Read TAITA BIBLE – Biblia Ilagho Jiboie Kwa Wandu Wose 1 WAKORINTHO 1 Bible Online

1 WAKORINTHO 1 - TAITA BIBLE – Biblia Ilagho Jiboie Kwa Wandu Wose bible

1 WAKORINTHO 1

¹Ini Paulo, niwangilo kwa lukundo lwa Mlungu nikaie mdumi wa Kristo Jesu, na mwanidu Sothesene;

²damuandikia inyo ikanisa ja Mlungu jiko Korintho, inyo mmbose mueleshero andenyi ya Kristo Jesu, mmbangilo mkaie waeli, andwamweri na awo wose andu kose wijiwangiagha irina ja Bwana Jesu Kristo; nao ni Bwana wawo na Bwana odu.

³Mlungu Aba odu na Bwana Jesu Kristo, ndemneke inyo mvono na sere.

⁴Namfunyira Mlungu wapo chawucha matuku ghose kwa wundu ghonyu, angu morenekeloghe mvono ghwa Mlungu andenyi ya Kristo Jesu.

⁵Nenyo morenekeloghe vilambo vose kwa wungi kwa kula chia, kwa kudeda, na kwa kumanya;

⁶wokoni sa iji koni wushuhuda ghwa Kristo ghuko andenyi konyu,

⁷hata ndemsowie inosi jingi ja Roho; mkiwesera kuja kufunukulwa kwa Bwana odu Jesu Kristo.

⁸Uo uchamlindia inyo hata kutua, mpate kukaia msewadie ikosa jingi Ituku ja Bwana odu Jesu Kristo.

⁹Mlungu ni mloli, uo oremmbangieghe mungie andenyi ya wungara ghwa Mwana wake Jesu Kristo Bwana odu.

¹⁰Namvoya wanidu kwa irina ja Bwana odu Jesu Kristo, msikirane; hata kusekaie kuwaghanyika kungi aghadi konyu, ela mmbwadane kwa nia imweri na njama imweri.

¹¹Angu naghorelo ni wandu wamu wa nyumba ya Kiloe, wei mwaawuyarashana wanidu.

¹²Naawuyaghora huwu, kedi kula umu onyu wadaghora, “Ini ne wa Paulo,” angu “Ini ne wa Apolo,” angu “Ini ne wa Kefa,” na “Ini ne wa Kristo.”

¹³Welee, Kristo oowaghanyika? Paulo oresulubishiroghe kwa wundu ghonyu? Anguu, modebaputizwa kwa irina ja Paulo?

¹⁴Chawucha angu ini serem'baputizireghe mndungi onyu, ela Krispo na Gayo;

¹⁵mndungi usecheghamba wei odebaputizwa kwa irina japo.

¹⁶(Ee loli, na wandu wa nyumba ya Stefano nerewibaputizireghe wori; ela siwuemanya ngera nam'baputizire mndungi kuchumba anduangi.)

¹⁷Angu Kristo ndenidumie nibaputize, ela ooniduma nijichile Ilagho Jiboie; hata si kwa hikima ya kidamu anduangi, ndighi ya kifwa cha Kristo msalabenyi isechekaia ni ya duu anduangi.

¹⁸Angu ilagho ja msalaba ni wukelu kwa awa witotagha, ela kodu isi dikirwagha, ni ndighi ra Mlungu.

¹⁹Angu yaandikilo, “Nichainona hikima ya awo wiwadie hikima, na akili ra awo wiwadie akili nicharilegha.”

²⁰Idana mundu wa hikima oko hao? Oko hao mwalimu wa Sharia? Oko hao fundi wa malagho wa matuku agha? E hoku Mlungu umerie kuwonyera wori hikima ya wurumwengu ughu kukaia ni wukelu?

²¹Angu Mlungu, kwa hikima yake, wurumwengu ghorelemeloghe ni kummanya kwa hikima yake cheni. Niko erem'boieghe Mlungu, kwa chia ya wukelu ghwa agha dawuyaghichila, kuwikira awo wirumiriagha.

²²Angu Wayahudi weekunda alama, na Wagriki wialola hikima;

²³ela isi daawuyamchila Kristo usulubishiro, uo uko ikuwisho kwa Wayahudi, na wukelu kwa wandu wa mbari zima.

²⁴Ela kwa awo wiwangilo ni Mlungu, ikaiagha ni Wayahudi angu Wagriki, kwawo Kristo ni ndighi ra Mlungu na hikima ya Mlungu.

²⁵Angu icho chiwonekagha kukaia wukelu ghwa Mlungu chachumba hikima ya mdamu, na icho chiwonekagha kukaia wunyonge ghwa Mlungu chachumba ndighi ra mdamu.

²⁶Ririkanyenyi kuwangwa konyu wanidu; kunughana na seji wurumwengu ghuko, si wengi wenyu werewangiloghe wiko na hikima, angu kudima, hata wandu wikumikie anduangi.

²⁷Ela Mlungu orechisaghueghe icho chiwonekagha cha wukelu wurumwengunyi, uwonechifusha waya icho cha hikima; ukasaghua icho chisewadie ndighi wurumwengunyi, uwonechifusha waya icho chiko na ndighi.

²⁸Mlungu oresaghueghe ivo vilambo va ndonyi vimenyekie wurumwengunyi, hata ivo vilambo vigheshwagha kukaia si kilambo chingi, upate kuviinja ivo vilambo viko;

²⁹eri mdamu ungi usakekukasa imbiri ya Mlungu.

³⁰Mlungu nuo asili ya irangi jenyu andenyi ya Kristo Jesu; nao nuo um'bonyere Kristo Jesu ukaie hikima edu, hachi edu, kueleshwa kodu, na wukomboli ghodu.

³¹Kwa huwo, sa iji koni iandikilo, “Uo ukukasagha, ndekukase na Bwana.”