Read TAITA BIBLE – Biblia Ilagho Jiboie Kwa Wandu Wose WAROMA 7 Bible Online

WAROMA 7 - TAITA BIBLE – Biblia Ilagho Jiboie Kwa Wandu Wose bible

WAROMA 7

¹Wele ndemmanyire wanidu (angu naawuyaghora na wandu wiichi Sharia) kukaia, Sharia yadamfunga mundu iji uko moyo?

²Huwo koni, kwa sharia, muka wadafungwanya na mumi iji uo mumi uko moyo; ela iji mumi wafwa, uo muka wadafungulwa ni ija sharia eremfunganyeghe na mumi wake.

³Kwa wundu ugho, muka ukakanya na mndwawomi mzima iji mumi wake uko moyo, wadawangwa mlaki. Ela mumi ukafwa, wadafungulwa kufuma kwa ija sharia, hata ukalowolwa ni mndwawomi mzima ndekaiagha mlaki anduangi.

⁴Huwo koni wanidu, mwafue cha Sharienyi, kwa chia ya mumbi ghwa Kristo; mpate kuwuya wa mzima, uo orerukishiroghe kufuma kwa wafu; eri dipate kumvaia Mlungu matunda.

⁵Iji derekoghe dikinugha maza ra mumbi, bea redu ra kaung'a rerewusiriloghe ni Sharia, naro rikabonya kazi andenyi ya via vedu, hata rikareda mavalo gha kifwa.

⁶Ela idana dafungulo kufuma Sharienyi, angu dafue ichia cha icho cheredibonyereghe kukaia wazumba, eri disedumike aisi ya malaghiro gha maandiko gha kala, ela didumike andenyi ya irangi iwishi ja Roho.

⁷Da dighora wada? Wei Sharia ni kaung'a? Hata kutini! Angu wei si Sharia, seremanyagha kaung'a. Seremanyagha kubonya iriso niki, ngera Sharia isereghorieghe, “Kusakebonya iriso”.

⁸Ela kwa chia ya momu ugho, kaung'a yapatire wulalo ghongira bea ya kula mbari andenyi kwapo. Kwa kukaia andu Sharia iseko, kaung'a eeka ifue.

⁹Ini moni nerekoghe moyo iji Sharia iserekoghe; ela ghuja momu ghuendacha, kaung'a eeruka, nani moni ngaafwa.

¹⁰Ghuja momu ghoni ghorelaghirieghe kureda irangi, ghoochareda kifwa andenyi kwapo.

¹¹Kaung'a iendapata wulalo kwa chia ya ugho momu, ikanikalia; na kwa ugho, ikanibwagha.

¹²Kwa huwu, Sharia cheni yaelie, na ghuja momu ghwaelie; nagho ni ghwa hachi sena ghwaboie.

¹³Welee, icho chiboie nicho chiwurie chikaniredia kifwa sena? Hata kutini. Ela ni kaung'a ibonyere huwo; ikaniredia kifwa kwa kutumia icho chiko chiboie, eri ipate kuwoneka seji iko kaung'a loli. Niko huwu kwa chia ya ugho momu, kaung'a yawonyerwa seji iko izamie nandighi loli-loli.

¹⁴Isi daichi angu Sharia ni ya kiroho; ela ini ne wa mumbi, niuziro nikaie mzumba wa kaung'a.

¹⁵Siwuemanya seji nawuyabonya, ela ijo jeni nisekunde kujibonya nijo jeni nawuyajibonya.

¹⁶Idana angu naawuyabonya ijo nisejikunde, iawonyera naawuyarumiria wori Sharia yaboie.

¹⁷Kwa huwo si ini ungi nawuyabonya, ela ni ija kaung'a, iyo ikaiagha andenyi kwapo.

¹⁸Naichi andenyi kwapo, nako ni andenyi ya mumbi ghwapo, kilambo chingi kicha ndechikaiagha anduangi.

¹⁹Angu siwuebonya ijo icha nijikundagha, ela icho kiwiwi nisechikunde nicho cheni nawuyachibonya.

²⁰Idana ikakaia naawuyabonya ijo nisejikunde, iawonyera si ini ungi nawuyabonya; ela ni ija kaung'a ikaiagha andenyi kwapo.

²¹Kwa huwu nawuyawona Sharia ihi: kukaia ingelo nikundagha kubonya nicha, niakua ngibonya kiwiwi.

²²Angu naawuyaboilwa ni Sharia ya Mlungu kondenyi kwapo;

²³ela nawuyawona Sharia zima mumbinyi kwapo, ikibonya wuda na ija sharia iko andenyi ya akili rapo; nayo yanidwa wunyika cha sharienyi ya kaung'a, iyo ikaiagha andenyi ya mumbi ghwapo.

²⁴Mundu nijagha wasi ini! Nani uchaanikira na mumbi ughu ghwa kifwa?

²⁵Chawucha kwa Mlungu, uo udimagha kwa chia ya Jesu Kristo Bwana odu! Niko huwu idana, ini nimoni naawuyaidumikia Sharia ya Mlungu kwa akili rapo; ela kwa mumbi ghwapo, naidumikia sharia ya kaung'a.