Read TAITA BIBLE – Biblia Ilagho Jiboie Kwa Wandu Wose MABONYO GHA WADUMI 4 Bible Online

MABONYO GHA WADUMI 4 - TAITA BIBLE – Biblia Ilagho Jiboie Kwa Wandu Wose bible

MABONYO GHA WADUMI 4

¹Nao iji Petro na Johane werekoghe wikidedanya na wandu, wikachelwa ni wakohani na m'baa wa walindiri wa Hekalu, na Masadukayo;

²nawo werekoghe wazamilwa na ndighi, angu awo wadumi wawi werekoghe wikiwichilia wandu malagho gha kuruka kwa Jesu na angu wafu wicharuka.

³Wikawiwada na kuwirughia nyumbenyi wilindilo hata nakesho, angu erekoghe luma lwa kenyi.

⁴Ela wengi wa awo weresikireghe ilagho, wikarumiria; na mtalo ghwa womi ghukavika sa elfu isanu.

⁵Nakesho yaro, wabaa wa Wayahudi, waghosi, na walimu wa Sharia, wikakwana chiaimweri Jerusalemu,

⁶andwamweri na Anasi Mkohani M'baa, na Kayafa, na Johane, na Alekizanda chiaimweri na wandu wazima wose wa kichuku cha Mkohani M'baa.

⁷Hata iji wawireda na kuwiwika wadumi aghadi kwawo, wikawikotia, “Ni kwa ndighi riao angu kwa irina jani mwabonya ilagho iji?”

⁸Niko Petro ukichulwa ni Roho Mweli ukawitumbulia,

⁹“Wabaa wa wandu na waghosi, ngera dakotelwa idime malagho gha ibonyo icha jibonyero kwa mkelemeri seji uboisiro,

¹⁰ndejimanyike konyu na kwa Waisraeli wose kukaia, kwa irina ja Jesu Kristo wa Nazareti, uo moremsulubishireghe, nao moni Mlungu ukamrukisha kufuma kwa wafu, kwa uo, mundu uhu oko kimusi imbiri konyu uboisiro putu.

¹¹Uhu Jesu nuo ughorelo ni Maandiko Ghielie huwu: ‘Igho jerelegheloghe ni inyo waaghi, nijo jawuya ibaa ja mbembenyi.’

¹²Hata ndekuwadie kukia kwa mzima ungi anduangi, angu ndekuwadie irina jingi izima wurumwengunyi kose, jinekelo wadamu jidimagha kudikira.”

¹³Nao iji waghuwona wuwana ghwa Petro na Johane, na kumanya seji ni wandu wa kawaida wisena kishomo chingi, wikashinika; wikawitambua kukaia ni wandu werekwanyeghe na Jesu.

¹⁴Ela wikimmbona uja mundu uboisiro ukwanye nawo, ndeweredimieghe kughora ilagho jingi ja kuwitangala anduangi.

¹⁵Hata iji wawifunya shighadi ya mwandu, wikabonya njama weni na weni wikighamba,

¹⁶“Awandu diwibonya wada? Kwa kukaia wandu wose wikaiagha Jerusalemu wamanya angu ihi alama mbaa niwo weni waibonya, nesi ndedidimagha kuikana anduangi.

¹⁷Ela eri dighirie ilagho iji jiseere kwa wandu wazima, diwikanie wiseghore na mndungi putu kwa irina ja Jesu.”

¹⁸Niko wikawiwanga wingie; wikawikania wiseghore putu hata kufundisha kwa irina ja Jesu.

¹⁹Ela Petro na Johane wikawitumbulia, “Tanyenyi mmbeni ngera ni hachi imbiri ya Mlungu kumsikira inyo kuchumba uo moni;

²⁰ela isi ndedichaaleka kughora malagho dighiwonie na kughisikira anduangi.”

²¹Nawo wiendawizera malagho ghewikumba wowa, wikawifungua. Wikasowa chia ingi ewitirira, angu wandu wose werekoghe wikimkasa Mlungu kwa iro maza rerebonyekieghe.

²²Uo mundu oreboisiroghe orekoghe wachumba irika ja miaka mirongo ina.

²³Nao iji wameria kufungulwa, wikawighendia wambao na kuwighoria seji werezereloghe ni wakohani wabaa na waghosi.

²⁴Nawo iji wasikira agho, wikamlomba Mlungu chiaimweri kwa chwaka rawo wikighamba, “Ee Bwana, Muumbi mlungunyi na ndoenyi na bahari na vose viko andenyi yaro;

²⁵kwa momu ghwa aba odu Daudi mdumiki wako, koreghorieghe kwa Roho Mweli: ‘Kwaki wandu wa mbari zima wabia, na wandu kubonya njama ra duu?

²⁶Wazuri wa ndoenyi wakudeghie, na wabaa wikakwana chia imweri wimtangale Bwana na kulwa na Kristo wake.’

²⁷Angu loli Herode na Pontio Pilato, chiaimweri na wandu wa mbari zima na Waisraeli, werekwanyikieghe andenyi ya muzi ughu wilo na mdumiki wako Jesu, uo koremshingieghe mavuda.

²⁸Nawo werebonyereghe ghose korekundieghe ghikatisho kwa mpango ghwako.

²⁹Idana ee Bwana, zighana kukumba wowa kwawo; kuwineke wadumiki wako kujighora ilagho jako kwa wuwana ghose;

³⁰na oho ghorua mkonu ghwako kuboise, na kubonya weke mwakilimbiti na mashiniko kwa irina ja mdumiki wako Mweli Jesu.”

³¹Hata iji wameria kulomba, andu aja werekwanyikieghe kukasughusika; wikachulwa ni Roho Mweli wose, na kughora Ilagho ja Mlungu kwa wuwana.

³²Wandu wose wererumirieghe werekoghe na nia imweri na roho imweri, hata mndungi ndereghorieghe wei kindo chingi ni chake moni uekeri anduangi; ela werekoghe na wungara ghwa vilambo vose.

³³Wadumi wikashuhudia kwa ndighi mbaa malagho gha kuruka kwa Bwana Jesu, na mvono mungi ghorekoghe aighu kwawo wose.

³⁴Hata ndekorekoghe na mndungi aghadi kwawo oresowieghe kindo chingi; angu wose werekoghe na ndoe, angu nyumba, wereriuzireghe wikareda pesa ra ivo vilambo vereuziroghe.

³⁵Wikarireda kwa wadumi, na kula mundu ukawaghilwa sa iji orekundieghe.

³⁶Huwo koni Josefu, uhu orewangiloghe ni wadumi Barnaba (kutambua kwaro ni mundu okumba ngolo) nao ni Mlawi, muisanga wa Kupro,

³⁷ukauza ndoe yake ukareda pesa kwa wadumi.