Read TAITA BIBLE – Biblia Ilagho Jiboie Kwa Wandu Wose 1 WAKORINTHO 10 Bible Online

1 WAKORINTHO 10 - TAITA BIBLE – Biblia Ilagho Jiboie Kwa Wandu Wose bible

1 WAKORINTHO 10

¹Nakunde inyo wanidu mmanye kukaia, weke wawa wedu werekoghe wose aisi ya iwingu, na wose wikaida aghadi ya bahari.

²Na wose werebaputiziroghe andenyi ya iwingu, na andenyi ya bahari, wikaie wa Musa;

³wose wikaja vindo vimweri va kiroho,

⁴na wose wikanywa kunywa kumweri kwa kiroho. Angu werenyueghe kufuma kwa ijo Igho ja kiroho, ijo jerewinughieghe; na Igho ijo jerekoghe Kristo.

⁵Elaima sena, wengi wawo Mlungu ndereboilwanyeghe nawo anduangi; angu weretotesheroghe kireti.

⁶Idana maza iri rakaia mfwano kodu, dipate kukufundisha disekaie na bea ya maza rizamie seji awo werebonyereghe.

⁷Msaketasa milimu seji wamu wawo werebonyereghe; sa iji iandikilo, “Awo wandu wereserieghe kidombo wikaja na kunywa, wikawuka kimusi na kuvina.”

⁸Hata disakelaka, sa iji wamu wawo werelakieghe, wikafwa wandu elfu mirongo iwi na idadu kwa ituku jimweri.

⁹Disakemtima Bwana, sa iji wamu wawo werebonyereghe; wikatoteshwa ni choka.

¹⁰Hata disakezughunuka, sa iji wamu wawo werebonyereghe; wikatoteshwa ni uja M'bwaghi.

¹¹Maza iri rerebonyekieghe kwawo rikaie mfwano, rikaandikwa rikaie mafundisho kodu isi divikilo ni ngelo ra kutua.

¹²Kwa huwo, mndungi ukaririkanya kukaia wamange, ndekulindie usecheghwa.

¹³Ndekuwadie itimo jingi jimpatire, iseeka ni ijo jeni jiwipatagha wandu wose. Mlungu ni mloli, nao ndechaamsigha mtimo kuchumba ndighi renyu; ela chiaimweri na jija itimo, uchaboisa chia ejifuma, eri mdime kujirumaghia.

¹⁴Kwa huwo wakundwa, kukimbienyi kutasa milimu.

¹⁵Naghora nenyo sa wandu wa akili; tanyenyi mmbeni agho nighoragha.

¹⁶Icho kikombe cha irasimio dichifunyiragha chawucha-lee, ndechiko ngara na bagha ya Kristo anguwada? Ugho mkate dighuchikanyagha-lee, ndeghuko ngara na mumbi ghwa Kristo anguwada?

¹⁷Kwa kukaia ugho mkate ni ghumweri; isi, hata ngera deko wengi, de mumbi ghumweri; angu isi diwose dadawaghiana ugho mkate ghoni ghumweri.

¹⁸Ririkanyenyi wandu wa Israeli; awandu wijagha ivo vizongona-lee, ndewiko ngara na agho madhabahu anguwada?

¹⁹Da huwo ni kughamba wada? Wei vindo vifunyiro kizongona kwa milimu, ni kilambo chingi? Angu wei milimu ni kilambo chingi?

²⁰Hata! Naawuyaghora welee, icho watasi milimu wichifunyagha kizongona, wadarifunyira pepo si Mlungu ungi; nani sikunde inyo mkaie wangara wa pepo anduangi.

²¹Ndemdimagha kunywa kikombe cha Bwana na kikombe cha pepo, hata ndemdimagha kukaia ngara na Meza ya Bwana, sena mkaie ngara na meza ya pepo anduangi.

²²Wele diam'bonya Bwana uwado ni iriso? Kwani deko nandighi kumchumba?

²³Vilambo vose vaboie, ela si vose vifwanagha; vilambo vose vafwane, ela si vose viaghagha anduangi.

²⁴Mndungi usakekulolia fwaida rake moni, ela umlolie mmbao.

²⁵Jenyi icho chose chiuzwagha sokonyi; msakekotia-kotia kwa wundu ghwa nia.

²⁶Angu maandiko ghaghamba, “Ndoenyi ni kwa Bwana, na vose viko andenyi yaro.”

²⁷Iji mwawangwa ni mundu userumiriagha mwendeja vindo kwake, nenyo mwakunde kughenda, mkaghenda, muje icho chose chawikwa imbiri konyu; msakekotia-kotia kwa wundu ghwa nia.

²⁸Ela mndungi ukamzera, “Vindo ivi veefunywa vikaie kizongona kwa mlimu,” msakevija kwa wundu ghwake uo wamghoria; na kwa wundu ghwa nia.

²⁹Naaghora nia yake, si yenyu ingi! Kwaki wuhuru ghwapo ghubonyerwagha nguma ni nia ya mundu mzima!

³⁰Ikakaia naja ivo vindo kwa kufunya chawucha, kwaki nitanywagha kwa wundu ghwa ivo navifunyira chawucha?

³¹Kwa wundu ugho, ngera mwaja angu kunywa, angu ijo jose m'bonyagha, bonyenyi ghose kwa wundu ghwa wubaa ghwa Mlungu.

³²Msakereda makuwisho ghangi kwa Wayahudi, angu kwa Wagriki, angu kwa ikanisa ja Mlungu.

³³Bonyenyi seji koni nawuyatima kuwiboia wandu wose kwa kula ilagho, kuseko kulola fwaida rapo nimoni; ela ra wandu wengi, eri wipate kukirwa.