Read TAITA BIBLE – Biblia Ilagho Jiboie Kwa Wandu Wose MABONYO GHA WADUMI 5 Bible Online

MABONYO GHA WADUMI 5 - TAITA BIBLE – Biblia Ilagho Jiboie Kwa Wandu Wose bible

MABONYO GHA WADUMI 5

¹Ela mndumu uwangwagha Anania na mkake Safira, wereuzireghe ndoe yawo;

²ukawaghanya pesa, ukawika ifungu jimu, mkake ukimanya; ukareda ifungu jimu na kuwineka wadumi.

³Nao Petro ukamzera, “Anania, kwaki kwamneka Shetani wulalo ukachua ngolonyi kwako, hata kumkalie Roho Mweli na kuwikia mbai ifungu jimu ja pesa ra ndoe?

⁴Welee, iji kusereiuzireghe, ndeerekoghe yako cheni anguwada? Huwo koni, nyuma ya kuiuza, pesa nderedeeka rako reni? Yakaia wada oho kubonya njama ihi ngolonyi kwako? Ndekumkalie mdamu anduangi, ela kwaamkalia Mlungu.”

⁵Nao iji Anania wasikira malagho agho, ukaghwa andonyi ukafwa; na wandu wose weresikireghe ilagho ijo, wikangilwa ni wowa m'baa.

⁶Wadawana wikawuka, wikamrighiria nguwo, wikamfunya shighadi na kumrika.

⁷Konyuma, mkake ukangia nyuma ya masaa sa adadu huwu; nao nderemanyireghe ilagho jingi ja agho gherebonyekieghe anduangi.

⁸Petro ukamzera, “Nighorie, iri pesa niro reni mpatire kwa kuuza ndoe?” Ukaghamba, “Hee niro reni.”

⁹Nao Petro ukamzera, “Yakaia wada inyo kurumiriana mumtime Roho wa Bwana? Sikira, wandu wamrika mmigho weko mnyangonyi, nawo wichakuduka oho wori cha shighadi.”

¹⁰Nao shwa wori Safira ukaghwa maghunyi kwa Petro ukafwa. Wadawana wiendangia wikamkua wafwa, wikamduka cha shighadi na kumrika kaavui na mumi.

¹¹Ikanisa jose, na wose weresikireghe ilagho ijo, wikangilwa ni wowa m'baa.

¹²Nao wadumi wikabonya weke mwakilimbiti wengi na mashiniko aghadi ya wandu. Nawo werekoghe wose andenyi ya Lukumbi lwa Solomoni.

¹³Ndekorekoghe na mndungi mzima oredimieghe kurangana nawo, ela wandu wikawineka ishima ibaa.

¹⁴Wandu wengi wa womi na wa waka wikamrumiria Bwana, na mtalo ghwawo ghukachurikia na ndighi.

¹⁵Hata wakongo wikadukwa na kuwikwa mawulinyi na mikekenyi chienyi, eri Petro ukakaida kirerendi chake chiwivikie wamu wawo.

¹⁶Wokoni wandu wa mizi mizima iko mbai-mbai ya Jerusalemu wikacha wikidwa wakongo, na wandu werekoghe wikijishwa wasi ni pepo ra makakala, nawo wikaboiswa wose.

¹⁷Niko Mkohani M'baa andwamweri na wandu wake, wa ifungu ja Masadukayo, wikawadwa ni iriso ibaa;

¹⁸wikawiwada wadumi na kuwingira jela.

¹⁹Ela kio ghadi malaika wa Bwana ukairughua minyango ya jela na kuwifunya shighadi ukawizera,

²⁰“Ghendenyi mkaie kimusi Hekalunyi, muwighorie wandu malagho ghose gha irangi iji iwishi.”

