Read TAITA BIBLE – Biblia Ilagho Jiboie Kwa Wandu Wose WAROMA 2 Bible Online

WAROMA 2 - TAITA BIBLE – Biblia Ilagho Jiboie Kwa Wandu Wose bible

WAROMA 2

¹Kwa huwo ndekuwadie ilagho jingi jekudederia ee mdamu, hata ngera koko ani, iji kwamtanya mzima; angu kwa kumtanya, kwaakutanya kumoni; kwa kukaia oho kutanyagha kwadabonya maza iro reni.

²Isi daichi kukaia kutanya kwa hachi kwa Mlungu ni aighu ya awo wibonyagha maza sa iro.

³Oho mdamu, kuwitanyagha awo wibonyagha maza iro, na ii chia kuaribonya kumoni, kuaghesha wei kuchafufunuka kutanya kwa Mlungu?

⁴Angu kwaawuyaghumenya wungi ghwa wucha ghwake, na irumaghio jake ibaa; kusemanyagha angu wucha ghwa Mlungu ghwaawuyakuruda kupate kuhea?

⁵Ela kwa kukulwa ni ngolo kwako, kusene wundu ghohea, kwaawuyakuwikia kumoni machu Ituku ja Kutanywa; iji kutanya kwa hachi kwa Mlungu kuchaafunukulwa.

⁶Angu Mlungu uchamneka kula mundu karakara na kazi rake.

⁷Awo wawuyabonya mecha kwa kurumaghia, wikilola wubaa na ishima, na kudua kwa kala, uchawineka irangi ja kala na kala.

⁸Ela wandu wa sheshe, wiseisikiragha ija loli, wikinugha mawiwi, wichachelwa ni machu na kubia kubaa kwa Mlungu.

⁹Kuchakaia na wasi na kuwawa kwa kula mundu ubonyagha mawiwi; Myahudi kande, na Mgriki wori.

¹⁰Ela kula mundu ubonyagha mecha, uchapata wubaa, na ishima, na sere; Myahudi kande, na Mgriki wori.

¹¹Angu Mlungu ndependeliagha mndungi anduangi.

¹²Awo wose wibonyere kaung'a kuseko na Sharia, wichatota kuseko na Sharia wokoni; nawo wose wibonyere kaung'a wikikaia aisi ya Sharia, wichatanywa kwa Sharia.

¹³Angu si awa wiisikiragha Sharia wiko na hachi imbiri ya Mlungu anduangi, ela ni awa wikatishagha Sharia niwo wichaatalwa kukaia na hachi.

¹⁴Angu wandu wa mbari zima, wisewadie Sharia ingi, iji wabonya kwa asili yawo maza ra Sharia, wakaia Sharia weni hata ngera ndewiwadie Sharia.

¹⁵Wawonyera seji agho ghikundwagha ni Sharia ghaandikilo ngolonyi kwawo; nia rawo naro rikiwishuhudia, na maghesho ghawo ghileghanagha ghikiwishitakia angu kewada ghikiwidederia.

¹⁶Huwo niko ichaakaia iji Mlungu uchaatanya maghesho gha wandu ghivisiro jija ituku, kwa chia ya Kristo Jesu; karakara na Ilagho Jiboie ijo nawuyajichila.

¹⁷Ela ngera kwakuwanga Myahudi, na kukusaghika kwa Sharia, na kukukasa kwa uko kummanya Mlungu kwako,

¹⁸na kumanya lukundo lwake, na kurumiriana na ijo jiko jiboie kuchumba, angu kufundishiro Sharia;

¹⁹na ikakaia loli kwawuyamanya koko kilongozi wa vitungure, mwengere kwa wandu wiko kirenyi,

²⁰mfundishi wa wakelu, mwalimu wa wanake, kukikaia na kumanya kukatie na loli andenyi ya Sharia.

²¹Idana oho kuwifundishagha wazima, ndekudimagha kukufundisha kumoni? Kuachilia wandu wiseiwe, sena kuaiwa kumoni?

²²Oho kughambagha mundu uselake, welee, kualaka kumoni? Oho kuzamilwagha ni milimu, kuaiwa hekalunyi?

²³Oho kukukasagha na Sharia, kuamnonia Mlungu ishima kwa kuinona Sharia?

²⁴Sa iji iandikilo “Irina ja Mlungu jasholelwa aghadi ya wandu wa mbari zima kwa wundu ghonyu.”

²⁵Kushamishwa kwafwane too iji kwaikatisha Sharia; ela iji kwainona Sharia, kushamishwa kwako ndekufwanagha anduangi.

²⁶Ngera mundu useshamishiro waghiwadia mafundisho gha Sharia-lee, uko kusowa kushamishwa kwake ndekuchaatalwa kukaia kushamishwa anguwada?

²⁷Kwa huwo, awo wiseshamishiro kimumbi, nawo waimazira Sharia, wichamtanya inyo mshamishiro muko na malaghiro gha Sharia ghiandikilo, kwa kuinona Sharia.

²⁸Angu Myahudi wa loli si uja uwonekagha kwa meso, hata kushamishwa kwa loli si kuja kuwonekagha mesonyi anduangi.

²⁹Ela Myahudi wa loli ni uo uko Myahudi nandenyi, na kushamishwa kwa loli ni uko kwa ngolonyi, kwa kiroho; siko kuja kwa Sharia iandikilo anduangi. Nao wadakaswa ni Mlungu, ndekaswagha ni wadamu anduangi.