Read TAITA BIBLE – Biblia Ilagho Jiboie Kwa Wandu Wose 2 WAKORINTHO 1 Bible Online

2 WAKORINTHO 1 - TAITA BIBLE – Biblia Ilagho Jiboie Kwa Wandu Wose bible

2 WAKORINTHO 1

¹Ini Paulo, mdumi wa Jesu Kristo kwa lukundo lwa Mlungu, na Timotheo mwanidu; namuandikia inyo ikanisa ja Mlungu jiko Korintho, chiaimweri na waeli wose wiko Akaya kose.

²Mvono na sere rifumagha kwa Mlungu Aba odu, na kwa Bwana Jesu Kristo, nderikaie andwamweri nenyo.

³Ndekaso uo Mlungu Ndee Bwana odu Jesu Kristo, Aba wa wughoma, na Mlungu wa wuhoreshi ghose;

⁴uo udihoreshagha andenyi ya wasi ghodu ghose, eri na isi didime kuwihoresha awo wiko na wasi ghungi, kwa ugho wuhoreshi ghoni dihoreshwagha nagho ni Mlungu.

⁵Angu sa iji koni dawuyatirirwa nandighi kwa wundu ghwa Kristo, huwo koni dawuyahoreshwa nandighi andenyi ya Kristo.

⁶Ngera isi datirirwa, ni kwa wundu ghwa kuhoreshwa na kukia konyu; na ngera dahoreshwa, ni kwa wundu ghwa kuhoreshwa konyu wori uko mkupatagha, iji mwarumaghia luma agho matiriro gheni dawuyatirirwa isi.

⁷Isuwirio diko najo kwa wundu ghonyu jamange; angu damanya sa iji koni mwawuyakaia wangara wa matiriro ghedu, huwo koni mchakaia wangara wa kuhoreshwa kodu.

⁸Angu ndedikunde inyo mkaie msemanyagha wanidu, seji dipatire wasi isanga ja Asia; angu derekorongeloghe nandighi kuchumba ndighi redu, hata dikasowa isuwirio jekaia moyo.

⁹Na loli dedeeka sa wandu dimerie kutanywa dibwagho. Ela ijo jedeeka jidibonye disakekurumiria isi diweni, ela dimrumirie Mlungu, uo urukishagha wafu;

¹⁰nao wadikirie na ndengwa ya kifwa, sena uchadikira; na isi daawuyamsuwiria, uo uchaachuria kudikira.

¹¹Inyo wori suti muditesie kwa malombi, eri wengi wipate kufunya chawucha wulalo ghodu; kwa wundu ghwa agho marasimio dinekwagha, kunughana na matumbulio gha malombi mengi.

¹²Isi daawuyakukasa na ilagho iji: nia redu rawuyadishuhudia seji dikaie wurumwengunyi na kuchumba seji dikaianye nenyo kwa wueli, na wuloli ghwa Mlungu; hata si kwa hikima ya wurumwengu, ela kwa mvono ghwa Mlungu.

¹³Isi ndedimwandikiagha ilagho jingi izima, ela ni ijo jeni mdimagha kujishoma na kutambukilwa; nasuwiria mchatambukilwa putu,

¹⁴sa iji koni mmerie kutambukilwa kutini; eri mpate kukukasa nesi, seji didimagha kukukasa nenyo ijo Ituku ja Bwana Jesu.

¹⁵Kwa kukaia neremanyireghe putu agha ghose, niko nerekundieghe nizoe niche konyu kande, eri kuboilwa konyu kukaie mando awi.

¹⁶Nerekundeghe nimarie konyu ngighenda Makedonia, sena ngafuma Makedonia nimarie konyu; na inyo mpate kunidambisha ngighenda Judea.

¹⁷Kwani nedeeka sa mundu oghaluka-ghaluka ingelo nerekundeghe kubonya huwo? Huwo nadabonya mipango yapo sa mundu wa wurumwengu? Nirumirie “Hee,” sena niwuye nighambe “Hata” iyo ngelo cheni?

¹⁸Loli sa iji koni Mlungu uko mloli, agho malagho deremghorieghe ndegherekoghe gha “Hee na hata” anduangi.

¹⁹Angu Mwana wa Mlungu Jesu Kristo, uo deremchilieghe konyu, ini, na Silvano, na Timotheo, si wa “Hee” na “Hata” anduangi; ela andenyi kwake ni “Hee” matuku ghose.

²⁰Angu malaghiro ghose gha Mlungu gheeka na “Hee” andenyi kwake. Kwa wundu ughu, niko isi dighoragha Amen kwa irina ja Jesu Kristo, kwa wubaa ghwa Mlungu.

²¹Ela Mlungu moni, nuo udimangishagha isi na inyo andenyi ya Kristo; nao wadidumie,

²²ukadikaba muhuri dikaie wake, na kudineka Roho wake andenyi ya ngolo redu ukaie wufunga ghodu.

²³Ela nammbanga Mlungu ukaie mshahidi wapo; uo wanimanya wori ni kwa wundu ghwa kumfuya wughoma niko niserechieghe Korintho.

²⁴Si angu wei daawuyajibonyera nguma irumirio jenyu, ela dabonya kazi chiaimweri nenyo kwa wundu ghwa kuboilwa konyu, angu inyo mwamange kwa irumirio jenyu.