Read TAITA BIBLE – Biblia Ilagho Jiboie Kwa Wandu Wose WAROMA 11 Bible Online

WAROMA 11 - TAITA BIBLE – Biblia Ilagho Jiboie Kwa Wandu Wose bible

WAROMA 11

¹Da niakotia welee, huwu Mlungu oowilegha wandu wake? Hata kutini. Ini moni ne Muisraeli, kivalwa cha Abrahamu, wa mbari ya Benjamini.

²Mlungu ndewileghie wandu wake awo orewimanyireghe kufuma imbiri. Wele ndemmanyire agho ghighorelo ni Maandiko aighu ya Elija seji orekoghe ukimvoya Mlungu aighu ya Israeli ukighamba,

³“Bwana, wawibwaghie walodi wako, na kurivuchua madhabahu rako, nani naasighwa niekeri; nawo waawuyalola kunibwagha.”

⁴Ela Mlungu wamtumbulie wada? “Neko na wandu elfu mfungade wisemdungie Baali ngokoro.”

⁵Ni huwo koni idana; weko wandu watini wisigharikie, awo Mlungu uwisaghue kwa mvono ghwake.

⁶Ela ikakaia uko kusaghulwa ni kwa mvono, ndekukaiagha sena kwa mabonyo anduangi; ngera ni huwo kumangu mvono si mvono ghungi.

⁷Da ni wada? Icho Waisraeli werechilolagha cheewilema kupata. Wasaghulwa awo wapatire, ela wazima wikaakurishwa ngolo;

⁸sa iji koni iandikilo, “Mlungu oowineka roho ya wukelu, meso ghisewonagha, na madu ghisesikiragha hata idime.”

⁹Na Daudi waghora, “Karamu rawo nderiwuye midegho ewiwada, wipate kughwa na kunekwa adhabu;

¹⁰meso ghawo ndeghisero kira wisewone, na mighongo yawo kuikomeshe matuku ghose.”

¹¹Idana nakotia, Wayahudi weekuwa wipate kughwa putu? Hata kutini. Ela kwa chia ya kiwiwi chawo, kukia kwawivikie wandu wa mbari zima; eri Waisraeli wiwado ni iriso.

¹²Idana ikakaia ikosa jawo jiareda mecha wurumwengunyi kwa wungi, na kulemwa kwawo kuareda mecha kwa wandu wa mbari zima kwa wungi, kukata kwawo-lee kuchachumba saki kureda marasimio?

¹³Idana niaghora nenyo wandu wa mbari zima, ini moni ngikaia mdumi wa iro mbari zima; naghukasa wudumiki ghwapo

¹⁴eri niwibonye wamzedu Wayahudi kukaia na iriso, na kwa chia iyo nikire wamu wawo.

¹⁵Ikakaia kuleghwa kwawo kuaghuredia wurumwengu kupatana na Mlungu, kurumirilwa kwawo-lee kuchakaia wada? Si irangi kwa awo wifue?

¹⁶Ikakaia idonge ja mufu ghwa mkate jifunyiro kizongona sa mavalo gha imbiri jaelie, huwo koni mufu ghose ghooela; na ikakaia kirimba cha mudi chaelie, mbashu wori raelie.

¹⁷Ela ngera awo sa mbashu ra mzeituni rerechikanyiroghe, na oho sa lumbashu lwa mzeituni ghwa isakenyi kukakakadishirwa wulalo ghwawo, eri kuwaghilo kuja kudeghedeka ni mzeituni ghwa loli;

¹⁸kusekukase aighu ya mbashu. Kukakukasa, manya oho suo ungi kwawuyachimazira kirimba ela kirimba nicho chawuyakumazira oho.

¹⁹Kwadima kughamba, “Mbashu redechikanywa niwone kakadishirwa.”

²⁰Iyo ni loli. Ela redechikanywa angu wileghie kurumiria, na oho kwaawuyamanga kwa ijo irumirio jeni. Kwa huwo kusekukase, ela kuobuo.

²¹Angu ngera Mlungu ndererilekieghe rija mbashu ra asili, huwo koni ndechaakuleka oho wori.

²²Idana wona wucha ghwa Mlungu na kubia kwake. Wabirie kwa awo wighue, ela ni mucha kwako, ikakaia kwadua andenyi ya ugho wucha ghwake; si huwo, na oho wori kuchadumbulwa wokoni.

²³Na awo Wayahudi wori iji wasigha uko kulegha kurumiria kwawo, wichawunjwa andu kwawo kwa imbiri; angu Mlungu oko nandighi rewiwunja sena.

²⁴Angu ngera oho mundu wa mbari zima kwa asili kuko sa mzeituni ghwa isakenyi, kwadumbulo na kukakadishirwa kwa mzeituni ghwa mbuwenyi kwa asili ghuseko ghwako, kuchumba nandighi mbashu ra mizeituni ya mbuwenyi richakakadishirwa kwa mudi ghwawo ghoni.

²⁵Wanidu, nakunde mmanye maza iri rivisikie, msechekalikia kwa kumanya konyu. Kughilika kwa Waisraeli kuchakaia kwa ngelo imu, hata mtalo ghwa wandu wa mbari zima wimghalukiagha Mlungu ghukatie;

²⁶kwa huwu Waisraeli wose wichakia, sa iji iandikilo, “Mkiri uchacha kufuma Sioni nao uchaghuinja wuwiwi ghwa Jakobo

²⁷na iji nijo jichaakaia ilaghano japo nawo, iji nachawiinjira kaung'a rawo.”

²⁸Kunughana na Ilagho Jiboie, Wayahudi wakaia wamaiza wa Mlungu, kwa wundu ghonyu inyo wandu wa mbari zima; ela kunughana na kusaghulwa, awo wakaia wakundwa kwa wundu ghwa weke wawa wawo.

²⁹Angu agho manosi na uko kuwanga kwa Mlungu ndekughaluswagha anduangi.

³⁰Na sa iji koni morekoghe msemsikiragha Mlungu aho imbiri, ela idana mwafuilo wughoma kwa wundu ghwa kulegha kwawo;

³¹huwo koni wakaia wisesikiragha idana, eri kwa ugho wughoma ghuwonyero konyu, nawo weni wighupate ugho wughoma.

³²Angu Mlungu oowiwika wandu wose wikaie andenyi ya wundu ghumweri ghwa kulemwa kusikira, eri upate kuwifuya wughoma wose.

³³To! E mali, na hikima, na kumanya kwa Mlungu viko ndenyi! Nani udimagha kumanya kutanya kwake? Na nani udimagha kumanya chia rake?

³⁴“Angu nani uichi nia ya Bwana? Na nani orekoghe mnjama wake?

³⁵Angu nani umnekie kindo chingi imfwane uwunjiro?”

³⁶Angu vilambo vose vadafuma kwake, vadakaia kwa kudima kwake na kwa wundu ghwake. Wubaa ndeghukaie kwake kwa kala na kala. Amen.