Read TAITA BIBLE – Biblia Ilagho Jiboie Kwa Wandu Wose 2 WAKORINTHO 10 Bible Online

2 WAKORINTHO 10 - TAITA BIBLE – Biblia Ilagho Jiboie Kwa Wandu Wose bible

2 WAKORINTHO 10

¹Idana ini moni Paulo, niwonekagha wa mboa iji nikwanye nenyo, ela nibirie iji niko kula; namvoya kwa wumboa na nicha ya Kristo,

²msenishekerie niwonyere lubio ingelo dikwanye, ngikurumiria ini moni, seji niwonyeragha wandu wamu widiririkanyagha kukaia wei dadabonya malagho sa wandu wa wurumwengu.

³Kwa kukaia hata ngera deko wurumwengunyi, ndediwuelwa wuda kiwurumwengu anduangi.

⁴Maswagha dawuyalwa nagho, si gha kiwurumwengu; ela gheko nandighi ra Kimlungu revuchua ngome.

⁵Isi davuchua kula kindo chikujosagha cheni na kubonya nganyi aighu ya kumanya kwa Mlungu, na kujidwa wunyika kula ighesho, jipate kumsikira Kristo.

⁶Nesi deko tayari kufunya adhabu aighu ya kulegha kusikira kose, iji kusikira konyu kwakatia.

⁷Inyo mwaawuyazighana maza ra shighadi. Ngera mndungi wakurumiria uo moni kukaia wa Kristo, ndekumbuke angu sa iji koni uo uko wa Kristo, nesi ni huwo koni.

⁸Angu ngera nakukasa na kandighi aighu ya nguma edu, iyo Bwana oredinekieghe kwa wundu ghwa kumuagha, hata si kwa kumvuchua; sichaafwa waya anduangi.

⁹Sikunde kuwoneka sa mundu nawuyakumba wowa kwa barua rapo.

¹⁰Angu waghamba, “Barua ra Paulo reeka na malagho ghilemere na gha ndighi, ela uo moni ukakaia aeni, uawoneka mnyonge na madedo ghake ni gha duu.”

¹¹Nakunde awo wandu wifwane huwo witambukilo angu, dikaghora ilagho kwa barua ngelo diseko, nijo jeni dichaajibonya ngelo diko aeni.

¹²Si angu wei isi deeka angu daawuyakufwananisha na wandu wamu wikukasagha weni. Ela iji wakupima weni kwa weni, na kukufwananisha weni na weni, wasowekelwa ni suku.

¹³Ela isi ndedikukasagha kuchumba kipimo, ela dichadua kwa icho kipimo cheni cha kazi Mlungu udinekie; iyo diibonyagha hata ivike konyu.

¹⁴Angu ndedikukasagha kuchumba kipimo sa wandu disevikie konyu; kwa kukaia ni isi derekoghe wa imbiri kucha konyu na ijo Ilagho Jiboie ja Kristo.

¹⁵Ndedidimagha kukukasa isi diweni kuchumba kipimo, aighu ya kazi ya wandu wazima, ela isuwirio jedu ni angu, seji irumirio jenyu jichurikiagha, na wulalo ghodu ghobonya kazi aghadi konyu ghuchachurikia na ndighi;

¹⁶eri dipate kujichila ijo Ilagho Jiboie andenyi ya masanga ghiko mzenyu na kimonu, kuseko na kukukasa aighu ya kazi imerie kubonywa ni wandu wazima.

¹⁷“Uhu ukukasagha ndekukase na Bwana.”

¹⁸Angu mundu nderumirilwagha kwa kukukasa uo moni anduangi, ela uarumirilwa kwa kukaswa ni Bwana.