Read TAITA BIBLE – Biblia Ilagho Jiboie Kwa Wandu Wose WAROMA 3 Bible Online

WAROMA 3 - TAITA BIBLE – Biblia Ilagho Jiboie Kwa Wandu Wose bible

WAROMA 3

¹Myahudi wawichumbie wandu wa mbari zima naki? Angu kushamishwa koko na fwaidaki?

²Kwafwana putu kwa kula chia. Imbiri Wayahudi niwo werenekeloghe malagho gha Mlungu.

³Da ikaia wada ngera wamu ndewerekoghe waloli? Welee, kuja kusowa wuloli kwawo kuinja wuloli ghwa Mlungu?

⁴Hata kutini. Ela Mlungu ndeduo mloli, hata ngera wadamu wose wakaia watee; sa iji koni iandikilo, “Kupate kutalwa kukaia na hachi kwa madedo ghako, na oho kusime ngelo ya kutanywa kwako.”

⁵Da dighora wada ikakaia wuwiwi ghodu ghwadumika kwa kuiwonyera hachi ya Mlungu? Dadima kughamba wei Mlungu waawuyabonya makosa kwa kudikaba? (Naghora kimdamu).

⁶Hata kutini. Angu ngera ni huwo-lee, Mlungu uchaghutanya wada wurumwengu?

⁷Ela ikakaia kwa chia ya makosa ghapo, loli ya Mlungu iawonyera wubaa ghwake worinyi, kwaki sena ini niduagha ngitanywa kukaia mkaung'a?

⁸Kwaki diseghambagha, “Ndedibonye mawiwi diwonepata mecha?” Seji wandu wamu widizighiriagha wei niko dighoragha huwo! Kutanywa kwawo ni kwa hachi.

⁹Da ni wada? Isi Wayahudi deko baa? Hata; hata kutini. Namerie kuwonyera kukaia wandu wose walemelo ni kaung'a, Wayahudi hata Wagriki wori;

¹⁰sa iji koni iandikilo, “Ndekuwadie mndungi uko mhachi, ndeko hata umweri;

¹¹ndeko ungi utambukilwagha, ndeuko ungi umlolagha Mlungu.

¹²Wose waghalukie na mbai, nawo wose chiaimweri wikabonya makosa; ndeko ungi wawuyabonya nicha, hata umweri.

¹³Marangi ghawo ni sa kaburi iko iari, watumia chumi rawo kwa kughora tee. Madedo gha memu yawo ni sa wusungu ghwa choka.

¹⁴Kuewia na luwawo vachua memunyi kwawo,

¹⁵waghenda na iseghe wikikunda kudia bagha,

¹⁶andu kose wiidiriagha wanona na kureda wasi,

¹⁷na chia ya sere ndewiichi;

¹⁸hata kumuobua Mlungu kungi ndekuko andenyi kwawo anduangi.”

¹⁹Idana damanya angu ijo jose Sharia ighoragha, yaghora na awo wiko aisi ya Sharia; eri mndungi usepate jekudederia, na wurumwengu ghose ghupate kukaia aisi ya kutanya kwa Mlungu.

²⁰Angu ndekuwadie mndungi uchaatalwa kukaia na hachi imbiri ya Mlungu kwa mabonyo gha Sharia anduangi kwa kukaia kumanya kaung'a koocha kwa chia ya Sharia.

²¹Ela idana chia ya Mlungu epatanisha wandu na Uo moni yamerie kufunukulwa. Ndeiko kwa chia ya Sharia, hata ngera Sharia ya Musa na Walodi waishuhudia;

²²ela Mlungu wadatala wandu kukaia na hachi kwa irumirio jawo andenyi ya Jesu Kristo; nao wadabonya huwo kwa wose wirumiriagha. Kwa kukaia ndekuko kutala wandu kungi anduangi.

²³Angu wose wabonyere kaung'a, na kupungukilwa ni wubaa ghwa Mlungu;

²⁴wiatalwa kukaia na hachi duu kwa mvono ghwa Mlungu sa inosi, kwa chia ya wukomboli ghuko kwa Kristo Jesu;

²⁵uo Mlungu ummbikie ukaie kizongona kwa bagha yake moni, upate kuwuswa kwa irumirio, na kwa chia iyo Mlungu uwonyere hachi yake; angu kwa kurumaghia kwake kwa wulungu, ndereritalieghe kaung'a ra imbiri.

²⁶Erekoghe huwo, eri kwa ngelo iri uwonyere angu uo moni ni mhachi, nao wadam'bonya mundu kutalwa kukaia na hachi uo ose urumiriagha kwa Jesu.

²⁷Da dikukasiraki sena? Ndedina jekukasa. Kwa wundu ghwa indoki? Ni angu wei dawuyakatisha mabonyo gha Sharia? Hata; ela ni kwa wundu ghwa irumirio.

²⁸Angu dawona kukaia mdamu wadatalwa kukaia na hachi kwa irumirio, si kwa kazi ra Sharia reni anduangi.

²⁹Angu huwo Mlungu ni wa Wayahudi wiekeri, si wa wandu wa mbari zima wori anguwada? Hee, ni wa wandu wa mbari zima wori.

³⁰Angu Mlungu ni umweri, nao uchawitala kukaia na hachi wandu wishamishiro kwa wundu ghwa irumirio jawo, na awo wiseshamishiro kwa chia ya ijo irumirio jawo wokoni.

³¹Da huwo keni diainja Sharia kwa wundu ghwa iji irumirio? Hata kutini. Wulalo ghwaro daimazira nicha.