Read TAITA BIBLE – Biblia Ilagho Jiboie Kwa Wandu Wose MABONYO GHA WADUMI 9 Bible Online

MABONYO GHA WADUMI 9 - TAITA BIBLE – Biblia Ilagho Jiboie Kwa Wandu Wose bible

MABONYO GHA WADUMI 9

¹Ngelo iro, Sauli orekoghe ukiwikumba wowa warumirii wa Bwana na kukunda kuwibwagha. Ukaghenda kwa Mkohani M'baa

²ukalomba barua ughende naro sunagoginyi ra Dameshki, eri ukawona wandu wangi wawuyainugha Chia ya Bwana, womi angu waka, uwifunge na kuwireda Jerusalemu.

³Nao iji orekoghe ukidamba, ukavika kaavui na Dameshki, nao shwa mwengere ghukang'ala-ng'ala kufuma mlungunyi chia rose kwake.

⁴Ukaghwa andonyi, ukasikira lwaka lukimzera, “Sauli, Sauli! Kwaki kunikorongagha?”

⁵Ukaghamba, “Nani oho Bwana?” Nao ukaghamba, “Ini ne Jesu uhu kwawuyamkoronga;

⁶ela wuka kungie mzinyi, na oho kuchaghorelwa agho kuchaabonya.”

⁷Wandu orekoghe ukidambanya nawo, wikakaia kimusi kima; weresikireghe lwaka, ela ndeweremmbonieghe mndungi anduangi.

⁸Sauli ukawuka, hata iji walavua meso, nderedimieghe kuwona kindo chingi; wikammbwadia mkonu na kumdwa hata Dameshki.

⁹Ukakaia usewonagha kwa matuku adadu, na ngelo iyo nderejieghe hata kunywa kindo chingi anduangi.

¹⁰Aho Dameshki, korekoghe na mnughi umu uwangwagha Anania. Bwana ukammbanga kwa mawono, “Anania!” Nao ukadika, “Neko aha Bwana.”

¹¹Bwana ukamzera, “Wuka kughende ija chia iwangwagha Chia Ighorokie, kukotie nyumbenyi kwa Juda mundu uwangwagha Sauli wa muzi ghwa Tariso; huwu waawuyalomba Mlungu,

¹²nao wammbona mundu uwangwagha Anania ukingia na kummbikiria mikonu, eri upate kuwona sena.”

¹³Ela Anania ukatumbulia, “Bwana, nasikire malagho gha uo mundu seji uwikorongie waeli wako aja Jerusalemu,

¹⁴na aha oko na nguma ufumie nayo kwa wakohani wabaa, upate kuwifunga wose wijighoragha irina jako.”

¹⁵Ela Bwana ukamzera, “Ghenda, angu uo moni namsaghue ukaie chombo chapo chejidwa irina japo kwa mbari zima, na wazuri, na wandu wa Israeli;

¹⁶angu ini nichammbonyera seji ichaamfwana kutirirwa kwa wundu ghwa irina japo.”

¹⁷Niko Anania ukaghenda ukangia ija nyumba, ukammbikiria Sauli mikonu ukighamba, “Mwanidu Sauli, uja Bwana Jesu orekufutukieghe chienyi kukicha, waniduma kupate kuwona kwako na kuchulwa ni Roho Mweli.”

¹⁸Nao shwa wori vishindo vimu sa makoko vikapotoka kufuma mesonyi kwake, ukawoka kuwona sena. Nao ukawuka kimusi ukabaputizwa,

¹⁹ukaja vindo ukapata ndighi. Sauli orekaieghe andenyi ya Dameshki kwa matuku malazi gheni chiaimweri na wanughi.

²⁰Nao shwa wori ukazoya kumchila Jesu andenyi ya masunagogi ukighamba, “Jesu ni Mwana wa Mlungu.”

²¹Wose weremsikireghe wikashinika wikighamba, “Welee, uhu mundu suo moni orekoghe ukiwitotesha wandu awo werekoghe wikijighora iji irina Jerusalemu anguwada? Na aha nako oocha kwa wundu ugho ghoni, uwifunge na kuwighenja kwa wakohani wabaa.”

