Read TAITA BIBLE – Biblia Ilagho Jiboie Kwa Wandu Wose 1 WAKORINTHO 3 Bible Online

1 WAKORINTHO 3 - TAITA BIBLE – Biblia Ilagho Jiboie Kwa Wandu Wose bible

1 WAKORINTHO 3

¹Wanidu, ini seredimieghe kughora nenyo sa wandu wa kiroho; ela niaghora nenyo sa wandu wa mumbinyi na sa wana wakoo andenyi ya Kristo.

²Neremnyoshereghe mariwa, seremnekieghe vindo vikurie anduangi; angu ndemorevidimagha kungi.

³Hata idana mwaduagha msevidimagha, angu mwaduagha mumbinyi. Ikakaia mduagha na iriso na kurashana, inyo si wa mumbi nndoki; e hoku mwaawuyabonya sa wandu wa wurumwengu!

⁴Mundu ukaghamba, wei “Ini ne wa Paulo” na mzima ughambe, “Ini ne wa Apolo” huwo ndamwaawuyawonyera mooka wa wurumwengu anguwada?

⁵Apolo nani? Na Paulo nani? Nechi isi de wadumiki, dimteserie mkarumiria, karakara na seji kula mundu unekelo ni Bwana.

⁶Ini nerewaeghe, Apolo ukadunga machi; ela Mlungu nuo uibukishire.

⁷Uo uwagha na uo udungagha machi si kindo chingi, ela Mlungu nuo uzoghoragha.

⁸Uo uwagha na uo udungagha machi, weekatana; na kula umu uchapata mafungu ghake karakara na kazi yake.

⁹Angu isi de wabonyi kazi wa Mlungu, inyo mo mbuwa ya Mlungu, na iaghi ja Mlungu.

¹⁰Ini sa m'baa wa waaghi, karakara na seji niwikilo kwa mvono ghwa Mlungu, naaghie msingi, na mundu mzima uaagha aighu yaro. Kula mundu ndemanye seji uaghagha aighu yaro.

¹¹Angu ndekuwadie mndungi udimagha kuagha msingi ghungi mzima, kuchumba ghuja ghoni ghuaghilo, nagho ni Jesu Kristo.

¹²Idana mndungi ukaagha aighu ya msingi ugho, dhahabu, feza, magho gha zoghori mbaa, angu midi, nyasi, angu matasa,

¹³kazi ya kula mundu ichawoneka worinyi; angu jija Ituku jichaifunukua, kwa kukaia ichafunukulwa kwa modo. Na modo ghuchaitima kazi ya kula mundu uibonyere.

¹⁴Ngera kazi ya mndungi oreiaghieghe aighu ya ugho msingi yadua, uo mundu uchapata malipo.

¹⁵Ngera kazi ya mndungi yahia, uo mundu uchapata hasara; hata ngera uo moni uchakia, ela ni sa kufufunuka modo.

¹⁶Welee, ndemmanyire inyo mo hekalu ya Mlungu, na angu Roho wa Mlungu wadakaia andenyi konyu?

¹⁷Ngera mndungi wainona hekalu ya Mlungu, nao moni uchanonwa ni Mlungu. Angu hekalu ya Mlungu yaelie; na hekalu iyo ni inyo mmbeni.

¹⁸Mndungi usakekukalia moni. Ngera mndungi aghadi konyu waghesha wei oko na hikima ya ngelo iri, ndewuye mkelu, eri upate kukaia na hikima.

¹⁹Angu hikima ya wurumwengu ughu ni wukelu kwa Mlungu. Sa iji iandikilo, “Wawiwada awo wiko na hikima andenyi ya mikalo yawo.”

²⁰Na sena, “Bwana waichi wori maghesho gha awo wiwadie hikima ni gha duu.”

²¹Kwa wundu ughu, mndungi usakekukasa na wadamu; angu vilambo vose ni venyu;

²²ngera ni Paulo, Apolo, angu Kefa; ngera ni wurumwengu, irangi, angu kifwa; ngera ni ngelo ihi, angu ngelo ichagha, vose ni venyu;

²³nenyo mo wa Kristo, na Kristo ni wa Mlungu.