Read TAITA BIBLE – Biblia Ilagho Jiboie Kwa Wandu Wose WAROMA 15 Bible Online

WAROMA 15 - TAITA BIBLE – Biblia Ilagho Jiboie Kwa Wandu Wose bible

WAROMA 15

¹Isi dimange kwa irumirio, yadifwana kughuduka wunyonge ghwa awo wisewadie ndighi, hata disakekuboia diweni anduangi.

²Kula umu odu ndem'boie mmbao uwone nicha, upate kumuagha.

³Angu Kristo nderekuboieghe uo moni, ela sa iji koni iandikilo, “Masholio ghose werekusholieghe oho, ghanipatire ini.”

⁴Angu ijo jose jereandikiloghe kala, jedeandikwa jikaie mafundisho kodu; dipate kukaia na isuwirio kwa chia ya kurumaghia na kukumbwa ngolo ni agho Maandiko.

⁵Na Mlungu wa kurumaghia na kukumba ngolo, ndemneke inyo kukaia na kuja kuchinana mmbeni na mmbeni, na nia imweri kwa Kristo Jesu,

⁶eri mpate kumkasa Mlungu Ndee Bwana odu Jesu Kristo chia imweri, kwa lwaka lumweri.

⁷Kwa huwu, mkaribishane mmbeni na mmbeni, sa iji koni Kristo oremkaribishireghe inyo, kwa wundu ghwa wubaa ghwa Mlungu.

⁸Angu namzera inyo, Kristo orewurieghe mdumiki wa awo wishamishiro, upate kuwonyera wuloli ghwa Mlungu, na kughimangisha agho malaghiro gherenekeloghe weke wawa;

⁹na wandu wa mbari zima wiwonemkasa Mlungu kwa wundu ghwa wughoma ghwake. Sa iji koni iandikilo, “Kwa huwu, nichakukasa aghadi ya wandu wa mbari zima, na kubora makaso gha irina jako,”

¹⁰na sena yaghorelo, “Boilonyi chiaimweri na wandu wake inyo wandu wa mbari zima;”

¹¹na sena, “Mkasenyi Bwana mmbose wandu wa mbari zima, na wandu wose ndewimkase.”

¹²Na Isaya wachuria kughamba, “Mndumu uchacha wa kichuku cha Jese, kuwibonyera nguma wandu wa mbari zima; nawo wichasuwiria kwake.”

¹³Idana uo Mlungu wa isuwirio, ndemchure inyo kuboilwa kose na sere kwa kurumiria, eri mpate kuchulwa ni ijo isuwirio kwa ndighi ra Roho Mweli.

¹⁴Wanidu, ini moni namanya loli seji mchue wucha, na kumanya kose, nenyo mwadima kuwonyerana mmbeni na mmbeni.

¹⁵Ela namwandikia kwa wuwana aighu ya maza rimu, eri nimkumbuse kwa wundu ghwa ugho mvono nerenekeloghe ni Mlungu;

¹⁶nipate kukaia mdumiki wa Kristo Jesu kwa wandu wa mbari zima, kwa ugho wukohani ghwa Ilagho Jiboie ja Mlungu, eri wandu wa mbari zima wikaie kizongona chirumirikiagha kwa Mlungu, chieleshero ni Roho Mweli.

¹⁷Niko huwu, nadima kukukasa kwa wudumiki ghwapo andenyi ya Kristo Jesu kwa wundu ghwa Mlungu.

¹⁸Angu sidimagha kudeda ilagho jingi izima, ela ijo jeni Kristo ujibonyere ukinitumia, ja kuwibonya wandu wa mbari zima wimsikire Mlungu. Nao orebonyereghe huwo kwa madedo na kwa mabonyo wori;

¹⁹kwa ndighi ra weke mwakilimbiti na mashiniko, na kwa ndighi ra Roho Mweli. Huwu namerie kujichila Ilagho Jiboie ja Kristo kufuma Jerusalemu hata Iluriko.

²⁰Bea yapo mbaa ni kujichila Ilagho Jiboie andu Kristo usesikirikie eri nisecheagha aighu ya msingi ghwa mundu mzima;

²¹ela sa iji koni iandikilo, “Awo wiseghorelo malagho ghake jingi, wichawona; na awo wisesikire malagho ghake jingi, wichatambukilwa.”

²²Kwa wundu ughu, nerelemeloghe ni kucha konyu mando malazi.

²³Ela idana, angu nimerie kazi andenyi ya masanga agha, nani kwa miaka milazi nerekundieghe kucha konyu,

²⁴nasuwiria kummbona ngelo niidagha ngighenda Spania; mpate kunidambisha ngighenda, nyuma ya kukanya nenyo kwa ngelo ndini ngiboilwa.

²⁵Elaima naawuyaghenda Jerusalemu idana, kuwighenjera waeli wutesia.

²⁶Angu makanisa gha Makedonia na Akaya wereboiloghe kubonya mchango kwa wundu ghwa wakiwa wiko aghadi ya waeli aja Jerusalemu.

²⁷Werefunyireghe kwa kuboilwa, ela kwa loli erewifwanieghe wibonye huwo; angu ngera wandu wa mbari zima wawaghane na waeli marasimio gha kiroho, yawifwana wandu wa mbari zima nawo weni wiwidumikie waeli kwa marasimio gha kimumbi.

²⁸Kwa huwu iji nameria iyo kazi, na kuwineka icho chichangilo, nichaghenda Spania ngiidiria konyu;

²⁹nani namanya angu ngakacha konyu, nichacha nichue marasimio gha Kristo.

³⁰Namvoya wanidu kwa wundu ghwa Bwana odu Jesu Kristo, na kwa wundu ghwa lukundo lwa Roho, mfunge ndighi andwamweri nani kwa malombi ghenyu. Dimlombe Mlungu kwa wundu ghwapo,

³¹eri nikiro na wandu wiserumiriagha wiko Judea, na wokoni wudumiki ghwapo andenyi ya Jerusalemu ghurumirikie kwa waeli;

³²na kwa lukundo lwa Mlungu, nipate kucha konyu ngiboilwa na kuhoreshwa kwa kukaia andwamweri nenyo.

³³Mlungu wa sere ndekaie andwamweri nenyo mmbose. Amen.