ngirumiria maza rose riwikilo ni Sharia, na kuandikwa ni walodi.

¹⁵Neko na isuwirio kwa Mlungu, ijo jeni nawo wawuyajirumiria; kukaia, kuchakaia na kuruka kwa wafu kwa wandu wose, wecha na wawiwi.

¹⁶Kwa huwo naawuyafunga ndighi matuku ghose nisekaie na ikosa jingi imbiri ya Mlungu, na imbiri ya wandu wori.

¹⁷“Nyuma ya kukaia kula kwa miaka milazi, nerechieghe ngiwiredia wandu wa mbari yapo makuwio na mafunyo.

¹⁸Ngelo iyo, niko winikue andenyi ya Hekalu nameria kukuelesha; nani serekwanyeghe na izungu jingi ja wandu, hata serekoghe ngibonya nganyi ingi anduangi.

¹⁹Ela Wayahudi wamu wifumie Asia, nawo weni yawifwaneghe wikaie aha imbiri kwako, na kureda mashitakio ikakaia wiko na ilagho jingi aighu yapo.

²⁰Angu awa wandu weni ndewighore wuwiwi winiwonie nagho ngelo nerekoghe kimusi imbiri ya mwandu;

²¹isaakaia ilagho iji jeni jimweri nidedie kwa lwaka lubaa ngikaia kimusi aghadi yawo na kughamba, ‘Naawuyatanywa imbiri konyu idime kwa wundu ghwa isuwirio ja kuruka kufuma kwa wafu.’”

²²Ela Felike ukiimanya nicha ija Chia, ukaghufunga mwandu ukighamba, “Iji m'baa wa majeshi Lusia wacha, nichadumbua kesi enyu.”

²³Ukafunya momu kwa m'baa wa masikari angu Paulo ulindilo, ela ukaie na wuhuru ghumu; na mghenyi ungi wake ukundagha kumtesia kwa ilagho jingi useghirilo.

²⁴Nyuma ya matuku ghamu, Felike orechanyeghe na mkake Drusila nao ni Myahudi; ukamdumiria Paulo ukikunda umsikire ukighora malagho aighu ya irumirio jiko kwa Kristo Jesu.

²⁵Nao iji Paulo orekoghe ukija malagho aighu ya hachi, kukumazira, na kuja kutanywa kuchagha, Felike ukaobua ukaghamba, “Idana kwadima kughenda, ngapata wulalo, nikuwanga sena.”

²⁶Chiaimweri na huwo, orekoghe ukisuwiria wei Paulo umneka pesa, kwa huwo ukammbanga mando malazi, ukija malagho nao.

²⁷Ela miaka iwi iendasia, Porikio Festo orewadieghe wulalo ghwa Felike, na Felike ukikunda kuwiboia Wayahudi, ukamsigha Paulo jela.