Read TAITA BIBLE – Biblia Ilagho Jiboie Kwa Wandu Wose 2 WAKORINTHO 3 Bible Online

2 WAKORINTHO 3 - TAITA BIBLE – Biblia Ilagho Jiboie Kwa Wandu Wose bible

2 WAKORINTHO 3

¹Welee, daazoya kukukasa diweni sena? Angu deekunda barua rekumwa sa wandu wamu, richagha konyu angu rifumagha konyu?

²Inyo mmbeni moko barua edu ekumwa, iandikilo ngolonyi konyu, imanyikagha na kushomwa ni wandu wose.

³Nenyo mwawonyera moko barua diiredie ifumie kwa Kristo, nayo ni barua iseandikilo kwa wino, ela eandikwa kwa Roho wa Mlungu uko moyo; hata ndeiandikilo aighu ya vishawalata va magho anduangi, ela eandikwa andenyi ya ngolo ra wandu.

⁴Ijo nijo irumirio diko najo kwa Mlungu andenyi ya Kristo.

⁵Si angu dakate isi diweni sa kughamba wei kilambo chingi chadima kufuma kodu koni anduangi, ela kukata kodu kuafuma kwa Mlungu.

⁶Uo udibonyere difwane kukaia wadumiki wejidumikia ijo Ilaghano Iwishi, si kwa sharia iandikilo anduangi, ela kwa Roho; angu sharia iandikilo yadabwagha, ela Roho wadakaisha moyo.

⁷Idana ikakaia iyo Sharia iredagha kifwa, iandikilo aighu ya vishawalata va magho erechieghe kwa wubaa mungi, hata Waisraeli wikalemwa ni kughuzighana wushu ghwa Musa, angu ghorekoghe ghuking'ala-ng'ala na ndighi, nagho ni wubaa ghuidagha;

⁸welee, ugho wudumiki ghwa Roho, ndeghuchaakaia na wubaa mungi kuchumba anguwada?

⁹Angu ngera ghuja wudumiki ghwa sharia iredagha kutanya ghorebonyeroghe kwa wubaa, ugho wudumuki ghwa hachi suti ghubonyo kwa wubaa mungi kuchumba.

¹⁰Na loli, seji iko, icho cherekoghe na wubaa, ndechiduagha nagho sena anduangi; angu chachumbwa ni ugho wubaa ghuko idana.

¹¹Angu ngera icho chiidie cherechieghe kwa wubaa, icho chiduagha ni suti chikaie na wubaa mungi kuchumba.

¹²Idana kwa kukaia isi deko na isuwirio ijo, deko na wuwana m'baa;

¹³ndediko sa Musa, uo orekufinikireghe wushu ghwake, eri Waisraeli wisewone kutua kwaro ghuja wubaa ghorekoghe ghukiida.

¹⁴Ela akili rawo rerekurishiroghe; angu hata idime, iji vuo va ilaghano ja kala vashomwa, kuja kufinikirwa kwadadua wokoni; kwa kukaia uko kufinikirwa kwadainjwa kwa chia ya Kristo uekeri.

¹⁵Ni huwo koni hata idime, vuo va Musa vikakashomwa, akili rawo riakaia rifinikiro;

¹⁶ela iji mundu wamghalukia Bwana, uko kufinikirwa kuanjika.

¹⁷Na Bwana nuo Roho, na andu Roho wa Bwana uko, ghoko wuhuru.

¹⁸Na isi diwose, dikikaia na wushu ghusefinikiro, daghuzighana wubaa ghwa Bwana sa kwa kilole, na kughaluswa hata divikie kufwanana nao, kwa ugho wubaa ghuchumbie; angu maza iri riafuma kwa Bwana, uo uko Roho.