Read TAITA BIBLE – Biblia Ilagho Jiboie Kwa Wandu Wose MABONYO GHA WADUMI 25 Bible Online

MABONYO GHA WADUMI 25 - TAITA BIBLE – Biblia Ilagho Jiboie Kwa Wandu Wose bible

MABONYO GHA WADUMI 25

¹Nao iji Festo wacha isangenyi kwake, nyuma ya matuku adadu, ukajoka Jerusalemu kufuma Kaisaria.

²Wakohani wabaa na wabaa wa Wayahudi wikamghoria malagho gha Paulo;

³wikamshingira wikimvoya umghenje Jerusalemu, wikikaia na njama emlaliria wim'bwaghe chienyi.

⁴Festo ukatumbulia, “Paulo oowikwa kukaia mfungwa Kaisaria, na nimoni niwuya aho kafwani.

⁵Kwa huwo, wandu wamu wiko na nguma aghadi konyu diseanye, wiende wimshitakie uo mundu ikakaia uko na wuwiwi ghungi.”

⁶Festo ukakaia kwawo sa matuku wunyanya angu ghisechumbagha ikumi, ukasea Kaisaria. Ituku ja kawi ukasea kidombo kifumbinyi cha kutanya, ukafunya momu Paulo uredo.

⁷Paulo uendacha, Wayahudi wifumie Jerusalemu wikakaia kimusi kaavui nao, wikamshitakia kwa maza nyingi ribirie ribirie wisedimagha kuwonyera wuloli ghwaro.

⁸Paulo ukakudederia ukaghamba, “Ini sikosere Sharia ingi ya Wayahudi hata ya Hekalu hata ya Kaisari anduangi.”

⁹Ela Festo ukikunda uwiboie Wayahudi, ukamkotia Paulo, “Kwakunde kujoke Jerusalemu kutanyo ajaeni imbiri kwapo aighu ya maza iri kushitakilwagha naro?” Paulo ukaghamba,

¹⁰“Neeka kimusi imbiri ya koti ya mzuri andu inifwane nitanyo; ini siwikosere Wayahudi kwa ilagho jingi, na oho kwaichi putu.

¹¹Ikakaia niko mmbiwi, nani nabonyere ikosa jingi jinifwane nibwagho, ini sileghagha kufwa anduangi; ela ikakaia nisewadie ikosa aighu ya agho winishitakiagha nagho, mndungi ndenifunyagha kwawo anduangi. Nakata pili kwa Kaisari.”

¹²Hata iji Festo wabonya njama na mwandu ukatumbulia, “Oho kwakata pili kwa Kaisari, kuchaghenda kwa Kaisari.”

¹³Nao iji ghaida matuku ghamu mzuri Agripa na Berinike wikacha Kaisaria kumkaribisha Festo.

¹⁴Nawo iji werekoghe wikikaia aho matuku malazi, Festo ukamghoria mzuri malagho gha Paulo ukighamba, “Oko mundu aha mfungwa, oresighiloghe ni Felike;

¹⁵iji nereghendieghe Jerusalemu, wakohani wabaa na waghosi na Wayahudi, werenijieghe malagho ghake wikinilomba nimtanye.

¹⁶Ela nerewizerieghe angu si tabia ya Waroma kumfunya mndungi imbiri, usekwane na wandu wimshitakiagha wushu kwa wushu, na kupata wulalo ghokudederia aighu ya agho ushitakilwagha nagho.

¹⁷Kwa huwo, iji werechieghe na kukwana aha, sichemuka; nakesho yaro, ngasea kidombo kotinyi, ngafunya momu uo mundu uredo.

¹⁸Hata iji awo wandu weremshitakiagha wawuka, ndewichereda mashitakio ghangi ghiwonyeragha wuwiwi ghwa Paulo aighu ya kesi yake seji neregheshereghe.

¹⁹Malagho werekoghe nagho ni gha nganyi aighu ya irumirio jawo weni, na aighu ya mndumu uwangwagha Jesu ufue, na Paulo waawuyaghamba kedi wei oko moyo.

²⁰Niendalemwa ni kumanya chia nidimagha kupata nayo malagho agho, ngamkotia ngera wakunde kughenda Jerusalemu utanyo aho kwa wundu ghwa agho mashitakio.

²¹Ela Paulo ukakata pili, ukalomba ulindilo, hata kesi yake idumbulo ni Kaisari; nani ngafunya momu ulindilo hata ngelo nichaadima kumghenja kwa Kaisari.”

²²Agripa ukamzera Festo, “Nani moni nakunde nimsikirie uo mundu.” Festo ukatumbulia, “Kesho kuchamsikira.”

²³Nakesho yaro Agripa na Berinike wikacha na wubaa mungi, wikangia chumba chekwanyikia andwamweri na wabaa wa majeshi, na wandu wabaa wa muzi. Festo ukafunya momu, na Paulo ukaredwa andenyi.

²⁴Nao Festo ukaghamba, “Mzuri Agripa, na inyo mmbose muko andwamweri nesi aha, mundu uhu mumbonagha, Wayahudi wose kufuma Jerusalemu hata aha, waawuyanilomba wikikema na kughamba wei ndeifwane uduo moyo.

²⁵Ela ini siwonie ilagho jingi ubonyere jimfwanagha kufwa, na sa iji koni uo moni ukatire pili kwa Kaisari, nawonie nimghenje.

²⁶Elaima siwadie ilagho jingi ja loli aighu yake jemwandikia bwana wapo Kaisari anduangi. Kwa huwo namreda aha imbiri konyu, na kuchumba imbiri kwako mzuri Agripa; eri nyuma ya uo kukotelwa, kewada nadima kupata ilagho jimu jeandika.

²⁷Angu siwonagha wei ni hachi kughenja mfungwa nisewonyeragha mashitakio aighu yake.”