²²Ela Sauli ukafunga ndighi kuchila na kuwinyamira Wayahudi werekoghe Dameshki kwa kuwiwonyera seji Jesu nuo Kristo.

²³Nao iji ghaida matuku malazi, Wayahudi wikabonya njama em'bwagha Sauli;

²⁴ela njama yawo ikamanyika kwa Sauli. Wikamlaliria mbengenyi kio na dime wim'bwaghe,

²⁵ela wanughi wake wikamfunya nakio, na kumsera wurighenyi uko andenyi ya kikapu.

²⁶Hata iji Sauli wacha Jerusalemu, ukatima kuwadana na wanughi; ela wose wikamuobua angu ndewererumirieghe wei uo ni mnughi anduangi.

²⁷Ela Barnaba ukamdwa na kumreda kwa wadumi; ukawighoria seji Sauli ummbonie Bwana chienyi uo oreghorieghe nao, na seji uchilie kwa irina ja Jesu kwa wuwana andenyi ya Dameshki.

²⁸Niko Sauli ukakaianya nawo, ukaghenda ii chia na ii chia andenyi ya Jerusalemu ukichila kwa wuwana kwa irina ja Bwana.

²⁹Sena ukaja malagho na kusimana na Wayahudi wa Kigriki, ela awo wikalola kum'bwagha.

³⁰Ela iji wanidu wamanya ilagho ijo, wikamghenja Kaisaria, na kumsigha ughende Tariso.

³¹Niko ikanisa jikakaia na sere Judea kose, Galilaya na Samaria, jikiaghika kiroho; najo jikighenda imbiri kwa kumuobua Bwana, na kuhoreshwa ni Roho Mweli, jikachurikia.

³²Hata iji Petro orekoghe ukighenda ii chia na ii chia aghadi yawo, ukasea kuwiwona waeli werekoghe wikikaia Luda.

³³Ukamkua mndumu aja uwangwagha Ainea uko na wukongo ghwa kupooza, ulale wulinyi miaka wunyanya.

³⁴Petro ukamzera, “Ainea, Jesu Kristo wakuboisa, wuka kuale wuli ghwako.” Nao ukawuka shwa wori.

³⁵Wandu wose wa Luda na Sharoni wikammbona, wikamghalukia Bwana.

³⁶Na aja Jopa korekoghe na mnughi umu uwangwagha Tabitha, kigriki ni Dorkasi (kutambua kwaro ni shaa.) Muka uhu orekoghe na mabonyo mecha na kufunya makuwio.

³⁷Matuku agho orewurieghe mkongo ukafwa, hata iji wamuoghosha, wikammbika chumbenyi gorofenyi.

³⁸Na angu Luda korekoghe kaavui na Jopa, wanughi wikasikira angu Petro oko aho, nawo wikaduma wandu wawi kumzera, “Dakuvoya kudichee shwa-shwa.”

³⁹Petro ukawuka na kughendanya nawo. Nao iji wavika, wikamghenja gorofenyi. Waka wose wifulo ni womi, wikakaia kimusi kaavui nao wikilila, na kummbonyera Petro makoti na nguwo rose Dorkasi oreribonyereghe iji orekoghe moyo.

⁴⁰Ela Petro ukawifunya shighadi wose, ukadunga ngokoro ukalomba Mlungu; niko ukaighalukia gharia ukaghamba, “Tabitha wuka.” Nao ukalavua meso; hata iji wammbona Petro, ukasea kidombo.

⁴¹Petro ukammbwada mkonu ukammbusira. Niko ukawiwanga waeli andwamweri na waka wifulo ni womi, ukamreda kwawo uko moyo.

⁴²Ilagho ijo jikamanyika isanga jose ja Jopa, na wengi wikamrumiria Bwana.

⁴³Petro ukakaia Jopa kwa matuku malazi andwamweri na mndumu ubonyagha kazi engira mirongo rangi, uwangwagha Simoni.