Read TAITA BIBLE – Biblia Ilagho Jiboie Kwa Wandu Wose WAROMA 6 Bible Online

WAROMA 6 - TAITA BIBLE – Biblia Ilagho Jiboie Kwa Wandu Wose bible

WAROMA 6

¹Da dighora wada? Diduo kaung'enyi mvono ghwa Mlungu ghuwonechurikia?

²Hata kutini. Isi difue cha kaung'enyi didima wada kudua moyo andenyi yaro sena?

³Welee, ndemmanyire angu isi diwose dibaputiziro na kungirwa andenyi ya Kristo Jesu dedebaputizwa dingiro andenyi ya kifwa chake?

⁴Kwa huwo darikilo andwamweri nao kwa chia ya wubaputizo, na kukaia ngara nao andenyi ya kifwa chake; eri sa iji koni Kristo orerukishiroghe kufuma kwa wafu, kwa wubaa ghwa uja Aba, nesi wori dighende kwa wuwishi ghwa irangi.

⁵Angu ngera dakaia ngara nao andenyi ya kifwa sa chake, huwo koni dichakaia ngara nao andenyi ya kurukishwa sa kwake.

⁶Nesi damanya angu wudamu ghodu ghwa kala ghwasulubishiro andwamweri nao, mumbi ghwa kaung'a ghupate kutoteshwa; eri isi diseduo wazumba wa kaung'a sena.

⁷Angu uo ufue watanyiro na kaung'a.

⁸Ela ikakaia dafue na Kristo, darumiria angu dichakaia moyo andwamweri nao wori.

⁹Angu damanya Kristo umeria kurukishwa kufuma kwa wafu, ndechaafwa sena jingi; kifwa ndechiduagha na nguma aighu yake anduangi.

¹⁰Icho kifwa orefueghe, odeifuya kaung'a indo jimweri tu; ela irangi uko najo, wadua moyo kwa Mlungu.

¹¹Nenyo mmbeni wori mkutale kukaia mwafue cha kaung'enyi, na kukaia moyo kwa Mlungu andenyi ya Kristo Jesu.

¹²Kwa huwu msesighe kaung'a ibonye nguma andenyi ya mimbi yenyu ifwagha, hata mrumirie kurikatisha bea raro.

¹³Nenyo msevifunye via venyu kwa kubonya kaung'a, sa vombo vebonya mawiwi; ela mkufunye kwa Mlungu, sa wandu wifunyiro kifonyi na kungirwa iranginyi; na via venyu vikaie va Mlungu, sa vombo vebonya hachi.

¹⁴Angu kaung'a ndeichaabonya nguma aighu yenyu anduangi, kwa kukaia ndemduagha aisi ya Sharia, ela moko aisi ya mvono.

¹⁵Da ni wada? Dibonye kaung'a angu diseko aisi ya Sharia deeka aisi ya mvono? Hata kutini.

¹⁶Ndemmanyire angu mkakufunya mmbeni kwa mndungi sa wazumba mumsikireghe, muakaia wazumba wake uo mumsikiragha; ngera ni wazumba wa kaung'a kuvikia kifwa, angu ngera ni wazumba wa kusikira kuvikia hachi?

¹⁷Ela chawucha kwa Mlungu; angu hata ngera morekoghe wazumba wa kaung'a, mwamerie kuwuya wandu wa kusikiria kwa ngolo yose na kukatisha sa iji koni morefundishiroghe.

¹⁸Nenyo mmeria kufunywa kaung'enyi, mwawurie wazumba wa hachi.

¹⁹Niaghora sa wandu wose, kwa wundu ghwa kusowa kutambukilwa konyu. Sa iji koni morefunyireghe via venyu kwa wuchafu, na kubonya wuwiwi ghuchumbie, huwo koni idana muvifunye putu via venyu kubonya hachi kwa wundu ghwa kueleshwa.

²⁰Iji morekoghe wazumba wa kaung'a, morekoghe huru mkikaia kula na hachi.

²¹Morepatireghe fwaidaki ngelo iyo, kwa kubonya maza iro mwawuyariwonia waya idana? Angu kutua kwa maza iro ni kifwa.

²²Ela idana mmeria kufunywa kaung'enyi, na kuwuya wazumba wa Mlungu, fwaida mpatagha ni kueleshwa, na kutua kwaro irangi ja kala na kala.

²³Angu mafungu gha kaung'a ni kifwa, ela inosi ja Mlungu ni irangi ja kala na kala andenyi ya Kristo Jesu Bwana odu.