Read TAITA BIBLE – Biblia Ilagho Jiboie Kwa Wandu Wose WAROMA 4 Bible Online

WAROMA 4 - TAITA BIBLE – Biblia Ilagho Jiboie Kwa Wandu Wose bible

WAROMA 4

¹Idana dighora wada aighu ya Abrahamu aba odu wa kala kwa chia ya mumbi?

²Ngera Abrahamu odetalwa kukaia na hachi kwa wundu ghwa mabonyo ghake, kumangu oko na ja kukukasa. Elaima si imbiri ya Mlungu anduangi.

³Angu Maandiko ghaghambagha wada? Nechi ghadaghamba huwu, “Abrahamu oremrumirieghe Mlungu, nao ukatalwa kukaia na hachi.”

⁴Idana mafungu gha m'bonyi kazi ndeghitalwagha kukaia inosi, ela ni hachi yake.

⁵Na mundu usebonyagha kazi, nao warumiria kwa Uo uwitaliagha wandu wisemuobuagha Mlungu wikaie na hachi, irumirio jake mundu uo jatalwa kukaia hachi.

⁶Na Daudi wori waghora malagho gha irasimio kwa mundu utalwagha kukaia na hachi ni Mlungu kuseko na mabonyo gha Sharia gheni:

⁷“Warasimilwa awo wandu wilekelo mawiwi ghawo, na awo wifuilo wughoma kaung'a rawo.

⁸Warasimilwa uo mundu Bwana usemtaliagha kaung'a rake.”

⁹Wele marasimio agha gheeghorwa kwa wundu ghwa wandu wishamishiro wiekeri, angu na kwa awa wiseshamishiro wori? Kwa kukaia dameria kughora, Abrahamu oremrumirieghe Mlungu, na irumirio ijo jikatalwa kwake kukaia hachi.

¹⁰Idana jeretaliloghe lii? Ni imbiri angu ni nyuma ya kushamishwa kwake? Si nyuma, ela ni imbiri useshamishiro.

¹¹Orepatireghe kushamishwa kukaia sa alama angu muhuri ghwa ija hachi oreitaliloghe kwa chia ya irumirio, iji orekoghe useshamishiro. Makusudi gharo ni kum'bonya Abrahamu ukaie ndee wa wose wirumiriagha wiseshamishiro; nawo wipate kutalwa kukaia na hachi.

¹²Wokoni, ukaie ndee wa wandu wishamishiro; awo chiaimweri na kushamishwa kwawo, wawuyanugha fwana ya irumirio ijo aba odu Abrahamu orekoghe najo imbiri useshamishiro.

¹³Ilaghiro orenekeloghe Abrahamu na kivalwa chake, kukaia wichaghupata ifwa wurumwengu, nderelaghiriloghe uchaghupata ifwa wurumwengu kwa kuinugha Sharia, ela ni kwa chia etalilwa hachi ya irumirio.

¹⁴Ikakaia wandu wiinughagha Sharia niwo weni wipatagha ifwa, aho irumirio si kindo chingi, na ilaghiro ja Mlungu ni duu.

¹⁵Angu Sharia yadareda machu gha Mlungu; ela andu Sharia iseko, na kunona Sharia ndekuko wori.

¹⁶Ni kwa wundu ughu ilaghiro jamangishwa ni irumirio, eri ijo ilaghiro jihakikishiro jikaie kwa mvono, kwa kivalwa chose cha Abrahamu. Si kwa awo wiiwadiagha Sharia wiekeri, ela na awo wori wiko na wungara na ijo irumirio ja Abrahamu; angu uo nuo aba odu isi diwose

¹⁷seji iandikilo, “Nakubonya kukaie ndee wa mbari nyingi.” Kwa huwo, ijo ilaghiro jaboie imbiri ya Mlungu, uo orerumiriloghe ni Abrahamu; uo Mlungu urukishagha wafu, na kuvibonya vilambo viserekoghe vipate kukaia.

¹⁸Abrahamu orerumirieghe na kusuwiria icho chisedimikagha kusuwirilwa; niko ucheewuya ndee wa mbari nyingi, sa iji oreghoreloghe, “Kivalwa chako chichakaia kingi sa nyerinyeri.”

¹⁹Ngelo iyo orekoghe mundu wa irika sa ja miaka ighana, ela sena nderepungukiloghe ni irumirio kwa kuririkanya aighu ya mumbi ghwake, ugho ghorekoghe sa ghwa mundu ufue wori; hata aighu ya Sara, uo orekoghe kolowi.

²⁰Ndekorekoghe na ngera ingi em'bonya userumirie ilaghiro ja Mlungu, ela ukachuria kurumiria ukimneka Mlungu wubaa;

²¹ukikaia na loli angu Mlungu wadima kubonya ijo ujilaghirie.

²²Kwa wundu ghwa irumirio jake, Abrahamu oretaliloghe kukaia na hachi.

²³Ela agha malagho, “Oretaliloghe kukaia na hachi,” ndeghereandikiloghe kwa wundu ghwake uekeri anduangi;

²⁴ela ghereandikiloghe kwa wundu ghodu wori. Najo jichatalwa kodu isi dirumiriagha kwake uo oremrukishireghe Jesu Bwana odu kufuma kwa wafu;

²⁵nao orebwaghiloghe kwa wundu ghwa mawiwi ghedu, na kurukishwa kwa wundu ghwa kutalwa kukaia na hachi kodu.