²¹Nao wadumi wikasikira, na iji ndoe yaela wikangia Hekalunyi wikafundisha. Nao Mkohani M'baa ukacha andwamweri na awo werekwanyeghe, ukawanga mwandu, na wabaa wose wa Israeli, ukaduma wadumi wiredo kufuma jela.

²²Ela iji wabaa wa jela wavika wikawisowa, wikawuya na kughora,

²³“Dakua jela irughilo nicha, na walindiri wiko minyangonyi, ela iji darughua, ndediwonie mndungi andenyi anduangi!”

²⁴M'baa wa walindiri wa Hekalu na wakohani wabaa wiendasikira agho, wikakambwa ni chongo wisemanyagha ni ilaghoki ijo.

²⁵Niko mndumu ukacha na kuwizera, “Waja wandu morewifungieghe weko kimusi Hekalunyi wiafundisha wandu.”

²⁶Nao uja m'baa wa walindiri andwamweri na watini wake, wikaghenda na kuwireda wadumi; ela si kwa ndighi, angu wereobueghe kulaswa na magho ni wandu.

²⁷Nao iji wawireda, wikawiwika imbiri ya mwandu; na Mkohani M'baa ukawikotia ukighamba,

²⁸“Deremlaghirieghe nandighi msefundishe kwa irina iji, ela hoku mwaichura Jerusalemu yose na mafundisho ghenyu, nenyo mookunda kureda njowe ya bagha ya mundu uhu aighu yedu.”

²⁹Ela Petro na wadumi wambao wikatumbulia, “Ni suti dimsikire Mlungu kuchumba wadamu.

³⁰Mlungu wa weke wawa wedu wamrukishire Jesu, uo morem'bwaghieghe kwa kumnyonyoresha mdinyi.

³¹Nao moni, Mlungu oremjosereghe nandighi kwa mkonu ghwake ghwa kiwomi ukaie Kilongozi na Mkiri, uwineke Waisraeli kuhea na kulekelwa kaung'a.

³²Isi deko washahidi wa maza iri, andwamweri na Roho Mweli wori uo Mlungu uwinekagha wose wimsikiragha.”

³³Nao iji wandu wa mwandu wasikira malagho agho, wikajokwa ni machu loli-loli, wikakunda kuwibwagha.

³⁴Ela Mfarisayo umu uwangwagha Gamalieli, nao ni mwalimu wa Sharia, unekelo ishima ni wandu wose, ukawuka kimusi na kufunya momu waja wandu wifunyo shighadi kutini.

³⁵Ukaghuzera mwandu, “Womi wa Israeli, pimenyi nicha seji mchaawibonya wandu awa.

³⁶Angu kafwani koni, Theuda orewukieghe ukikunda kukuwonyera moni seji uko m'baa, na wandu walazi sa maghana ana wikamnugha; ela orebwaghiloghe na wose weremnughieghe wikasaghisika putu na mpango ghwake ghukafwa.

³⁷Konyuma, Juda wa Galilaya ukawuka matuku gha kutala wandu, ukaruda wandu wamu wikamnugha; nao moni ukabwaghwa, na awo weremnughieghe wikasaghisika wokoni.

³⁸Kwa huwo niamghoria, sighanenyi na awa wandu; ikakaia njama ihi angu kazi ihi ni ya wadamu, ichalema.

³⁹Ela ikakaia ni ya Mlungu, ndemdimagha kuwisima anduangi. Mwadima kuwoneka sa wandu mlwagha na Mlungu.” Nao wikawada maghesho gha Gamalieli,

⁴⁰wikawiwanga wadumi wingie, wikawikaba na kuwilaghira wiseghore ilagho jingi kwa irina ja Jesu, wikawisigha wighende.

⁴¹Niko wikafuma mwandunyi wikiboilwa, angu watalwa kukaia wifwane kusowelwa ishima kwa wundu ghwa irina ijo.

⁴²Na ituku ituku, Hekalunyi na nyumbenyi ndeweresighieghe kumchila Jesu kukaia Kristo anduangi.