Read TAITA BIBLE – Biblia Ilagho Jiboie Kwa Wandu Wose WAROMA 14 Bible Online

WAROMA 14 - TAITA BIBLE – Biblia Ilagho Jiboie Kwa Wandu Wose bible

WAROMA 14

¹Uo mundu uko mnyonge wa irumirio mkaribishenyi, ela isekaie ni kwa wundu ghwa kusimana aighu ya mawoni ghake.

²Mndumu warumiria wadima kuja vindo vose, uo mnyonge nao wadaaja mbogha ra malemba reni.

³Uo ujagha, usemmenye uo usejagha; hata uo usejagha, usemtanye uo ujagha; angu Mlungu wamrumiria.

⁴Ko ani oho kumtanyagha mdumiki wa wandu? M'baa wake moni nuo umanyagha ngera udima kumanga angu ngera ualemwa. Nao wadima kumanga; angu Bwana oko nandighi remdimisha.

⁵Mndumu watala ituku jimu kukaia jafwane kuchumba izima, umu nao watala matuku ghose kukaia ni karakara. Kula mundu ndemanyisho loli ni akili rake moni.

⁶Uo ujitalagha ituku wajitala kwa kumneka Bwana ishima. Uo ujagha wori, waja kwa kumneka Bwana ishima, kwa kukaia wamfunyira Mlungu chawucha; na uhu usejagha, wasigha kuja kwa kumneka Bwana ishima; nao wamfunyira Mlungu chawucha.

⁷Mndungi ndekaiagha moyo kwa wundu ghwake moni, na mndungi ndefwagha kwa wundu ghwake moni anduangi.

⁸Ngera dakaia moyo, dakaia moyo kwa wundu ghwa Bwana; na ngera dafwa, dafwa kwa wundu ghwa Bwana; niko huwu, ngera deko moyo angu ngera dafwa, isi de wa Bwana.

⁹Kwa wundu ughu Kristo orefueghe na kukaia moyo sena; eri ukaie Bwana wa awo wifue na wa awo wiko moyo wori.

¹⁰Kwaki oho kumtanyagha mwanyinyu? Angu kwaki oho kummenyagha mwanyinyu? Angu isi diwose dichakaia kimusi imbiri ya kifumbi cha kutanya cha Mlungu;

¹¹angu yaandikilo, “Sa iji niko moyo, waghamba Bwana, kula ngokoro ichadungwa imbiri kwapo; na kula mundu uchamkasa Mlungu.”

¹²Kwa huwu, kula umu odu uchafunya mtalo ghwake moni imbiri ya Mlungu.

¹³Kwa wundu ughu disighe kutanyana diweni na diweni, ela bora ditanye huwu: Mndungi usemmbikie mruna ikuwaro angu kighirio chingi chemghusha.

¹⁴Ini namanya, sena nawona loli andenyi ya Bwana Jesu kukaia ndekuwadie kindo chingi chiseelie kwa asili yake anduangi; ela cheeka chiseelie kwa uo mundu uchigheshagha kukaia ndechielie.

¹⁵Ikakaia kuamvavira mwanyinyu kwa vindo kujagha, ndekuwueghenda kwa lukundo anduangi. Kwa kuja kwako, kusemtoteshe mwanyinyu uo Kristo orefueghe kwa wundu ghwake.

¹⁶Kwa huwo kusesighe wucha ghwako ghughoro kwa wuwiwi.

¹⁷Angu wuzuri ghwa Mlungu si kuja na kunywa anduangi, ela ni hachi, na sere, na kuboilwa andenyi ya Roho Mweli;

¹⁸na uhu umdumikiagha Kristo kwa chia ihi, wamrira Mlungu na kurumirilwa ni wandu.

¹⁹Kwa huwo ndedirinughe iro maza riredagha sere, na iro riditesiagha kuaghana diweni na diweni.

²⁰Msakenona kazi ya Mlungu kwa wundu ghwa vindo. Vindo vose loli vaelie, ela ni ikosa kwa mundu kuwishekeria wazima wikuwe kwa wundu ghwa vindo ujagha.

²¹Ni nicha mundu useje nyama, angu kunywa divei, angu kubonya ijo jose jimkuwishagha mruna.

²²Ijo irumirio jako kaia najo kumoni aghadi yako na Mlungu; warasimilwa uo mundu usekutanyagha uo moni kwa ijo ujirumiriagha.

²³Ela uo ujagha uko na kiture, uchasikira kutanywa angu wawuyaja kuseko na irumirio; na icho chose chibonywagha kuseko na irumirio ni kaung'a.