Read TAITA BIBLE – Biblia Ilagho Jiboie Kwa Wandu Wose MABONYO GHA WADUMI 28 Bible Online

MABONYO GHA WADUMI 28 - TAITA BIBLE – Biblia Ilagho Jiboie Kwa Wandu Wose bible

MABONYO GHA WADUMI 28

¹Nao iji dameria kukia, na kuvika ndoe iomie banana, niko dikamanya chija kisiwa chadawangwa Melita.

²Waisanga wikadibonyera wucha m'baa loli-loli; angu werekorieghe modo wikadikaribisha diwose, kwa kukaia vua erezoeghe kunya na ndoe kungira mbeo.

³Paulo ukashoa irio ja mbande, nao ukijikumba modonyi, choka ikafuma ikiwingwa ni modo ikamrighiria mkonu.

⁴Waisanga wiendawona choka ikinyonyora mkonunyi kwa Paulo, wikazerana, “Kwa loli umundu ni m'bwaghi wandu, na hata ngera wakirie baharinyi, ela hachi ndeimsighagha ukaie moyo anduangi.”

⁵Ela Paulo ukaighughudua ija choka modonyi, nao nderepatiroghe ni kiwiwi chingi anduangi.

⁶Wikaweseria wikisuwiria uvimba angu kughwa shwa wori na kufwa; ela wiendawesera luma na kusowa ilagho jingi jizamie jikimpata, wikaghalua maghesho ghawo na kughamba wei uo ni mlungu.

⁷Kaavui na andu aja, korekoghe na mbuwa ra m'baa wa kisiwa uwangwagha Pubilio; nao ukadikaribisha na kudibonyera wucha kwa matuku adadu.

⁸Ndee Pubilio orekoghe mkongo ghwa homa na kufwaya bagha. Paulo ukamghendia na kulomba, nao ukimmbikiria mikonu yake ukam'boisa.

⁹Nyuma ya maza iro, wandu wazima werekoghe wakongo kisiwenyi, wokoni wikacha wikaboiswa.

¹⁰Wikadineka zawadi nyingi, hata iji derezoeghe kudamba, wikakumbiria melinyi vilambo vose derekoghe na bea navo.

¹¹Nyuma ya meri idadu derezoeghe kudamba kwa meli ifumie Alekizanderia erekoghe aho ngelo ya kwari; iwangwagha Masa gha Womi.

¹²Dikavika na kukaia Surakusa matuku adadu.

¹³Kufuma aho dikamara na kubusa Regio. Nyuma ya ituku jimweri, mbeo ya kusinyi ikaweta, na ituku ja kawi dikavika Putioli.

¹⁴Na aho derekueghe wanidu, nawo wikadikaribisha dikaie kwawo matuku mfungade. Niko dikavika Roma.

¹⁵Wanidu wa aho wiendasikira malagho ghedu, wikacha kudimara aja mizi ya Soko ya Apio na Nyumba Idadu ra Waghenyi. Nao iji Paulo wawiwona, ukamfunyira Mlungu chawucha na kukumbwa ngolo.

¹⁶Hata iji davika Roma, Paulo orerumiriloghe kukaia uekeri andwamweri na asikari omlindia.

¹⁷Nyuma ya matuku adadu, ukawiwanga wabaa wa Wayahudi; hata iji wakwanyika andwamweri ukawizera, “Wanidu, hata ngera sibonyere ilagho jingi aighu ya wamzedu, angu mizango ya weke aba, ela nerefungiloghe aja Jerusalemu na kunekerelwa Waroma.

¹⁸Hata iji wanikotia-kotia wikakunda kunifungua angu ndewerewonieghe ikosa jingi jenibonya nibwagho anduangi.

¹⁹Ela Wayahudi wereleghieghe, ngawona suti nikate pili kwa Kaisari, hata ngera saki siwadie mashitakio ghangi aighu ya wamzedu.

²⁰Kwa wundu ughu, niko namlomba diwonane dipate kudedanya; angu neefungwa na mnyororo ughu kwa wundu ghwa isuwirio ja Waisraeli.”

²¹Nawo wikamzera, “Isi ndedipatire barua ringi kufuma Judea rijagha malagho ghako, hata mwanidu ungi wa awa wawuyacha aha ndeghorie angu kudeda ilagho jingi iwiwi aighu yako anduangi.

²²Ela dakunde disikire mawoni ghako kumoni; kwa kukaia isi damanya ihi dini yaawuyaghorwa kiwiwi kula andu.”

²³Hata iji wadumbua ituku jekwana nao, wikacha wandu walazi nyumbenyi kwake. Paulo ukawighoria agho malagho kufuma nakesho hata luma lwa kenyi; ukiwishuhudia malagho gha Wuzuri ghwa Mlungu, na kutima kuwibonya wirumirie malagho gha Jesu kwa kutumia Sharia ya Musa na maandiko gha walodi.

²⁴Wamu wikarumiria malagho ghake, na wamu wikaghilegha.

²⁵Hata iji walemwa ni kupatana weni na weni, wikasighana nyuma ya Paulo kughora huwu, “Ni loli seji Roho Mweli oreghorieghe aighu ya weke ndeyo, kwa kumtumia mlodi Isaya ukighamba:

²⁶‘Ghenda kuwizere wandu awa, Kusikira loli mchasikira, ela jingi ndemchaatambukilwa; na kuzighana loli mchazighana, ela ndemchaawona.

²⁷Angu wandu awa wafue vongo, nawo ndewikunde kusikira; meso ghawo waghitungurisha, wisechewona kwa meso ghawo, na kusikira kwa madu ghawo, na kutambukilwa ngolonyi kwawo, wicheghaluka niwiboise.’

²⁸“Kwa huwu mumanye angu uku kukia kwa Mlungu kwaghenjerwa wandu wa mbari zima, nawo wichasikira.” [

²⁹Paulo uendaghora malagho agho, Wayahudi wikaghenda wikibonyerana nganyi weni kwa weni.]

³⁰Paulo ukakaia aja miaka iwi andenyi ya nyumba oreipangieghe moni, ukawikaribisha wandu wose werechieghe kwake.

³¹Ukachila malagho gha Wuzuri ghwa Mlungu, na kufundisha malagho gha Bwana Jesu Kristo worinyi useghirilwagha ni mndungi.