Read TAITA BIBLE – Biblia Ilagho Jiboie Kwa Wandu Wose WAROMA 10 Bible Online

WAROMA 10 - TAITA BIBLE – Biblia Ilagho Jiboie Kwa Wandu Wose bible

WAROMA 10

¹Wanidu, bea ya ngolo yapo na ilombi japo kwa Mlungu ni angu wamzedu wikie.

²Angu neko na wushuhuda aighu yawo kukaia wamkunde Mlungu na ndighi, ela weesowa kumanya kwa loli.

³Angu wiendakaia wiseimanyagha ija hachi ifumagha kwa Mlungu, na kulola kuimangisha hachi yawo cheni, ndewicheirumiria hachi ya Mlungu.

⁴Angu Kristo nuo kutua kwa Sharia, eri uo ose urumiriagha utalo kukaia na hachi.

⁵Musa oreandikieghe kukaia, mundu uo ose ubonyagha hachi kwa chia ya kuikatisha Sharia uchakaia moyo.

⁶Ela hachi iko kwa chia ya irumirio yaghamba, Kusakeghamba ngolonyi kwako wei, “Nani ujokagha mlungunyi?” (huwo ni kumsera Kristo andoenyi)

⁷angu “Nani useagha andu kwa wafu?” (huwo ni kumjosa Kristo kufuma kwa wafu.)

⁸Ela ighora wada? Iaghora, Ilagho jeko kaavui kwako, momunyi kwako na ngolonyi kwako; (ijo nijo ilagho ja irumirio dawuyajichila.)

⁹Angu ngera kuchamghora Jesu kwa momu ghwako kukaia ni Bwana, na kurumiria ngolonyi kwako kukaia Mlungu wamrukishire kufuma kwa wafu, kuchakia.

¹⁰Angu kwa ngolo mundu uarumiria, nao uatalwa kukaia na hachi; na kwa momu ghwake uaghora, nao uakirwa.

¹¹Maandiko ghaghamba, “Mundu uo ose urumiriagha kwake ndechaafushwa waya anduangi.”

¹²Angu ndeghuko wuchumbano ghungi aghadi ya Myahudi na Mgriki anduangi; uo Bwana ni Bwana wa wose, nao wadawidiria marasimio ghake kwa wungi wose wimlombagha.

¹³Angu, “Uo ose uchaajiwangia irina ja Bwana uchakia.”

¹⁴Ela wandu wichajiwangia wada irina jake uo wisemrumirie? Nawo wichamrumiria wada uo wisemsikire jingi? Nawo wichasikira wada ngera mchili useko?

¹⁵Na wandu wichila wada ngera wisedumilo? Sa iji iandikilo, “Kwaboie nandighi kucha kwa awo wandu wiredagha Ilagho Jiboie.”

¹⁶Ela si wose wijirumirie ijo Ilagho Jiboie; angu Isaya waghambie, “Bwana, nani oreghirumirieghe malagho ghedu?”

¹⁷Kwa huwo irumirio jiachanya na kusikira Ilagho, na jija Ilagho jiachanya na kumchila Kristo.

¹⁸Ela niakotia, da loli ndewisikire? Loli wasikire putu, angu: “Chwaka rawo rasikirikie ndoenyi kose na madedo ghawo ghaerie hata kutua kwa ndoenyi.”

¹⁹Na sena niakotia, welee, Waisraeli ndeweretambukiloghe? Musa wazoe ukaghamba, “Nicham'bonya mmbwado ni iriso, ja awo wandu wiseko mbari; Nicham'bonya mjoko ni machu, kwa mbari isetambukilwagha.”

²⁰Isaya nao wadeda kwa wuwana ukighamba, “Nawonelo ni wandu wiserenilolieghe, nakuwonyere ini moni kwa awo wiserenikotereghe.”

²¹Ela kwa wundu ghwa Waisraeli waghamba, “Dime dii nawighoruya mikonu yapo wandu wileghagha wisesikiragha.”