Read TAITA BIBLE – Biblia Ilagho Jiboie Kwa Wandu Wose WAROMA 5 Bible Online

WAROMA 5 - TAITA BIBLE – Biblia Ilagho Jiboie Kwa Wandu Wose bible

WAROMA 5

¹Idana angu dameria kutalwa kukaia na hachi kwa irumirio, deko na sere na Mlungu kwa chia ya Bwana odu Jesu Kristo.

²Uo udiredie kwa irumirio hata dikavikia kughupata ughu mvono dawuyakaia andenyi yaro; nesi daboilwa kwa wundu ghwa ijo isuwirio diko najo jekaia na wungara andenyi ya wubaa ghwa Mlungu.

³Hata si ijo jeni jiekeri anduangi, ela daboilwa andenyi ya matiriro ghedu, dikimanya angu matiriro ghadareda irumaghio,

⁴na irumaghio jadareda kumanga, na kumanga kwadareda isuwirio.

⁵Na isuwirio ndejidifushagha waya; angu lukundo lwa Mlungu lwadirilo ngolonyi kodu kwa chia ya Roho Mweli uo dinekelo.

⁶Iji derekoghe disewadie ndighi, kwa ngelo yaro cheni, Kristo orefueghe kwa wundu ghwa wawiwi.

⁷Jakurie mundu kufwa kwa wundu ghwa mundu ubonyagha hachi; hata ngera kewada kwa wundu ghwa mundu mucha, yadimika mndumu ufo.

⁸Ela Mlungu wawonyera seji udikunde, angu hata iji derekoghe dikikaia kaung'enyi Kristo orefueghe kwa wundu ghodu.

⁹Idana angu dabonywa kukaia na hachi kwa bagha yake, kuchumba na ndighi, Uo uchadikira na machu gha Mlungu.

¹⁰Ikakaia iji derekoghe wamaiza derepatanishiroghe na Mlungu kwa kifwa cha Mwana wake, kuchumba nandighi idana nyuma ya kukundanishwa, dichakirwa kwa irangi jake.

¹¹Hata si ijo jeni jiekeri anduangi, ela daboilwa andenyi ya Mlungu wori kwa chia ya Bwana odu Jesu Kristo uo udipatanishire na Mlungu.

¹²Kwa huwo, sa iji kaung'a erengirieghe wurumwengunyi kwa chia ya mundu umweri, na iyo kaung'a ikareda kifwa, huwo koni kifwa chaidie na kungia kwa wandu wose; angu wose wabonyere kaung'a.

¹³Kaung'a loli erekoghe wurumwengunyi imbiri Sharia isefunyiro, ela kaung'a ndeitalwagha andu Sharia iseko.

¹⁴Elaima sena kifwa cherebonyereghe nguma kufuma ngelo ra Adamu hata ngelo ra Musa, na hata aighu ya wandu wisebonyere ikosa jifwanane na ja Adamu, nao orekoghe fwana ya uo orechagha.

¹⁵Ela inosi ja Mlungu ndejiko sa ijo ikosa ja Adamu. Angu ngera wandu wengi werefueghe wikishekerelwa ni ikosa ja mundu umweri, kuchumba na ndighi, wandu wengi wapatire mvono ghwa Mlungu kwa wungi na inosi jake, kwa chia ya ugho mvono ghwa uja mundu umweri Jesu Kristo.

¹⁶Na inosi ndejiko sa ija kaung'a ya mundu umweri anduangi. Angu ikosa jimweri jeereda kutanywa, ela inosi ni kwa wundu ghwa makosa mengi, eri jipate kureda kutalwa kukaia na hachi.

¹⁷Ikakaia kwa wundu ghwa ikosa ja mundu umweri, kifwa cherebonyereghe nguma kwa chia ya uja mundu umweri, kuchumba nandighi awo wighuwusagha ghuja mvono kwa wungi, na ijo inosi ja hachi, wichabonya nguma iranginyi kwa chia ya mundu umweri Jesu Kristo.

¹⁸Angu sa iji koni ikosa ja mundu umweri jiredie kutanywa kwa wandu wose, ni huwo koni na ibonyo ja hachi ja mundu umweri jaredie kulekwa makosa na kupata irangi kwa wandu wose.

¹⁹Angu sa iji koni kulegha kusikira kwa mundu umweri kuwibonyere wandu wengi kukaia wakaung'a, huwo koni kusikira kwa mundu umweri, wengi wichatalwa kukaia na hachi.

²⁰Sharia erechieghe kuchuria makosa, ela andu kaung'a ichurikie, mvono nagho ghorechurikieghe kuchumba;

²¹eri sa iji koni kaung'a erebonyereghe nguma andenyi ya kifwa, mvono nagho ghubonye nguma kwa chia ya hachi, kuvikia irangi ja kala na kala kwa chia ya Jesu Kristo Bwana odu.