Read TAITA BIBLE – Biblia Ilagho Jiboie Kwa Wandu Wose WAROMA 13 Bible Online

WAROMA 13 - TAITA BIBLE – Biblia Ilagho Jiboie Kwa Wandu Wose bible

WAROMA 13

¹Kula mundu ndewisikire awo wibonyagha nguma, angu ndekuwadie nguma ingi isefumagha kwa Mlungu, na awo wibonyagha nguma weewikwa ni Mlungu.

²Kwa huwo uo uwitangalagha awo wibonyagha nguma, waawuyatangala awo wiwikilo ni Mlungu; na awo witangalagha wichatanywa.

³Angu awo wibonyagha nguma ndewiobolwagha ni awo wibonyagha nicha anduangi, ela wadaobolwa ni awo wibonyagha kiwiwi. Kwakunde kusemuobuo uo ubonyagha nguma? Bonya nicha, na oho kuchawona ukikurumiria;

⁴angu uo moni ni mdumiki wa Mlungu, kwa wundu ghwa fwaida yako. Ela ngera kwabonya kiwiwi, kuobuo; kwa kukaia ndedwagha lufu duu, angu uo ni mdumiki wa Mlungu oikatisha adhabu yake aighu ya awo wibonyagha kiwiwi.

⁵Kwa wundu ughu, suti mundu uwisikire awo wibonyagha nguma; si kwa kuobua adhabu ya Mlungu iekeri, ela hata na nia wori yaawuyakutanya wokoni.

⁶Ni kwa wundu ughu mwalipa kodi wori, angu awo wabonyi nguma wikakabonya iro kazi wadamdumikia Mlungu.

⁷Wilipenyi iro riko hachi yawo, kodi kwa uo ufwanagha kodi, wushuru kwa uo ufwanagha wushuru, ishima kwa uo ufwanagha ishima, na kuobua kwa uo ufwanagha kuobolwa.

⁸Msakekaia na sile ingi kwa mndungi, ela iyo cheni ya kukundana mmbeni na mmbeni; angu uo umkundagha mmbao waikatisha Sharia.

⁹Ija memu “Kusakelaka; Kusakebwagha; Kusakeiwa; Kusakebonya iriso,” na memu mizima yose, yawadanishwa chiaimweri ni malagho agha, “Kumkunde mmbenyu sa iji koni kukukunde kumoni.”

¹⁰Kukamkunda mmbenyu, ndekudimagha kum'bonyera kiwiwi chingi anduangi; kwa huwo, lukundo lwadakatisha Sharia yose.

¹¹Chiaimweri na agho, inyo mwamanya ihi ni ngelo ifwane wada; kukaia ni ngelo yavika ya inyo kuwuka kufuma dilonyi. Angu kukia koko kaavui kodu idana kuchumba ngelo iyo derezoeghe kurumiria.

¹²Kio chalighisa kusia, na dime eko kaavui. Kwa huwu idana, ndedisighe iro kazi ra kira na kurwa maswagha gha mwengere.

¹³Ndedighende nicha seji dighendagha na dime; si kwa lwafuo na kuwongia, si kwa kulaka na kushughunuka, si kwa kurashana na iriso,

¹⁴ela Bwana Jesu Kristo ukaie irwao jenyu; hata msakeghubonyera mumbi wulalo ghokatisha bea raro.